ورقہ 8

125
کیتی عرض فرشتے حضرت کون اسیں بے چارے
جے ہِک گِٹھ اگیرے ہوواں سڑ جاندے پر سارے
126
نہیں مجال اساڈی اگے چمکن نور تجلےّ
ایسا قرب تسانوں لائق جاؤ ہِک ہکلّے
127
جتھے قدم تساڈا اوتھے ہور نہیں کوئی پُجدا
اہل کمال جلال محمد توں ہیں تو ہیں سُجھدا
128
سبھ کسے تھیں گئے اگیرے چاء چاء پردے نوری
قَابَ قوسین اَو ادنیٰ تائیں پایا شان حضوری
129
جانی نال ملے دل جانی وتھ نہ رِہیاّ ذرّہ
خلعت تحفے ہدیے لے کے آئے پھیر مقّررہ
130
ایسا نبی جنہاں دا والی سو امت کیوں جھُرسی
عیب گناہ خطایاں بابت کیوں دوزخ ول ٹرسی
131
کے کجھ نعت تساڈی آکھاں خلقت دے سردارا
لاکھ صلوٰۃ سلام تیرے تے لاکھ درود ہزارا
132
تدھ پر ہون درود اللہ دے آل اولاد تیری تے
پیرواں اصحاباں اُتے بھیں بنیاد تیری تے
133
پیر مرید صدیق اکبر سن پہلے یار پیارے
حق جنہاں دے ثَانِیَ اثنَینِ اِذ ھُمَا فِی الغَارِ
134
یار دُجا فاروق عمر سی عدل کیتا جس چھڑکے
ایہہ شیطان رجیم رُلایا پنجے اندر پھڑکے
135
شب بیدار غنی سی تریجا جامع جو قرآنی
عثمان ذوالنورین پیارا مہتر یوسف ثانی
136
چوتھا یار پیارا بھائی خاصہ دل دا جانی
دُلدُل دا اسوار علی ہے حیدر شیر حقانی
137
لَحمُکَ لَحمِی دَمُّکَ دَمّیِ شان جنہاندے آیا
سخی بہادر جگ وچ نادر جس دا عالی پایہ
138
ذوالفقار جنہاں نوں اتری خلعت فقر حضوروں
جُمل جہان ہوئی رُشنائی شاہ مرداں دے نوروں
139
جمدّڑیاں سن جس دے اگے بتّاں سیس نوائے
خیبر کوٹ کفار گِڑائیوس ڈنکے دین وجائے
140
ستّر دو بہتر واریں راہ اللہ دے وِکیا
دوئے امام دِتے راہ مولیٰ پھیر صبر کر ٹکیا
141
رباّ انہاں اماماں پچھے جو گُل لال نبی دے
پاک شہید پیارے تیرے افسر آل نبی دے
142
ہکناں عشق تیرے دے پیتے بھر بھر زہر پیالے
خنجر جھاگ محبت والی ہکناں بدن حلالے
143
ہوندی قوت زور نہ لایا بیٹھے من رضائیں
پانی باجھ پیاسے چلّے دین دنی دے سائیں

لفظالی:
سُجھدا = نظر آوندے او ۔ایہہ شیطان رجیم = شیطانی قوتاں نوں نرڑکے بے بس کردتا ۔ ذوالنورین = دونوراں والا۔ حضرت عثمان غنی ۔کیوں جو رسول مقبول دیاں دودھیاں حضرت رقیہ تے ام کلثوم اک دوجی توں بعد آپ دے نکاح وچ رہیاں نیں ۔ دلدل = سیاہی مائل خچر جیہڑا حاکم سکندریہ مقوقس نے رسول کریم نوں تحفہ دتا تے حضور نے حضرت علی نوں عطا کردتا ۔لحمک لحمی =ایہہ کلمے رسول کریم نے حضرت علی دی شان وچ آکھے سن تیرا ماس میرا ماس اے تے تیری رت میری رت اے۔ اسی اِکو کُجھ ہاں ۔بنیاد = جد۔ پشت ۔قاب قوسین او ادنی =ٹ ک ق م النجم ۔ ۔ثانی اثنین اذھما فی الغارِ = ٹ ک ق م التوبہ ۔ ۔جمل = سارا ۔گِڑائیوس = اوہنے ڈیگیا ۔حلالے = حلال۔ ذبح کیتے۔ کیوں جُھرسی = افسوس پچھتاوا نہیں کرے گی ۔بھیں =(1) بھی۔ وی(2)۔ لازما، مقّرہ= یقینا۔ لازماً definitely، ایہہ= ایس نے ، جھاگ= جھل کے ۔ سہ کے،