ورقہ 46

811
مہر مقدم تے پٹواری دفتریاں دیواناں
قدر بقدری سبھ نے آندا شکرانہ نذرانہ
812
شاہ یمن دے تحفہ کر کے آندی سیف بھلیری
جو جمشید آہا لک بنھدا عید خوشی دے ویری
813
اوہ میراث یمن دے شاہے پیو دادے دی آہی
جمدیاں لے لئی شہزادے واہ اقبال ایہ شاہی
814
عاصم شاہ ایہ سیف لبھن دا جاتا شگن بھلیرا
ہے فرزند اقبالاں والا ہویا شاد ودھیرا
815
سیف ملوک اس گلوں دھریا شاہزادے دا نانواں
ہن وزیر اوہدے دی یارو تھوڑی گل سنانواں
816
سید علی ہمدانی مینوں ایہ روایت دسےّ
شاہ وزیر دوہاں دے جُھگے ہکس دہاڑے وسے
817
ہکسے رات نِمے تے جمّے حکمت نال الٰہی
برج ستارہ رات ہکو سی کجھ تفاوت ناہی
818
صالح نے اس گلوں رکھیا صاعد نام پتر دا
وچ حساب حمل دے ایہو پورا سی اُتردا
819
شاہ وزیر دوہاں گھر شادی ملی مبارکبادی
لے لے جاون دان ہزاراں جو کوئی منگت آدی
820
کنجر اتے کلونت میراثی شرنائی رسدھاری
بازی گر ہزار طرح دے بھگتی نٹ مداری
821
چھُری مار تے خسرے پیرن ناڑے چڑھن دھگانے
آپو اپنے کارج کر کے لُٹن بہت خزانے
822
طُرماں تے قرنائیں والے مارن ڈھول بھرائی
کیہڑے کیہڑے گِنے محمد کٹھی ہوئی لوکائی
823
سیف ملوک تے صاعد کارن شہروں باہر کنارے
پکا باغ سُہایا بہتا لائے وچ فوارے
824
چیکن کُھوہ سُراں کر بولن وانگن چھتری راگے
پر ہک دیپک گان نہ ڈردے شالہ اگ نہ لاگے
825
شوقوں طوق پیا گل قمری کوکو کُوکے بولے
کوئل تان لئی ہو اُچی کر دے ناچ ممولے
826
بلبل طوطے سوہلے گاون حال پئے حیواناں
کھُوہ دا کتا چٹکی مارے بیل پھرے دیوانہ
827
ٹنڈاں ہنجو بھربھر ڈوھلن جان اندر کر خالی
سدا نہیں اس رونق رہنا سدا نہیں خوشحالی
828
بنھ قطار چنار سفیدے سرو ازاد کھلوتے
سدھے صاف برابر دسن تار پریت پروتے
829
ہر ہر پاسے نہراں وگن چوک عراق اچیرے
شیش محل چوبارے گوشے بھلے بھلیرے ڈیرے

لفظالی:
مہر= پنڈ دا چوکیدار جو سرکاری کماں وچ مقدم دی مدد کرے۔ مقدم = پنڈ دا لگان' معاملہ اکٹھا کرن والا سردار۔ دفتری= ریکار ڈ کیپر۔ ویری= موقع محل تے۔ سید علی ہمدانی= ٹ ک : شخصیتاں۔ نِمے= مصدر نمناء اُگن توں پہلاں بی نوں نم وتر لگنا ۔ صاعد= اوپر چڑھن والا' ترقی کرن والا۔ منگت آدی=جدی پُشتی مانگت۔ کلونت= موسیقی دے فن دا ماہر۔ شرنائی= سرنائچی ' شہنائی وجاون والا۔ رسدھاری= راس دھاری ' ناٹک ڈرامہ کرن والا ۔ جمشید= ٹ ک شخصیات۔ بھگتی= ناچے۔ بھنڈ= جگتاں کرن والے مخلولیئے۔چُھری مار= ایسا مانگت جو دان نہ ملن تے اپنے آپ نوں چھری مارن دی دھونس دیندا اے۔ پیرن= ناچے قبیلے دا بندہ!۔ ناڑے چڑھن دھگانے= زبردستی دھکو دھکی ودھائی لین لئی اُتے چڑھے آوندے نیں ۔ طرم= فوجی بگل۔ عراق= دریا دے کنڈھے رونق دار بستی۔حمل = (١) آسمان دا پہلا بُرج ۔ میگھ(٢) ماں دے آسن ہون دا ویلا،جھُگے= گھر، چھتری راگے= ٹ ک راگ ویروا،