ورقہ 48

850
طالع وقت ڈٹھے تاں سانوں ایہ کجھ نظری آیا
سیف ملوک شہزادے ہوسی تدھ تھیں شان سوایا
851
شوکت ہیبت زور شجاعت حِلم حیاء حلیمی
علم سخاوت عقل تواضع ہوسی خوء کریمی
852
سُورج ہار ہمیشہ کرسی نت دینہاں زر بخشی
چن وانگن کئی راتیں چاندی اینویںہر ہر بخشی
853
پر ہک اس تے پہلی عمرے گردش دے ستارا
چِٹک عشق دی نال اس دیسوں سفر کریسی بھارا
854
جنگل تے کوہ قاف سمندر پھر سی کئیں جائیں
کتنے سال ہکلا تکسی راکش دیو بلائیں
855
مارن تے کئی دشمن ڈُھکسن مولیٰ ایس بچاسی
بہتے سخت قضیئے دس کے اللہ آس پچاسی
856
عاصم شاہ ایہ گلاں سُن کے آن پیا وچ فکرے
ہوغمناک تحمل کر دا دھن شاہاں دے جگرے
857
جے سو سخت مصیبت اگے درداں والی دِسےّ
سر ورتی بِن ہر گز یارو قدر نہ آوے کِسےّ
858
ہر کوئی جانے سوڑی سامی اگے قبر انھیرا
ہِک ہکلےّ وچ اُجاڑے دائم ہوسی ڈیرا
859
جان کندن دی تلخی ڈاہڈی سُن گلاں تن کنبے
پک کتابیں خبراں اگے دوزخ بھاہ النبے
860
اس سننے تھیں کد اسانوں خوف پیا دل جھڑیا
جاں اوہ گھڑی سرے تے آئی پتہ لگے گا اڑیا
861
عاصم نوں تد معلم ہوسی جاں فرزند وچُھنا
کے ہویا اج کرے تحمل سُن کے خبر نہ رُناّ
862
کہندا لکھے لیکھ ازل دے مول نہ جاندے میٹے
دِتا اس دا سر تے جھلساں جے رب کھڑسی بیٹے
863
کرنا صبر اسانوں چنگا جے اوہ دے بلائیں
راضی ہو کے جھلاں چارہ ناہیں نال قضائیں
864
شاہ بیٹھا کر صبر تحمل دل توں فکر گوائے
سد مُعلّم فاضل عالم لڑکے پڑھن بہائے
865
شاہزادے نوںدے دلاسا ہتھ سرے تے پھیرے
کہندا بیٹا علم پڑھیں تاں واہ نصیبے تیرے
866
پڑھنا علم ضرور بندے نوں کیتا فرض الٰہی
کردا علم دلے نوں روشن ہوندی دور سیاہی
867
جیوں سورج وچ نورتویں ہے علم روحے وچ جانے
نورے باجھوں سورج پتھر آدم جنس حیوانے
868
علمے کارن دنیا اُتے آون ہے انساناں
سمجھے علم وجود اپنے نوں نہیں تاں وانگ حیواناں

لفطالی:
تواضع= اپنی ذات نوں عاجز مسکین دسدیاں دُوجے دی خاطر داری۔ سورج ہار = سورج وانگوں ۔ زر بخشی= کرناں بخشن دا کم۔چِٹک = چیٹک لگن۔ ڈُھکسن= نیڑے آون گے۔ سرورتی= ہڈیں واپری۔ سوڑی= تنگ ( چوڑی دا اُلٹ) ۔ جان کندن= نزع ویلے دا دُکھ ۔ پک= حق سچ صحےح یقینا ۔ وچھُنا= وچھڑیا۔ چارہ= جتن' علاج'اُپائ۔ روحے= روح۔ جانے=جان۔ نورے= نور۔ حیوانے= حیوان دی۔ سامی= قبر وچ اک پاسے کڈھی بھیڑی چُرھ جہدے وچ مردے نوں لٹایا جاندا اے۔حِلم= صبر۔ بردباری،خؤ= عادت سُبھائ، دس کے = وکھاکے،چاندی = چاننی، اینویں =مُفت، دِل جھڑیا= Heart sank