ورقہ 49

869
سیف ملوک پیو نوں کہندا نیوں کے ہو سلامی
جو فرماؤ سر پر بندہ منساں حُکم تمامی
870
جیہڑا کم تساں فرمایا عین صواب اسانوں
شاہ وزیر نجومی سد کے پُچھیا ہر یکساں نوں
871
ساعت نیک ہوئی جد حاصل لڑکے پڑھن بہائے
اوہ استاد لیاندا جہڑا ہر ہک علم پڑھائے
872
کاتب زرّیں رقم اس اگے جا شیرینی دھردے
لے صلاح پکاون بیٹھے ہو شاگرد ہنر دے
873
افلاطون ارسطو سلماں سارے کرن تیاری
پُچھیئے اس استادے کولوں جو گل مشکل بھاری
874
سحبانے نوں نال زبانے دسے کھول بیاناں
اوہ شاگرد اکابر دوئے اوہ استاد یگانہ
875
سیف ملوک اندر رب پایا بہتا اثر دانائی
تیز طبیعت ہوش ودیعت فہم عقل چترائی
876
صاعد بھی سی ودھ علامہ فہم عقل ادراکوں
واہ خالق جس پیدا کیتے بھلے بھلیرے خاکوں
877
دس برس وچ ہر ہر علموں دوئے حافظ ہوئے
شاہزادہ جاں کرے کلاماں موتی لعل پروئے
878
جو خط دنیا اُتے لکھدے سیف ملوک پکائے
خوشخط اس دا ویکھ فرشتہ حیرانی وچ جائے
879
عربی عجمی عبری کوفی خوشخط فارسیاں دا
بید اچھرے گور مکھی ہندی حرف شناسیاں دا
880
ڈوگری اکھر خط فرنگی انگریزی ہور دُجےّ
اردو خط بنگالی دکھنی سارے لِکھے بُجھےّ
881
سُریانی ایرانی ترکی یونانی اعراقی
سکھے خط زباناں سبھو کجھ نہ رکھے باقی
882
ویکھ علم سلیمان نبی دے پائی بھاکھیا غولی
دیواں پریاں والی ساری جانوراں دی بولی
883
اوسط ملک سمندر ٹاپو سراندیپ شہر دی
سیف ملوک سلیماں وانگن سمجھے گل ہر ہر دی
884
اس حدّے اوہ عالم ہویا قاضی سبھ ملکاں دے
جے مسئلے دی مشکل پوندی اس تھیں پچھن جاندے
885
سبھ دقیقے کھول دسالے کرے بیان چنگیرا
عالم فاضل سُن سُن آکھن دھن اوہ خالق تیرا
886
مثل داؤد نبی دے آہا شاہزادے آوازہ
جدوں کلام کرے سُن ہوندا شوق الٰہی تازہ
887
جے سو ہوون سننے والے عالم فاضل دانے
نال آواز اوہدی دی لذت ہوندے مست دیوانے

لفظالی:
سر پر= لازمی طور پر، برسر۔ عین صواب= بالکل ٹھیک ، لاریب۔ زریں رقم= ایران دا بلند پایہ کاتب ہدایت اللہ ( تاج الدین زریں رقم نہ سمجھیا جاوے کیوں جو اوہ 1910ء وچ پیدا ہویا سی)۔ سلمان= حضرت سلیمان جنہاں دی دانائی مشہور اے۔سحبان= سحبان بن زفر بن ایاس عرب دے باہلی قبیلے دا جادو بیان مقرر جہنے جاہلیت تے اسلام دے دور ویکھے سن ۔ ودیعت= خدا داد قابلیّت ۔ پکائے= چنگی طرحاں مشق کر لئی۔ عبری = عبرانی۔ بیداچھرے=ویداں دی اکھر پٹی۔ بُجھے= پڑھ لئے Decodeکر لئے۔ پائی= معلوم کر لئی۔ بھاکھیا غولی= جناں دیاں دی بولی۔ دقیقے=باریکیاں۔ مشکلاں، نکتے دار مسئلے۔ بھلے بھلیرے= چنگے توں چنگے، بہتر توں بہتر۔ ہر یکساں = ہر بندہ جیہڑاعلم مہارت وچ کسے دوجے دے برابرہووے، ساعت نیک= شُبھ گھڑی، یگانہ = مُنفرد، آوازہ= آواز ۔ گلا