ورقہ 50

888
حسن رسیلا خوء حلیمی سادہ مکھ صفائی
سوہنے ویکھ ہوون شرمندے جھال نہ جھلدا کائی
889
روشن شمع نورانی چہرہ بُجھےّ لاٹ اسمانی
وانگ پتنگاں سڑن چوپھیرے عاشق مرد زنانی
890
جے اوہ نظر کرے ول انبر چمک نہ جھلّن تارے
تارے جس ول مہریں آوے کر دا پار اُتارے
891
نیواں تکے دھرتی لگن بجلی دے چمکارے
ایسے روپ انوپ کرم دے صفت کریندے وارے
892
تھوڑی تھوڑی صفت محمد لکھدا چل ہر جائی
نرمی پھڑ مت حسنوں گرمی کاغذ قلم جلائی
893
جے لکھ صفت ثنا سُنائیں ِلکھ ِلکھ ورق بتیرے
لکھوں ہِک نہ مُکدی مُولے قصہ ٹور اگیرے
894
چودھاں برساں دے جد ہوئے صاعد تے شہزادہ
سبھنیں صفتیں اکو جیہے پر کجھ شاہ زیادہ
895
کرنا رب دا اینویں ہویا کھاندا پھیر زمانہ
عاصم شاہ خوشی وچ بیٹھا کر دا جشن شہانہ
896
میر وزیر بلا پیارے مجلس خوب سُہائی
سُچے فرش فروش وچھائے عطراں بو مچائی
897
لیاؤ سُرخ شراب پرانا ہویا حکم کلالاں
پی کے مدھ ہوئے متوارے چمکن وانگ مشالاں
898
ہر جائے کافوری شمعاں عجب سنواں بنایا
سوہنی صورت زیور والے دسے روپ سوایا
899
لے لے تان کلونت اُتارن زُہرہ نوں اسمانوں
تار طنبور گھوکار مچایا کرے بیان حقانوں
900
دائریاں سر پیر رلائے بیٹھے حلقہ کر کے
کردے یاد پیارے تائیں ذکر سینے وچ کر کے
901
کئی قانون سُراں دے کڈھن قانوں اُتے سرندے
ہوون ناچ کھماچ وجاون واچ خیال حسن دے
902
سُن سُن راگ ہوون مستانے مارن چُٹکی تاڑی
چٹکی تاڑی دا آوازہ زہرہ انبر تاڑی
903
سندر بانکے نفر غلاماں بھر بھر دین پیالے
محبوباں دے حسن عجائب کھڑدے ہوش سمھالے
904
عاصم شاہ خوشی کر بیٹھا کھِڑدا وانگ گلاباں
بیٹے طرف پچائے تحفے بہتے ہتھ نواباں
905
ہر ہر قسم ہزار طرح دی بھلیوں بھلیاں وستوں
گنتر ہوندی کد محمد قصہ اگوں دس توں
906
شاہزادہ جاں تکڑا ہویا آیا زور ہنگاواں!
کہیا شاہ سپاہ گری دا اس نوں کسب سکھانواں

لفطالی:
جھال نہ جھلدا۔۔۔۔۔۔= کوئی ویکھن دی تاب نہیں سی لیا سکدا۔ تارے= تار دیوے پار اُتارا کر دے ۔ پار اُتارے کرنا = مسائل حل کرنا ۔ روپ = حسن ۔ انوپ= بے مثال، لاثانی۔ کرم= کرنی عمل۔ وارے= صدقے جاندے نیں ۔ سُہائی = سجائی۔ فروش= جمع فرش دی، قالین غالیچے۔ گِنتر= گنتی۔ کلال= شراب کڈھن والا پیالے بناون والا۔ مدھ= شراب۔ متوارے= متوالے نشئی۔ زہرہ انبر تاڑی= ٹ ک تفصیلاں۔ ایس مجلس دی آوازنے زہرہ نوں اسمان تے تاڑ چھڈیا اے۔ سنواں= سماں ۔ ہنگاواں= ہنگامہ جوش ۔زہرہ= ناہید آسمانی رقاصہ۔ زہرہ نوں اسمانوں اتارنا= زہرہ توں ودھ کم کر کے اوہدا درجہ گھٹانا ۔ گھوکار= گونج ۔ حقانوں= حق ولوں ۔ دائری = دف وجاون والا۔ حلقہ کرنا= دائرہ بنانا۔ سرندے= گوئیے گائک ۔ قانون=ٹ ک تفصیلاں۔ سر پیر رلانا=جدوں گُر مکدا اے تاں گوئیے سازندے سِر تے پیر نوں موافق حرکت دیندے نیں ،آوازہ= آواز شہرت،