ورقہ 51

907
ملکاں شہراں فوجاں اندر جو سن رستم ثانی
لاون کانی تیر اسمانی دسّن ہنر کمانی
908
نیزہ مار اُتار لیاون چوکیدار انبر دے
سیفاں نال کریندے ٹوٹے سیمر غاں دے پرَدے
909
برچھی تپک تے سیف طمانچے خنجر چھُرا کٹاری
نیزہ بازی تیر اندازی ختم کیتی اُس ساری
910
سیف ملوک شہزادہ صاعد طاق ہوئے ہر کسبوں
شاہزادہ شاہانے کموں ایہ وزیری وسبوں
911
ہو اسوار پیاد قواعد کردا ہر ہتھیاروں
رستم بہمن اسفندیاروں دھنی ہویا تلواَروں
912
تھوڑی مدّت وچ شہزادہ ہویاسکندر ثانی
علموں عقلوں زوروں شکلوں جو اوصاف انسانی
913
نونہال حسن دے باغوں بے نظیر شہزادہ
گلبدن تے بدر منیروں چہرے روپ زیادہ
914
نواں جوان تے آن حسن دی آن ہویا قد اُوچا
جس پاسے اوہ سرو لٹکدا سوہے گلی تے کوچہ
915
سیف ملوک شہزادے ہکدن نال قضا خدائی
خوشئیں خوشئیں ڈیرے اپنے مجلس خوب سُہائی
916
جیونکر رسم شہاں دی ہوندی پہلا جشن بنایا
باپ اپنے دی کر مہمانی اوہ بھی کول سدایا
917
خوب طرح دی دعوت دتی میر وزیر امراواں
قدر بقدری خلعت بخشی کے کجھ آکھ سناواں
918
باپ اگے نذرانے رکھے بیٹا ہویا سلامی
راجے رائے مبارک دیندے خوشیاں مُلک تمامی
919
لکھ لکھ لوک پڑھن شکرانے فوجاں تے مُلکیا
سجناں دے ول شادی ہوئی دشمن ہیبت پئی آ
920
میر وزیر گزارن نذراں کِھڑیا پھُل بہاراں
پائی آب گلاب شاہے دے ہویا چین ہزاراں
921
عاصم تک بیٹے دیاں نذراں نظراں تھیں بھؤ کھاندا
سَو سَو وار ونڈے سر صدقے جے رب خوشی پُچاندا
922
پیئو شراب ہویا خوش وقتی کم تکو تقدیری
دلگیری وچ شادی آوے شادی تھیں دلگیری
923
ساقی بخش شراب پیالا توڑ طبع دی سستی
آیا حال محال عشق دا دِسّے نال درُستی
924
مکھ دسال پیال پیالا ہوواں مست خماروں
شاہزادے دے وانگ محمد صورت دے جھلکاروں

لفظالی:
کانی= تیر۔ انبردا چوکیدار= زُحل ستارہ۔ سیمرغ= داستانی مافوق الفطرت ماحول وچ سب توںطاقت ور پرندہ۔ پردے= جِھلّیاں ( جنہاں دے ٹوٹے کرنا مشکل کم اے) ۔تپک=توپک، چھوٹی توپ۔ طمانچہ= چھوٹا پستول۔ کٹاری= چھوٹی تلوار۔ وسبوں= وصفوں۔ پیادہ= پیدل سپاہی۔ اسفند یار= ٹ ک شخصیتاں ۔ ملکیا= سارا ملک، ملک دے سارے عوام۔ نظراں تھیں بھؤ کھاندا= ایس توں ڈردا سی کہ پتر نوں نظر نہ لگ جاوے۔ خوش وقتی=چنگے موڈ وچ ۔ بہمن =ٹ ک شخصیتاں ۔ سوہے= سوہنا لگے۔ سُہائی= سجائی۔ خدائی قضا نال= رب سببی۔ قدر بقدری= درجہ بدرجہ، عُہدے سیتی۔ رائے=راجے دے خاندان دا کوئی فرد ہندو سردار۔ گذارن= پیش کرن۔ رب خوشی پچاندا= اللہ تعالیٰ خوشی دے موقع تے کوئی نا خوشگوار واقعہ رونما نہ کر دے۔ مُکھ دسال = جلوہ دکھا ، آب پانا= عزت قدر حاصل کرنا ، ہزاراں = بُلبلاں ،