ورقہ 9

144
عشق تیرے وچ گھائل ہوئے مائل حسن ازل دے
سر ِدتے پر سی نہ کیتی شادی کر کر چلدے
145
پیر سَنہے وچ نیر عشق دے بیڑا میرا تاریں
میں عاجز مسکین بندے نوں نال ایمانے ماریں
146
توڑے رد سوال کریسیں توڑے عرض قبولے
میں بی دوہیں جہانی پھڑیا دامن آل رسولے
147
یا نبی اللہ جے کجھ دتا قدر تینوں رب والی
ذرّے جتنا گھٹدا ناہیں ہتھں ہوندا عالی
148
اوگنہار طفیل تساڈے اسیں بہشتیں ائیے
رحمت اتے لقاء مہر دا پاک جنابوں پائیے
149
ہور کسے کجھ نیکی ہوسی توشہ خرچ قبر دا
مینوں ہکو نام تساڈا گہنا روز حشر دا
150
تینوں قوت بخشی مولیٰ سبھ خلقت بخشاویں
ہوندے زور سوال نہ موڑیں نبی کریم کہاویں
151
دوست دشمن چنگا مندا جے کوئی ہوئے سوالی
کد کریماں دے در اتوں مڑ آوے ہتھ خالی
152
رکھی جھول تساڈے اگے پاؤ خیر یتیماں
اوگنہار کوچجیں بھریا بخشیں نبی کریما
153
کیتی بے فرمانی تیری بُھلاّ پھریوس راہوں
نام اللہ دے بخش بے ادبی نہ کر پکڑ گناہوں
154
سخن نہیں کوئی ہوندا میں تھیں تیری شان قدر دا
طٰہٰ تے یٰسۤ الٰہی صفت تساڈی کردا
155
بہت عزت لولاکی تینوں کے میں صفت سناواں
آل اصحاب سمیت سلاماں ہور درود پچاواں
156
آل اولاد تیری دا منگتا میں کنگال زیانی
پاؤ خیر محمد تائیں صدقہ شاہ جیلانی

حضرت غوث الاعظم دی مدح

157
واہ وا میراں شاہ شہاں دا سیّد دوہیں جہانی
غوث الاعظم پیر پیراں دا ہے محبوب رباّنی
158
نانک دادک ولوّں اُچاّ سُچا حسبوں نسبوں
نبیاں نالوں گھٹ نہ رہیا ہر صفتوں ہر وسبوں
159
نبیاں نوں رب ولوں آندے وحی سلام سنیہے
وحی نہ محرم میراں تائیں دَسےّ بھیت اجیہے
160
نام نڑنمیں اس نوں بخشے حکم ایہو فرمایا
اعظم اسم تساڈا نانواں جس پڑھیا پھل پایا !

لفظالی:
سنہے =سُنیہ ۔ محبت۔ حُب۔ تعلق۔ جڑت ،نیر = دریا ۔ سمندر ۔نسب = کُل۔ نسل۔ باپ دادے پاروں ملیا مقام ۔ہتھوں = سگوں ۔لقا = دیدار ۔ جلوہ۔توشہ = سفردی خرچی ۔ اگلے جہان کم آون والی شے ۔جھول = جھولی۔ دامن ۔کُچج = بھیڑے چالے ۔پھریوس = میں پھردا رہیا ہاں ۔ زیانی=نقصان کرن والا۔ قصوروار۔ زیاں کار ۔حسب = سماجی مقام متھن لئی مقرر کیتے پیمانے اندازے ۔نانک = ماں۔ نانکیاں ولوں آپ دا سلسلہ والدہ محترمہ سیدہ فاطمہ ولوں چودھویں پیڑھی وچ جاکے حضرت امام حسن نال رل جاندا اے ۔دادک = دادکیاں ولوں آپ دا سلسلہ والد ماجد سید ابوصالح ولوں یارھویں پیڑھی وچ جاکے حضرت امام حسین نال مل جاندا اے ۔نام = ٹ ک تجلیات غوثیہ ص مولفہ ڈاکٹر محمد اختر چیمہ سول لائنز فیصل آباد