ورقہ 54

961
پہلی نظروں ہوش نہ بھُلے جیو نہ رہیا ٹکانے
جیوں زلیخا پہلی خوابوں رکھی شرم دھگانے
962
جادوگر تصویر شزادے چیر نہ کیتا ظاہر
جیونکر ڈائن نال نظر دے کھڑے کلیجہ باہر
963
اندر گزری جے کجھ گذری ظاہر حال نہ کیتا
دوجی وار شراب پیالا پھیر نویں سر پیتا
964
اچن چیت گیاں کھل اکھیں مارے عشق نقارے
لے ہتھیار لتھا مل تھانے کوٹ عقل دے مارے
965
ویکھ شہزادہ دولت والا ظالم نے ہتھ پایا
بنھ لیاوے اوج حسن دی سوہنا کیوں کہایا
966
اس تھیں کون چھڈاوے یارو ضامن نہیں وسیلہ
جے سو مایا دولت دئیے کرئیے لکھ لکھ حےلہ
967
سر دتے بِن نہیں خلاصی ایہو ایہدا ظلمانہ
جے سو سر وٹاویں دئےے تردا نہ جُرمانہ
968
سر بھی اوس دہاڑے لیندا جس دن آپوں منگے
نہیں تاں عاشق سر دیون تھیں پہلی وار نہ سنگے
969
جے عشقے دی صفتیںآیوں رہسی دور کہانی
دشمن یار اپنے دی خوبی کد تدھ ترُت مکانی
970
گھوڑا چرخ نہ مارچوطرفی سمجھ محمدؒ یارا
پندھ دوراڈا قصے والا رستہ پکڑ سوارا
971
سیف ملوک شہزادے مورت پھیر ڈٹھی دل لاکے
ہو متفکر کرے دلیلاں حیرانی وِچ جاکے
972
اس مورت دی صورت رباّ ناہیں حد انسانی
یا ایہ کوئی حور بہشتی یا کوئی سِرّ رباّنی
973
اس مورت دا آدم کِتھے ُسندر روپ گُمانی
نور الٰہی ہے آ بیٹھا کایا دھار زنانی
974
دوجی مورت جو مردانویں بیٹھی نال برابر
ہتھ اوہدے تے لال شرابوں دھریا کاسہ نادر
975
ایہ مورت شاہزادے تک کے ہچھی طرح پچھانی
ہے تصویر ایہ شکل میری دی کر تدبیر سیہانی
976
دوجی دا کجھ پتہ نہ لگدا کون کوئی کس دیسوں
مت ہووے شاہزادی کوئی ظن زنانے ویسوں
977
پھر مورت ول ویکھ شہزادے جوش طبع نوں آیا
جھلی گئی نہ جھال حسن دی روح نکلن تے آیا
978
حکمے باجھ نہ نکلن ہوندا جے سو کرے تیاری
پنکھی تنگ پیا وچ پنجرے جیونکر کرے اُڈاری
979
موری تھیں سر باہر کڈھے سارا نِکل نہ سکدا
سِرتوں چم لہے پر بھجن پنجر نال پٹکدا

لفظالی:
دھگانے= زبردستی، اپنے پورے جتن نال۔ چیر= تیز دھار آلے دا زخم ۔ ظلمانہ = ظالماں والا کم۔ وٹاویں= بدلے وچ۔ گھوڑا= خیال دا گھوڑا۔ چرخ=اسمان۔ ہومتفکر= سوچیں ڈُب کے۔ گمانی= مغرور۔ کائیا= کالبد۔ سریردا ڈھانچہ۔ سیہانی= پچھاتی۔ زنانے ویسوں= زنانے لباس وچ۔ جھال نہ جھلی گئی=حسن دی تاب نہ لیاندی گئی۔ حکمے= حکم۔ پنکھی= پنچھی۔ جیونکر= جس طرح۔ پنجر=پنجرے۔ لتھا= آن اتریا۔ڈیرا آ لایا، تھانے ملے= سرکاری چوکیاں تے قبضہ کیتا۔ عقل دے کوٹ مارے= عقل دے قلعے فتح کیتے۔ اوج= سب توں اچیرا درجہ۔ دھارنا= اختیارکرنا۔ ظن = دنیا تے وجود نہ رکھن والی وہمی خیالی صورت ۔ جے= بھانویں ۔ پٹکدا= سرنوں پٹکدا اے۔وسیلہ=ایجنٹ،کاسہ نادر=انوکھا پیالا،