ورقہ 55

980
جاندا جاندا روح بدن وچ رہیا پھیر اٹک کے
ہوش عقل دانائی ڈُبی پے کے پھیر اٹک کے
981
پاڑ پوشاک سُٹی شاہزادے آیا باہر گھر تھیں
ہو بیتاب ڈھٹھا کھا گردی گرمی سوز قہر تھیں
982
ساعت پچھے صاعد جاگے پھیرے نظر چوپھیرے
سُنجی پئی وچھائی دسدی نہیں شزادہ ڈیرے
983
صاعد اوّل خفگی کر کے پھیر جمعیت کردا
چھو کریاں وچ سیر کرن نوں گیا ہووے مت گھردا
984
ایس دلیلوں صاعد تائیں آیا جیؤ ٹکانے
سیج اُتے پر اکھ نہ جُڑ دی رہیا ٹکا دھگانے
985
شاہزادے دے پچھے صاعد ستریں جا نہ سکےّ
رکھ اُڈیک سجن دی بیٹھا دروازے ول تکے
986
یاراں باجھ آرام نہ آوے جچر نہ بہیے جُڑ کے
کُکڑ بانگ دتی نہیں آیا اجے شہزادہ مُڑ کے
987
دھمی رات ہویا خوش ویلا ملیاں بانگاں شہریں
سیف ملوک فلک دے غم تھیں کڈھیاں خونی نہریں
988
قطرے اتھرؤاں دے پُونجھے نال پیراہن نیلے
ماتم سبز پوشاکی ساری دامن رکھے پیلے
989
صاعد اُٹھ سویرے ڈھونڈے کر کے فکر زیادہ
جاں بوہے تھیں باہر آیا ڈٹھوس پیا شہزادہ
990
نہ کجُھ ُسرت سنبھال بدن دی لعل پیا وچ گھٹے
وانگ کپوُر ہویا رنگ پیلا سینہ سرمنہ پھٹے
991
دُھوڑ و دھوڑ ہویا تن سارا لیرولیر پوشاکی
نہ اکھ پٹے پیر ہلائے آئی بہت ہلاکی
992
سینہ سارا لوہو بھریا نہؤاں نال کھروٹھا
غیبوں بجلی پئی قہر دی باغ حُسن دا لُوٹھا
993
عِطریں بِھنے کیس رنگیلے رُلدے اندر مٹی
صاعد دوڑ گیا پھر سرتے ویکھ سرو سر پِٹیّ
994
جھبدے ہتھ نبض پر دھردا نالے ساہ سِہاڑے
جاں اوہ پتہ نہ دیون جا توُس ایہ گل سرے سُراڑے
995
پاڑ پوشاک سٹیندا صاعد رووے گھت کہاواں
گھائل ہویا شہزادہ میرا میں ہن کدھر جاواں
996
ڈائن ڈچھ لیا ازغیبوں چنگا بھلّا سُتّا
کِتھے چلیوں آپ شہزادے دے اسانوں بُتّا
997
رووے تے کرلاوے صاعد ڈھے ڈھے پوے اَپُٹھا
کر فریاد پکارے اُچا مُٹھا یارو مُٹھا
998
صاعد دا سن شور ککارا ہوئی خلق اکٹھی
ویکھ شزادے نوں سبھ بُھجدے جیوں دانے وچ بھٹھیّ

لفظالی:
پے کے پھیر۔۔۔۔۔۔ = اٹک دریا دیاں گھُمن گھیریاںوچ پے کے۔ گردی= چکر، بھوانٹلی۔ سُنجی= خالی، ویہلی، غیر آباد۔ وچھائی= بسترا۔ دل جمعیت کرنا= دل نوں تسلی آونا۔ گھردا= گھر والے پاسے۔ ستریں= پردے والے حرم سرا وچ۔ جُڑ دی= لگدی، نیندنال بند ہوندی۔ٹکا رہیا= نیندر واسطے بند کردا رہیا۔ دھگانے= زبردستی۔ جچر=جناں چر۔ دھمی رات= رات دی فجر ہوئی۔ نیلے= سبز ۔ماتم سبز پوشاکی= ماتم لئی نیلا سبز بانا پایا جاندا اے جے اوہدے اُتے اتھرو ڈگے تاں اتھرواں والی جگہ دا رنگ پیلا ہو جاندا اے۔ کپور= کافور۔ ہلاکی= قتل ،ہلاکت داسماں۔ کھروٹھا= کھرونڈے وجے ہوئے۔ لُوٹھا= جُھلسیا ہویا جاتوس۔۔۔۔۔۔= اوہنے جان لیا پئی ایس گل وچ کوئی بھیت اے۔ ڈچھ لیا= کلیجہ جھس لیا۔ بُتاّ = دھوکھا۔ مُٹھا = دھوکھے نال لٹیا گیا۔ بھُجدے = اندر واندرسڑ دے۔خفگی=گُھٹن۔غم غُصّے دی حالت،