ورقہ 56

999
سارے ہنجو بھر بھر روون جیوں ساون دیاں باراں
دم درود دعائیں کردے صالح لوک ہزاراں
1000
شاہزادہ پھر چالیو نیں روندے یار چوپھیرے
صاعد نے اوہ جا لہایا اوسے اپنے ڈیرے
1001
خدمت گار غلام بے چارے منہ سُکّا تردیدے
رونق رنگ ہویا متغیر آئے درد رسیدے
1002
وانگ یتیماں جا کھلوتے عاصم دی درگاہے
بیٹھا شاہ مصلے اتے کر دا یاد اِلہٰے
1003
صاعد نے شاہزدے والا سارا حال سنایا
عاصم شاہ ہویا سُن گہلا جھَب بیٹے ول آیا
1004
شاہزادے دے سینے اُتے عاصم نے ہتھ دھریا
تھوڑی جان جُثے وچ باقی جاتوس اجے نہ مریا
1005
کون نہیں پھر رووے اوتھے عاصم شاہ جد رویا
مجلس اندر شور ککارا ودھ حسابوں ہویا
1006
ماسی پُھپھی بھیناں مایاں کٹھا ہویا قبیلہ
روون باہاں ٹُک ٹُک کھاون تک تک مندا حیلہ
1007
لکھ ہزار دتے سر صدقے ہوون ردّ بلائیں
آکھ محمد اینھیں گلیں کیونکر ٹلن قضائیں
1008
شاہزادے نوں خبر نہ کوئی سر تے ہون سیاپے
عاصم شاہ حکیم سدائے کیویںمرض سیہاپے
1009
عالم اتے طبیب نجومی رملی کول بہائے
شاہزادے دا حال سناؤ عاصم شاہ فرمائے
1010
اس دے راس ستارے اُتے کیسی گردش آئی
کے کجھ پُوجا لگدی جس تھیں ایہ نحوست جائی
1011
کرن طبیب حکیم تمیزاں ویکھن نبض قرورہ
اربع عناصر وچ نہ گھاٹا دسدا لیکھا پورا
1012
گرمی سردی بادی خشکی نہیں بخار لہودا
ہور کوئی ایہ وانا وگیا کرنا اللہ ہُو دا
1013
پڑھ پڑھ سورۃ جِنّ مزمل عالم بھی دم پاون
گٹ تعویذ بنھن گل ڈولے بتیاں کول دُھکھاون
1014
بھر بھر دارے ہُٹے سارے دُور نہ ہویا سایہ
اس سائے کئی لوک نسائے عشقے سایہئ پایا
1015
مشر برہمن پنڈت پھولن شاستراں تے پوتھی
آکھ محمد عشق کچہری سبھناں دی گل تھوتھی
1016
آئی وار نجومی والی تکے راس ستارے
طالع اندر نظری آئے ظالم روگ ہتیارے
1017
کردا عرض نجومی شاہا ہور نہیں ڈر کوئی
پر اوہ ساعت عشقے والی آن برابر ہوئی

لفطالی:
باراں = بارشاں ۔ جاتوس = اوہنے جان لیا۔ سیہاپے= پچھاتا جاوے۔ نحوست =بدبختی۔ اربعہ عناصر= بندے دی بناوٹ وچ ورتے گئے چار تت۔ اگ، ہوا، پانی مٹی۔ گٹ= منتر پڑھیا دھاگا، مِشر=پتونتے وِدوان تے حکیم برہمناں لئی خطاب۔ لہایا= اتروالیا۔ در در سیدے= دکھیارے۔ گہلا=جھلاّ ' پاگل۔،مندا حیلہ= برا حال۔، سیہاپے =پچھاتا جاوے ۔ راس= (١) آسمانی بُرج(٢) درست ٹھیک۔ پوجا= ہندو مذہب مطابق بلا ٹالن لئی کیتی قربانی صدقہ یا نقد سیوا۔ وانا= بھانا، رب دی مرضی۔ قرورہ= روگی دا پیشاب۔ لیکھا = حساب ۔دارے بھرنا= دائرے فقیراںدے ڈیرے ، خانقاہاں وچ نہ چاہندیاں ہویاں بھی نقد رقم یا دارے والیاں دی منگی کوئی چیز ادا کرنا۔اِلہٰے=اللہ تعالیٰ نُوں،کون نہیں۔۔۔۔۔۔=سب ای روندے سن،تھوتھی=بے مغز۔بے معنی،