ورقہ 57

1018
اگے اوہ گل سفرے والی جیہڑی اساں دسالی
ایہ نشانی پہلی اس دی ٹلدی نہ ہُن ٹالی
1019
لمیّ اجے حیاتی اس دی موتوں ڈرو نہ ذرہ
پر ہن راج کمانا مشکل کرسی سفر مقرّہ
1020
ترے راتیں تے ترے دہاڑے اوویں رہیا شزادہ
ہکو ساہ کھڑاکے لگا نہ کُجھ کمی زیادہ
1021
حالت ویکھ شزادے والی ہر ہِک نوں غم دھاوے
دانشمند علاج دسالن جے کجھ منہ درآوے
1022
کر کے تھکے جتن ہزاراں ہوش نہیں اس پھِردی
ریت سُکی دی کندھ اُسارن ہتھوں جاندی گِردی
1023
عاشق دا جو دارو دسے باجھ ملاپ سجن دے
اوہ سیانا جان ایانا روگ نہ جانے من دے
1024
مندے من دے روگ محمدؒ مندے نہیں دواواں
بید ہووے جے دلبر تاں ای بیدن کھول سناواں
1025
چوتھا روز ہویا تاں صاعد دور کیتے سبھ دردی
کہیوس راتیں خواب ڈٹھی میں چنگی خیر خبر دی
1026
ہک دوگلاں نال شہزادے کرن دیو کھاں اوہلے
سچی خواب کرے رب میری مت ایہ اکھیں کھولے
1027
دور ہویا سبھ کوئی اوتھوں ہِک نہ رہیا نیڑے
صاعد بہہ سرہانے اس دے ہِک کہانی چھیڑے
1028
عاشق تے معشوق کوئی سن سوہنے مرد زنانی
درد فراق ایہناں دے والی کردا گل وہانی
1029
جے میں بھی اس گل ول جاواں ایہ قصہ چھُٹ جاندا
شالہ توڑ چڑھے فرمائش جاندا وقت وہاندا
1030
درد فراق ایہناں دے والی جاں پڑھ آیا پٹی
جاں پھر گل ملن دی آئی شاہزادے اکھ پٹی
1031
موہوں بول کہے صاعد نوں پھرایہ گل سنائیں
صاعد ہور کہانی کردا اوّل آخر تائیں
1032
عاشق تے معشوق ملن دی جس ویلے گل آوے
شہزادہ دل تازہ ہوکے پِھر اوویں فرماوے
1033
صاعد نے ست واری مڑ مڑ تک کے طبع سُکھاندی
عاشق تے معشوق ملن دی نویں نویں گل آندی
1034
خوش آواز زبان رسیلی بہتا علم دانائی
اخفش وانگ بیان کریندا اثر اندر وچ دھائی
1035
ہک حکایت اثرے والی کہنے والا دانا
ختم انداز ہتھوں جد چلے مارے تیر نشانہ
1036
صاعد دے دل درد سجن دا گل کرے دل لاکے
شاہزادے نوں چنگی لگی آکھے پھیر بُلاکے

لفظالی:
دسالی = دسّی، تصوّر دی اکھ نال وکھائی۔ مقررّہ= لازماً یقینا ۔ کھڑا کے لگنا = آخری دماں تے ہونا ، گھورڑو وجنا۔ ہتھوں= سگوں ۔ دوا نہیں مندے=دوا دا اثر قبول نہیں کردے۔بید= طبیب۔ ویدن= روگ ، مرض۔ مت= شاید۔ وہانی= بیتی گزری۔ سُکھاندی= طبع لئی موافق ، خوش آئند۔۔۔۔۔۔۔۔۔۔۔۔۔ شالہ= اللہ چاہے ان شاء اللہ۔ پٹی= سبق دی سطر 'سبق ۔ اخفش= ٹ ک شخصیتاں۔ ختم انداز = دوجے لوکاںدے ناکام ہووون تے آخری کامیاب تیر انداز ختم ( عربی) بمعنی انگوٹھی، انگوٹھی جنی گولائی وچوں تیر لنگھاون والا ماہر تیر انداز۔