ورقہ 10

161
آل نبی اولاد علی دی سیرت شکل ایہناں دی
نام لیاں لکھ پاپ نہ رہندے میل اندر دی جاندی
162
سے برساں دے موئے جوائے سُکے نیر وگائے
کھُتھے روح فرشتے ہتھوں لِکھے لیکھ مٹائے
163
غوثاں قطباں دے سرمیراں قدم مبارک دھریا
جو دربار ایہناں دے آیا خالی بھانڈا بھریا
164
نبیاں تے جد اوکڑ آئی روح میراں دا پُہتا
مشکل حل کرائی ہر دی قرب شاہاں دا بُہتا
165
اس محبوب الٰہی جیسا جگ پر سخی نہ کوئی
مُشت نمونہ سُن خرواروں ہکدن کیسی ہوئی
166
ڈیگر ویلے ہکس مریدے کیتی عرض ضروروں
یا حضرت اج کوئی سخاوت ڈٹھی نہیں حضوروں
167
باطن اندر کیتی سایاں سانوں نظر نہ آئی
یا کوئی ہور اسرار اجیہا جس دیہاڑ لنگھائی
168
حضرت نے فرمایا شخصا جے لکھ باطن کیتی
لیکن تساں نہ ڈٹھی کوئی جو بیتی سو بیتی
169
ظاہر بھی کجھ دساں تینوں پلک نہ جاندا خالی
ایہو جیہی ہمیش سخاوت کھڑدے روز سوالی
170
ست ویہاں کوئی عاصی مجرم چُن چُن بُرے لیاؤ
نظر اساڈی اگے رکھو ساعت ڈِھّل نہ لاؤ
171
خدمت گاراں پکڑ لیاندے اوگنہار نکارے
میراں نظر کرم دی کیتی غوث بنائے سارے
172
ہک کوئی ولی اللہ دا ہویا رد کسے تقصیروں
چور اُچکاّ تے منہ کالا رب بنایا پیروں
173
جت ول جاوے نکےّ وڈے لوگ سبھو دُرکارن
ایہہ مردود الٰہی سندا آیا ہے کس کارن؟
174
منگیا خیر نہ پیندا کدھروں نہ مِلدا گھُٹ پانی
بھُکھا تے ترہایا وتدا پکڑی چال نمانی
175
ترے سے سٹھ ولی دے قدمیں لگا واروواری
اوہ تقصیر معاف نہ ہوئی دن دن ودھ قہاری
176
صاف جواب ولیّاں دتّا توں مردود جنابی
جے کوئی کرے شفاعت تیری اس دے باب خرابی
177
اوڑک ہکس ولی نے کہیا جا بغداد سُہاوے
اوہ میراں محبوب خدا دا مت تینوں بخشاوے
178
منہ کالا کر گیا نمانا حضرت دی درگاہے
حق اوہدے وچ رحمت منگی میراں شاہنشاہے
179
ہویا حکم جنابوں میراں نہ کر اس دی یاری
جو اُپرالا اس دا کرسی اس دے باب خواری

لفظالی:
کُھتھے = کھوہ لیاندے ، اوکڑ = سختی۔ مصیبت ،قرب = ڈھوئی۔ رسائی ۔ مشت نمونہ = ونگی دی مٹھ ، خرواراں = بوہل وچوں ۔سایاں = مالکاں۔ آپ جناب نے ۔پلک = اکھ جھمکن وچ لگاسماں ۔ساعت = گھڑی ،پیروں = پیرتوں ۔ بزرگ توں ،سندا = دا ۔کارن = وجہ ۔وتدا = پھردا ۔جنابی = جناب دا ۔باب = بابت۔ بارے ۔سُہاوے = سوہنے، اپُرالا = امدادی جتن ۔ اُپاء ۔ ضروروں= کسے مجبوری پاروں ، قدمیں لگا= پیراں تے ڈگ کے معافی منگی، غوثاں قطباں دے سر= ٹ ک قصیدہ غوثیہ دا عربی مصرع و اقدامی علیٰ عنق الرجالی،