ورقہ 58

1037
کہے شہزادہ صاعد تائیں توں بھنجال غماں دا
مڑایہ گل سُنا اساہیں میں ول ہوندا جاندا
1038
کتنی وار کہانی کیتی تاں اس سُرت سنبھالی
گلّاں کرن لگا اُٹھ بیٹھا ہوئی ذرہ خوشحالی
1039
وَلّ ہویا تاں صاعد کہیا قسم تینوں اس رب دی
جس نے خلقت پیدا کیتی روزی لائی سبھ دی
1040
بھیت دلے دا دسیں مینوں غم تیرے تھیں سٹردا
جس نوں یار بنائیے آپوں پھر اس تھیں کے پڑدا
1041
سیف ملوک کہیا میں تینوں بیدن کھول سناندا
پرجے ہور کسے دے اگے ہر گز کریں نہ واندا
1042
صاعد کہیا سن شزادے کے طاقت میں بندے
بھیت شاہاں دا جو کوئی پھولے حال ہوون اُس مندے
1043
کہے شہزادہ حال حقیقت سُن صاعد دل جانی
باپ میرے جو تحفہ گھلیا شاہ مہرے سُلیمانی
1044
راتیں جاگ لدھی اُٹھ ڈِٹھی تیر کلیجے لگا
جھگا پاڑ ڈھٹھا کھا گردی بُھل گیا اُسرگا
1045
ہک صورت دی مورت اوتھے لکھی نظری آئی
حکمت پاک خداوند والی کرکے نقش سُہائی
1046
آدم دی کے قدرت سرجے ایسے روپ نیارے
قدرت دے ہتھ نال بنائی خالق اپن اپارے
1047
جگر کباب کرے تاب اس دا عقل دماغوں سڑدا
ہک ہک وال اس مورت والا سو سو دل کھس کھڑدا
1048
مائل کر دی شکل شمائل گھائل کرے جواناں
زینت زیب شہانہ سارا دِسے رُوپ زنانہ
1049
ویکھن سات ہویا دل بِریاں لگا داغ کلیجے
لُوںلُوں لنب بلے سڑ اُٹھے ماس ہڈی رَت بھیجے
1050
دوجی صورت ہے مردانویں اس دے کول برابر
اوہ ہنوار میرے دی مورت کیتی نقش اکابر
1051
اوہ شاہ مہرے موہرے ڈٹھے مہریں آندی گرمی
دوجی وار تکے تاں عشقے کیتی آن بے شرمی
1052
کہے شہزادہ صاعد تائیں توں بھی تک اوہ مورت
مت مورت دی صورت لبھے کر بھائی کوئی صورت
1053
جاں جاں اس مورت دی صورت مینوں نظر نہ آوے
صاعد بھائی صبر نہ دل وچ مرساں ایسے ہاوے
1054
صاعد کہیا باپ تیرے نوں دسّاں ایہہ کہانی
اس نوں مت ہووے کجھ معلم دَسےّ پتہ نشانی
1055
سیف ملوک کہیا میں تینوں ورتی گل سُنائی
جے کجھ عقل تیرے وچ آوے کرتوں اگوں بھائی

لفظالی:
بھنجال = بھائیوال، حصہ دار۔ اساہیں = اسانوں۔ ول= ٹھیک۔ خوشحالی= چنگی حالت Better mood۔ بیدن= روگ ، مرض ۔واندا= ظاہر ننگا۔،جاگ لدھی= جاگ آئی، اکھ کُھلی۔ گردی= چکر بھوانٹلی۔ اُسرگا= محل ماڑیاں ۔اُسارے۔ُٖلِکھی=کھچی drawn ۔ سُہائی = سجائی ۔ سِرجے=تخلیق کرے۔ تاب= تاپ سیک۔ اپن اپارے= (اپر مپرا)بے مثل ، بے روایت تے ان ہونے کم کرن والا۔ کھس کھڑدا= کھوہ کے لے جاندا، ویکھن سات =ویکھدیاں ای۔، ہنوار=ہم زاد۔ موہرے=پہلے ،معلم ( مع لم) =معلوم۔، شمائل= جمع شمیلہ ،چنگی خو، قدرتی گُن اچھیاں خصلتاں ۔ مت= شاید۔بھیجے=مغز،بِریاں=بھُجا ہویا،