ورقہ 60

1075
کوشش بے شماری کرساں گھلاں فوج چوپھیرا
مت مورت دی صورت لبھے ہووے مطلب تیرا
1076
پرتوں اپنا آپ سنبھالیں ہوش رکھیں وچ جائی
کد شزادے ناتا دیندے جے ناؤں پوے سودائی
1077
سیف ملوک کہے سن بابل قسم مینوں اس رب دی
ہوش عقل جیو جان نہ رہسی جے صورت نہیں لبھدی
1078
دھڑکے جان میری وچ جُثّے تکے ساعت گھڑیاں
عاصم حال بیٹے دا تک کے ہنجوں جھولے جھڑیاں
1079
اوہ رخسارے ارغوانی ہوئے کیسر پیلے
نموں جھان بیماری مارے نرگس نین رنگیلے
1080
دھوڑاں پے سکایا خشکی سُنبل ہریاں والاں
بدر منیر آہا جو چہرہ دِسے مثل ہلالاں
1081
حالوں پیا بے حال شزادہ باغ حسن کملایا
اُجڑ گئی بہار پھلاں دی پتیاں رنگ وٹایا
1082
لتھے پیئے بوہٹے چھاپاں کنگن پوہنچی والے
کلغی توڑے تاج اتارے زیور شاہاں والے
1083
عاصم شاہ تک حال پُتر دا اگ لگی بھڑکارے
اتھرواں نے ساون لایا ٹھنڈیاں آہیں مارے
1084
بیٹے نوں لے جھولے بیٹھا گھُٹ گھُٹ سینے لائی
آکھے سُن فرزندا توں ہیں اکھیں دی رُشنائی
1085
عمر گئی غمناکی اندر کر کر رب دی سیوا
آئی باغ بہار خوشی دی لدھوں مٹھا میوہ
1086
کیسی واء غضب دی جھُلی ڈالی میوے والی
دھرتی نال پٹاک گوائی آئی خستہ حالی
1087
دوہاں جہاناں اندر آہی تیری خوشی گھنیری
تک تک منہ تیرا میں جیواں سُکھ حیاتی میری
1088
تینوں کے ہویا فرزندا داغ لگائیوئی جانی
سدا بہار گلاب حسن دا تیری نویں جوانی
1089
کس ڈائن نے ڈچھ لگایا یا کس نظر لگائی
دے جہان دعائیں تینوں پھڑیوںکس بدُعائی
1090
اے سودائی بیٹا میرا نہ کر بے قراری
آپ بی سڑدا میں بھی ساڑیں چھڈ اس کچی کاری
1091
نہ تُدھ کیتا ظلم کسے تے نہ کوئی خون کرایا
کیتا پاپ میرا کوئی بھارا تینوں دینا آیا
1092
بھل گیاں سبھ کاراں تینوں یا دنہ رہیاں بانکاں
ایسا غم نہ ڈٹھا ہوسی اگلیاں غمناکاں
1093
دشمن تیرے طعنے دیسن کرسن بہت ملامت
دوزخ سینے میرے تپسی سجناں ہوگ قیامت

لفظالی:
جائی= تھاں ٹکانے سر۔ ارغوانی= لال سرخ یا گلابی۔ بدرمنیر= چودھویں دا چن۔ والے= کناّں دے وڈے رِنگ۔ توڑا= پگ دے اُتلے ول اُتے لپیٹی جاون والی سونے دی زنجیری۔ ڈچھ لگایا= کلیجہ جھسیا، دینا آیا= بدلہ پار رہیا ایں۔ کیسر پیلے= کیسر رنگے زرد ۔ ہلال =پہلے دن دا چن جو کمزور پتلا ہوندا اے۔ کلغی= متھے تے آئی پگ دی چوٹی اُتے ٹکیا ہیرے جڑیا گہنا۔ بوہٹے = ڈولے تے بنھن والا اک مرد انواںگہنا۔ سیوا =بندگی، نوکری، عبادت، بھڑکارے= بھڑکدے لنبو۔ لدھوں = توں ملیا ایں ۔ پھڑیوں =سزا پارہیا ایں ۔ کچی کاری= بے فائدہ کم ، عارضی جیہا جذباتی کم۔، بانکاں=شوخےاں۔ شرارتاں ۔ پُٹھے ڈِنگے کم ۔ ملامت = بھنڈنی، نندیا۔جھولے=جھول
وچ،جھول=جھولی،