ورقہ 61

1094
نہ کوئی صورت والا ملیا یاری کسے نہ لائی
کہہ توں کس دے پچھے بیٹا اپنی آب گوائی
1095
بیٹھ نچلا کر خوشحالی چھڈ ایہ جھورا من دا
ٹھنڈا لوہا کُٹیاں بیٹا کوئی ہتھیار نہ بندا
1096
کر کجھ صبر تحمل بیٹا چھڈ ایہ کھہڑاکیویں
خبر نہیں کوئی صورت ہوسی یا ایہ مورت اینویں
1097
لگا روگ اَوَلاّ تینوں دارو نال نہ جاندا
نالے دل تیرے نوں کھا دُس جگر میرا بھی کھاندا
1098
لاہ امید نہ ہُسٹر جائیں کرن دئیں کوئی چارہ
مت رب پاک سبب بنائے میلے یارپیارا
1099
نا امیدی وچ امیداں رکھیں آس کرم دی
بہو مجلس داناواں والی لوڑ کریں اس کم دی
1100
دولت مال نہ سٹیں بیٹا ہوئیں نہ ایویں بیدل
دولت والے نوں گھر اندر مطلب ہوندے حاصل
1101
دُنیا دِی ہر مشکل تائیں دولت کرے آسانی
ڈاہڈے قفل اُتارے ایہ بھی کنجی ہے رحمانی
1102
دولت تھیں مکھ موڑ نہ بیٹا چھوڑ نہیں ایہ شاہی
دن دن لوڑ کراں گا میں بھی دیگ مراد الٰہی
1103
صبر کریں تاں اجر ملے گا آئی خبر کتابوں
صبر اُتارے قفل محمد ہر ہر مشکل بابوں

سیف الملوک دا پیو نوں جواب

1104
سیف ملوک جواب پیو نوں دیندا نال حلیمی
سُن بابل سلطان ملک دا توں ہیں آد قدیمی
1105
جے کوئی شاہ زمیں دے اکثر تیرے کول سلامی
تاجاں تختاں والے تیری کردے آن غلامی
1106
درتیرا ہے سجدے لائق قبلے وانگن مینوں
تیری جان حیاتی میری چِر رکھے رب تینوں
1107
شالہ ِسر میرے پر دائم رہے تساڈا سایہ
تیرے پچھے جیون نالوں مرنا بہتر آیا
1108
جے کجھ تساں نصیحت دتی بھلی میرے حق ساری
پھٹ میرے تے پٹی بدھی مرہم لائیو کاری
1109
پر کجھ وسّ نہ میرے بابل کے کراں منہ کالا
ہوندے قابو کد کوئی چھڈدا دانش، عقل، سنبھالا
1110
جے لکھ عقل تمیزاں کرئیے اوڑک ہونی ہونا
ہسدیاں کھیڈدیاں کس بھاوے بیٹھ غماں وچ رونا

لفظالی:
آب= عزت ، آبرو، چہرے دی رونق۔ چِر رکھے= لمیّ حیاتی دیوی، مدتاں تائیں قائم رکھےّ۔ نچلا= پر سکون ، چپ چاپ، شانت ۔ کر خوشحالی= چنگا موڈ بنا ۔ کھہڑا= رستہ کسے کم دا جتن ۔ دارو= دوا ۔ کھادُس= ایہنے کھا لیا اے۔ہُسڑ جانا= اداس ہو ونا۔ چارہ= علاج جتن ۔ مت= شاید۔ ڈاہڈے=سخت۔ دیگ = دے گا۔ کتابوں = قرآن مجید وچوں ٹ ک۔ زمر:١٠ ۔ بابوں= دروازے دے۔ آد= آدی ، شروع توں ای چلیا آرہیا سلطان ، خاندانی۔ شالہ= اللہ انج چاہے ۔کاری= کار آمد ، شفا دین والی ۔ سبنھالا= ہوش شعور ۔ قابو= وس اختیار۔،مرنا بہتر آیا= اخلاق مان مریادہ جیون فلاسفی سیتی مرن دا حکم اے جو بہتر اے۔کُنجی ہے رحمانی=ٹ ک ق م الانعام:59