ورقہ 62

1111
قید کیتا دل میرا مُورت پاکے سخت زنجیراں
ایہو قسمت سی تقدیروں کرئیے کے تدبیراں
1112
ہُن ایہ قید نہ میں تھیں چھُٹدی نہ ایہ بھار اتردا
وس نہیں کجھ چلدا بابل چھڈ خیال پُتر دا
1113
میں ہن ہو چکا سودائی جانی تھیں ہتھ دھوتے
گھر درنوں ہن چھڈیا لوڑاں چایا پُٹھی موتے
1114
اندر عشق جلاندا جیوں کر آتش سُکیاں پتاں
مت نہیں دل میرا منّدا مت ہن دیہو متاں
1115
تسیں کراؤ توبہ عشقوں دے دے سِکھاں متیں
دل میرا نہیں توبہ کردا کہے اگیرے وتیں
1116
جاں جاں اس مورت دی صورت مینوں نہ ہتھ لگے
نہ میں شاہی تخت سنبھالاں نہ کوئی ہور اُسرگے
1117
میرے تھیں ہتھ دھوتوں بابل میں اج خاص دیوانہ
جے صورت ہتھ آئی تاں پھر کرساں راج شہانہ
1118
سُن عذاب جواب پتر دا عاصم شاہ دل ڈریا
ہو حیران بیٹھا متفکر زانو تے سردھریا
1119
اندر اگ اندیشے والی بل بل دِئے النبے
باہر ہنجوں مینہ وساوے سرد آہیں تھیں کنبے
1120
ہائے افسوس میں آپوں بھانبڑ پاکے تیل مچا یا
کسے وزیر صلاح نہ دتی جاں تقصیرے چایا
1121
آپوں ٹھوکر لائی شیشے بھج ہویا ہُن ٹکڑے
کیونکر پاج لگے ہن ثابت جے سو لائےے اُکھڑے

باپ دا مُہلت منگنا تے شاہ مُہریاں بابت دسنا

1122
سڑے نصیب اساڈے بیٹا دوس نہیں کُجھ تیں نوں
لوڑکراں ہن صورت والی مہلت دے کُجھ میں نوں
1123
کرساں لشکر فوج وزیراں ہر ہر ملک روانے
ڈھونڈن گے اس صورت تائیں گھر گھر بادشہانے
1124
جتھے سوہنی صورت ہوسی کرسن نقش مصوّر
مت کوئی اس دی مورت لبھے آوے تدھ تصور
1125
میں جاتا کجھ ایویں کیویں ہوگ خیال شہزادے
متیں لگ وسار چھڈیگا جاں دن ہوئے زیادے
1126
پرہن خوب طرح کر سمجھے گنڈھ پئی ایہ پکی
دسی خبر نجومی والی ساری اکھیں تکی
1127
جیویں کہیا اس نے اگے سارا ہویا تیویں
ایہ بھی اونویں ہوون لگا کہیا نجومی جیویں

لفظالی:
جانی= جان۔ چایا پُٹھی موتے= مینوں ضرور کوئی پٹھی حادثاتی موت آوے گی۔ پاج = ٹانکا گانڈھا۔ ایویں کیویں = معمولی جیہا۔ جیویں = جس طرحاں۔ چھڈیا لوڑاں = چھڈناں چاہنا آں۔ وتیں = جائیں ۔ زانو= گوڈے ۔ اُسرگے= محل ماڑیاں، اوساری دے کم۔ سِکھاں= نصیحتاں، سکھشا، تعلیم ہدایت۔ متفکر= سوچیں ڈُباّ ۔ اندیشے= چنتا فکر۔'نقش مصور کرسن = پورٹریٹ بنا دیون گے۔ مت= شاید۔ وسارنا= بھُلا دینا۔ تیویں = اوسے طرحاں ۔ اونویں = اوسے طرحاں۔اُکھڑا=غیر یقینی۔بے اعتبارا،