ورقہ 63

1128
گلیں ول نہیں تدھ ہونا نہ صبر کر بہنا
کاہنوں بھیت چھپانواں تیں تھیں لازم ہے ہن کہنا
1129
ایہ شاہ مہرے صورت والے جیوں ہتھ لگے سانوں
اوہ حقیقت ساری بیٹا دساں کھول زبانوں
1130
باپ میرا سلطان ملک دا شاہ صفوان بہادر
ہِک دن خوشےاں اندر بیٹھا بیٹھے کول اکابر
1131
میں بھی کول پیو دے آہا بیٹھا نال ہشیاری
اچن چیت ہنیری آئی لنگھی پا غباری
1132
بعد اس تھیں دو شخص آئے سن قد وڈے رنگ کالے
چھل پیندا تک شکل انہاندی بہت ڈراون والے
1133
باپ میرے ول ہو سلامی چم زمین ادب دی
کہن نصیب تساڈا ہووے شاہی عجم عرب دی
1134
بعد دعائیں تھیں پھر کہندے عرض احوال تمامی
بھیجے شاہ سلیمان پیغمبر آئے اسی سلامی
1135
تُدھ کارن اُس تحفے بھیجے اے صفوان بہادر
ایہ تک اسیں لیائے بغچہ آن کیتو نیں حاضر
1136
شاہے حکم دتا تاں بغچہ ڈٹھا کھول وزیراں
کپڑ تھان عجائب نکلے نالے ایہ تصویراں
1137
مجلس چُپ لگی تک تحفہ بہت عجائب چیزاں
کجھ بیان نہ آوے کسے کر کر رہے تمیزاں
1138
ایہ جامے شاہ مہرے ڈٹھے جاں حضرت صفوانے
کہن لگا ایہ کسب جنہاندے دھن اوہ کسبی دانے
1139
شاہ مہرے نورانی تک کے آئی شاہ حیرانی
جنہاں پریاں تحفہ آندا پُچھدا اُنہاں نشانی
1140
ایہ شاہ مہرے صورت زُہرے دسو کتھوں آئے
کس کس صورت دی ہے مورت کس اُستاد بنائے
1141
ایسی صورت دھرتی اتے سُجُھّی نہیں اسانوں
نبی سلیماں دسو یارو آندی کس جہانوں
1142
سبھ حقیقت دسی اوہناں ہک دن شاہ سلیماں
بیٹھا مجلس خوب سُہاکے رونق گہماں گہماں
1143
جو کجھ تابع اس دی اندر آدم جن حیواناں
ہر قومے دے افسر حاضر مجلس بھری دیواناں
1144
بیٹھے پڑھدے سُندے قصّہ مہتر یوسف والا
سُن سُن حسن اوہدے دیاں گلاں گِھندا شاہ اُجالا
1145
مہتر یوسف جیسی صورت اندر جن انساناں
ہور کوئی بھی ہوسی یارو پُچھدا شاہ دیواں ناں
1146
سبھناں عرض گزاری حضرت کد ہوسی کوئی ایسا
اگے کوئی نہ ہویا سوہنا مہتر یوسف جیسا

لفظالی:
گلیں = گلان باتاں نال۔ ول ہونا= صحْت مند ہونا ۔ عجم = عرب تون علاوہ باقی سارے ملک ایران وغیرہ۔ بغچہ= گنڈھڑی۔ تمیئزاں = پچھاناں ۔ سُہاکے= سجاکے۔ دیواناں= وس اختیار والے درباری محکمیاں دے سیکریٹری۔ شاہ دیواں ناں= دیواں جناں دا بادشاہ۔ اکابر= دربار دے وڈے امیر تے سردار ۔ اچن چیت= اچانک ۔ چھَل پینا= ڈراونی شکل پاروں جن بھوت دا بھلیکھا پینا۔ سلامی = سلام کرن لئی ۔ایہہ تک = ہُنے ویکھو۔ کپڑتھان=کپڑیاں دے تھان۔ زُہرہ= ٹ ک تفصیلاں۔ گِھندا شاہ اُجالا= بادشاہ روشنی حاصل کر دا سی ۔ کد ہوسی = نہیں ہووے گا۔