ورقہ 64

1147
ہک پری سی نام عجائز دانشمند اکابر
سبھناں علماں اندر عالم سبھ ہنراں وچ نادر
1148
کسباں علماں عقلاں ولوں ثانی اس دا ناہا
اس نے عرض نبی ول کیتی سن توں شاہنشاہا
1149
جو زبور داؤد نبی دی میں پڑھیا اس اندر
نسل تیری تھیں لڑکی ہوسی روشن وانگوں چندر
1150
سوہنے نقش تے حسن بیحدا خوبی بہت لطافت
رنگ نورانی انگ سُہیلا بے حساب ملاحت
1151
مہتر یوسف نال برابر ہوسی حسن اداؤں
جے کجھ لکھیا اوہو ہوسی ناہیں جھوٹھ خداؤں
1152
روپ انوپ اوہدے دیاں گلاں مُلکاں اندر جاسن
سارے سوہنے اوس وقت دے اُس درسیس نواسن
1153
سچ کلام الٰہی اندر ہوسی یوسف ثانی
نام بدیع الجمال کہاسی قسموں پری زنانی
1154
ہوگ بیٹی شاہپال شاہے دی اوہ شاہ رخ دا بیٹا
نبی سلیماں نوں عجائز دسیا تانا پیٹا
1155
ایہ جو دیس تساڈا حضرت شارستان سنہری
اس وچ باغ ارم ہک لاسی اوس مکان کچہری
1156
جوبن اس دے دی دُھم پیسی آدم تیک زیادہ
آدمیاں دی قومے وچوں سیف ملوک شزادہ
1157
شکل اوہدی دا عاشق ہوکے دیس وطن چھڈ جائیں
گاہ کوہ قاف سمندر باریں جا ملسی اس تائیں
1158
سیف ملوک عاصم دا بیٹا عاصم پُت صفوانے
تخت مصر دے والی ہوسن ہر ہک شاہ زمانے
1159
قدرت صفت خداوند والی جاں ایہ سنی پیغمبر
کہندا اوس عجائز تائیں توں ہیں بہت اکابر
1160
حسن بدیع الجمال پری دا نالے روپ شہزادے
جامے تے کر نقش دسالیں راضی ہوواں زیادے
1161
ہو بہو اتاریں مورت جیوںجیوں شکل اوہناں دی
والے جتنا فرق نہ آوے دیہی وچ دوہاں دی
1162
بیٹھ عجائز کر بسم اللہ پکڑی قلم ہنر دی
خاصہ رکھ دھیان عقل دا کر کے لوڑ اندر دی
1163
جو جو صفت کتابوں ڈِٹھی ہر نقشوں ہر والوں
ہو بہو اُتاری مورت فرق نہ صورت نالوں
1164
جان اس نبی سلیماں اگے ایہ شاہ مُہرے تارے
ویکھ ہویا حیران پیغمبر صورت اپن اپارے
1165
مہرے تک کے مہریں آیا کہیوس صورت گر نُوں
شابش آفرین ہزاراں تیری عقل ہنر نوں

لفظالی:
اکابر = وڈیاں سرداراں وچوں۔ نادر= نرالی، بے مثال۔ ناہا= نہ آہا۔ چندر= چَن۔ لطافت = نرمی نزاکت ملوکی۔ انگ سہیلا =خوشبودار بدن ۔ ملاحت= سانولے گندمی بادامی رنگاں دا روپ۔ ہوگ= ہووے گی۔ تانا پیٹا= پوری تفصیل ۔ روپ انوپ = بے نظیر ، بے مثال حُسن۔ جائیں=جگہیں ، تھانواں ۔ جامے= کپڑے ۔ دسالیں = دکھائیں ۔ والے = وال ۔ لوڑاندردی۔۔۔۔۔۔ = ضمیر دی ضرورت پوری کر کے۔ تارے=پیش کیتے، ادا کیتے ۔اپن اپارے= ٹ ک اپر مپرا۔ روایت توں ہٹ کے ۔ کہیوس= اوہنے آکھیا۔ صورت گر= مصور، پورٹریٹ بناون والا۔