ورقہ 65

1166
قاضی تے امراء بنائیوس پریاں وچ عجائز
حکم اوہدا سبھ سر پر منن موڑن کسے نہ جائز
1167
اوس ویلے ایہ تحفے دے کے کیتوس اسیں روانے
شکر کیتا جے آن پچائے تیرے دولت خانے
1168
باپ میرے بی تحفے بہتے جو کمیاب نہ لبھدے
گھلے نبی سلیماںؑ تائیں ہتھ اوہناں دے جھبدے
1169
شاہ صفوانے نال محبت سانبھی رکھے دونویں
اس تھیں پچھے مینوں لبھے میں بھی رکھے اونویں
1170
ایہ میراث پیو دی آہی مینوں بہت پیاری
اس ویلے کوئی اس تھیں چنگی ناہیں چیز نیاری
1171
دنیا اُتّے تیرے جیہا ناہا کوئی پیارا
تاں ایہ تحفے تینوں گھلے ہتھیں کیتا کارا
1172
اپنے بھانے کر بخشیشاں کیتی خوشی زیادہ
اوس خوشی دی جائے ہویا درداں در کشادہ
1173
جے میں جاناں ایس خوشی دے بنسن غم ہزاراں
ایہ شاہ مہرے وچ سمندر ڈوباں سنے پٹاراں
1174
ہن کجھ وس نہ میرا تیرا ہو گیا جس ہونا
پُتر باپ دوہاں نوں بیٹا بھا پیا نِت رونا
1175
اوہ دوئے شاہ گئے جہانوں تاں کم مشکل آیا
سیف ملوک اگے ایہ قصہ عاصم شاہ سنایا
1176
ایہ حقیقت سُن شزادہ کردا شکر بے چارہ
اسے دنیا اُتے وسدا کدھرے یار پیارا
1177
دیس بدیسی پھردا رہساں جاں تک ہوگ حیاتی
مت سبب بناسی مولیٰ لبھسی وست کھڑاتی
1178
اس گلوں کجھ ہوئی تسلی نالے عاصم شاہے
فوجاں کڈھ تیاری کیتی دتا حکم سپاہے
1179
ست ہزار جوان بہادر جنگی لاٹ مریلے
دھپا کھاء جنہاں دا نسن خونی ہاتھی پیلے
1180
تھکن نہیں لڑائی کر دے دم دم ہون سوائے
حملہ ویکھ اوہناں دا باروں شیر ببر نس جائے
1181
سبھ قواعد جنگ کرن دے جانن ہر ہتھیاروں
زرہ خود فولادی لاون لاہون ڈر تلواروں
1182
کر کر بھیڑ لڑائیاں اگے آہی اوہناں دلیری
سن کے خبر لڑائی والی کر دے خوشی ودھیری
1183
موتوں خوف نہ کھاون ذرہ بہت دلیر دلاں دے
وچ میدان لڑائی والے پاؤں سیر ہو جاندے
1184
نیزہ پھیرن دشمن گھیرن دھڑتوں سیس ادھیڑن
دشمن کون فلک دے ہندو ٹوپی سر توں گیرن

لفظالی:
قاضی= منصف۔ امرائ=سرداراں وچوں۔ سر پر= لازمی، یقینا۔ بی = بھی۔ نیاری= عجیب ۔ میراث= ورثے وچوں ملی دولت۔ کارا= کوئی خاص کم، طنزًا بھیڑا کم ۔ بھانے= خیال وچ۔ جائے ہویا۔۔۔۔۔۔ = خوشی دی تھاں تے درداں دا دروازہ کھُل گیا۔ بھاپیا= بھاگاں وچ لکھیا گیا اے۔ سپاہے=سپاہ نوں ۔ جنگی لاٹ = جرنیل ۔ سوائے= پہلی حالت توں بہت چنگے۔ خود= لوہے دا ہیلمٹ۔ بھیڑ = مقابلے۔ زرہ= لوہے دیاں تاراں دا بنیا لباس جو چھاتی کنڈ دے وار بچاندا اے۔ پٹاراں= پٹاریاں۔ وس= اختیار۔ وست کھڑاتی= گم ہوئی شے۔ پیلے= پیلن والے، پھہ دین والے دھک کے پچھاںیا کھچ کے اگانہہ کرن والے۔ قواعد= قاعدے طور طریقے۔ فلک دے ہندو= زُحل ستارہ جیہڑا کالا تے منحوس ہوندا اے تے سر توں تاج ڈیگ دیندا اے۔