ورقہ 66

1185
ایسے مرد زور آور چُن کے کیتے چاء روانے
مانی تے ارژنگ برابر ہور مصور دانے
1186
لکھ دتے کر عہد اوہناں نوںملک معاش جگیراں
دیساں جیکر آنو مطلب خوشی ہووے دلگیراں
1187
ہر ہر طرف روانہ کیتے کہیا ذرا نہ سنگو
خرچ کرو کھڑ نال خزانے ہور گھلاں جو منگو
1188
ہر ہر ملک آدم دے اندر ویکھ آؤ سبھ شہراں
جس جائے کوئی سوہنا ہووے وچ حسن دیاں لہراں
1189
جے کوئی ہووے شہزادی سوہنی ہر گز نظرنہ آوے
صورت اس دی لکھو ساری جیوں محرم دس پاوے
1190
جو مشہور ہووے وچ شہراں آفت حسن اداؤں
فتنہ دوز جگت دی ظالم چِت کھڑے ہر داؤں
1191
عشوے ناز فریب زنانے کر کے جیو بُھلائے
ٹور لٹکدی اکھ مٹکدی گلیں دل پرچائے
1192
ایسی صورت دی جس پاسے دس پوے اس لوڑو
کنیں سن کے اکھیں تک کے مورت لکھو نہ چھوڑو
1193
جے کوئی خبر پری دی آنے یا اس باغ ارم دی
دس اُٹھ سونے دے بھردیواں لوڑ نہ رہُس درم دی
1194
کرساں خاص وزیراں وچوں خلعت سرتے دھرساں
ہور ولایئت منگے جیہڑی دیساں عذر نہ کرساں
1195
لشکریاں دل تازہ ہویا عہد لکھائے شاہی
زر دا طمع بُرا اس اُتے دیون سر سپاہی
1196
رخصت ہوئی امیراں تائیں ملکو ملکی چلّے
کوئی مدینہ پاکے کوئی حضرت مکے گھلےّ
1197
کوئی عدن نوں کوئی عرب نوں کوئی رومے کوئی شامے
بعضے اسکندریہ جا لوڑن بعضے یمن مقامے
1198
بعضے ہند جنوبی پھر دے دہلی شہر نادوناں
ہکناں وچ پنجاب زمیں دے سبھنیں شہر یں بھونا
1199
کوئی مشرق کوئی مغرب دکھن کوئی گُٹھ شمالی
کوئی لوڑے کشمیرے کوئی کنڈھی جموں والی
1200
کوئی جزیرے ٹاپوں لوڑن کوئی تبتاں لدّاخاں
سمر قند سے چند اجیہے لوڑ رہے کے آکھاں
1201
ہک محیط سواحل بھالن ہک قلزم افرنجے
ہک تاتار ہک گئے عراقے ہک مبارک گنجے
1202
ہک کابل قندھار خراساں ہک ہرات بخارے
ہک نندن ہک قیر فرنگے ہک گئے زنگبارے
1203
کجھ ُروسے کجھ چین مچینے کجھ آئے ترکاں نوں
کوئی نقش چگل دے تکن کجھ لوڑن کنعانوں

لفظالی:
مانی تے ارژنگ= ٹ ک تفصیلاں۔ مِلک= ملکیت کیتی گئی زمین یا شے۔ معاش جگیر= اجیہی جگیر جیہدی آمدنی توں کئی نسلاں بہ کے کھاون ۔ آنو=لیاؤ۔ لہراں= ترنگ ، موجاں۔ محرم = بھیتی۔چِت کھڑے= دل کڈھ لے جاوے۔ جیوبھلاوے= دل فریبی کرے۔ فتنہ دوز= فتنہ فساد نہ مکن دین والی نت دے پواڑے پان والی۔ لوڑو= لبھو ۔ لِکھو= کھچوdrawکرو۔ آنے= لیاوے ۔ ولایت= صوبے دی حکومت ، کسے ریاست دا راج ۔ نادوناں=شہر ندون ول، بھارت دے ضلع کانگڑہ تحصیل ہمیر پور تھانہ جوالا جی، کٹورے راجپوتاں دی راجدھانی جیہڑی کانگڑے توں دکھن چڑھدے ول 20میل دور دریا کنڈھے واقع اے۔ محیط سواحل= محیط دے کنڈھے ۔ قلزم افرنجے= افرنگی ملک دے سمندر ۔ نندن = لندن ۔ قیر فرنگ= برٹش افریقہ ۔ زنگبار=لُک وانگوں کالیاں دا ملک۔ مچینے= مہاچین ، سارے چین نوں مہا چین آکھدے سن۔چگل=ٹ ک تفصیلاں،کنعان=ملک شام دا اِک صوبہ حضرت یوسف دا وطن،