ورقہ 11

180
اس گلوں محبوب الٰہی رُس ہویا مُڑ راہی
جاں ہِک قدم اٹھایوس اونویں ہویا حکم الٰہی
181
ایہہ مردود زیانی بخشاں ہور ہزار اجیہا
رُس نہیں محبوب پیارے منیم تیرا کہیا
182
دوجا قدم اٹھایا حضرت پھیر کہیا رب والی
دو ہزار اجیہا بخشاں نالے ایہہ سوالی
183
تریجا قدم مبارک چایا آیا حکم حضوروں
ترے ہزار اتے ہک ایہہ بھی واصل کرساں نوروں
184
تیرا کہیا کدے نہ موڑاں اے محبوب یگانے
اوہ سارے جد قطب بنائے پِیر پڑھے شکرانے
185
ایسی عزت خاطر تیری رب دے خاص عزیزا
آس تساڈی رکھاں میں بھی اوگنہار نچیزا
186
سیوا دار تساڈا حضرت کوئی نہ رہیا خالی
سخی دوار تساڈے اُتے میں کنگال سوالی
187
لَکھاں خیر تساڈے لیندے بِن منگے بن لوڑے
دین دوان سبھو ہتھ تیرے کوئی نہ ٹھاکے ہوڑے
188
میں پاپی شرمندہ جھُوٹھا بَھریا نال گناہاں
ہکو آس تساڈے در دی نہ کوئی ہور پناہاں
189
میں انھا تے تلکن رستہ کیونکر رہے سنبھالا
دھکے دیون والے بہتے توں ہتھ پکڑن والا
190
توں پکڑیں تاں کوئی نہ دھکے پہنچ شتابی کر کے
گھمن گھیر اندر منتارو لگھ نہ سکاں ترکے
191
تلک تلک کے منہ سر بھریا گندی گلی گیاہاں
تکدا لوک تماشے حضرت میں بے حال پیاہاں
192
پاک نہیں ہتھ پکڑ اٹھاندے بھریوس نال پلیتی
یا میراں کے حال بندے دا جے تدھ سارنہ لیتی
193
چوراں نوں توں قطب بنایا میں بھی چور اُچکا
جس درجانواں دھکے کھانواں ہک تیرا درتکاّ
194
سن فریاد پیراں دے پیرا دھکا دئییں نہ میں نوں
بے کساں دا والی تو ہیں شرم دتی رب تیں نوں
195
آپ مہاری پِچھے پئیاّں سٹ نہ جائیں مردا
عرض کرن دے لائق شاہا سخن نہ میں تھیں سردا
196
عرض کراںشرمندہ تھیواں کے میں کراں ککارا
منہ میرا کد عرضاں لائق ناقص عقل بیچارہ
197
مت کوئی سخن ان بھانا نکلے عاجز مفت مریواں
رکھو قدم میرے سر حضرت سدا سُکھالا تھیواں
198
بچیاں دے سر صدقہ میں ول نظر کرم دی پاؤ
شاہ مقیم محمد پچھے پاک جمال دکھاؤ
لفظالی:
زیانی = قصور وار ۔ نقصان کرن والا ۔منیم = (منے ام) میں من لیا اے ۔واصل کرساں نوروں = اپنے نور نال ملادیاں گا ۔یگانہ = بے نظیر۔ جیہدے ورگا ہور کوئی نہ ہووے ۔دوار = دوارے ۔ٹھاکے = منع کرے ۔ہوڑے = زبردستی روکے ۔سنبھالا = استقامت۔ تلکن ڈولن توں بچی قائم حالت ۔منتا رو=ترن نہ جانن والا۔ تارو دا الٹ ۔بھریوس = میں بھریا پیاہاں ۔سار = خیر۔ خبر ۔شرم = لاج۔ عزت۔ حیا ۔ ذمہ داری۔جمال = نظارہ۔ جلوہ ۔آپ مہاری = اپنے آپ ۔ان بھانا = ناپسند ۔سرنا = توفیق ہونا۔دھکے= پانی اندر اپنے توں دور دھکا دیوے،پکڑیں = دستگیری کریں ، لگھ= لنگھ، پِچھے=دے مُنہ نوں ۔ دے طفیل (حضرت میراں محمد مقیم حجروی حضرت پیرے شاہ غازی دے مرشد سن)