ورقہ 68

1223
کس سنگ پھولاں دکھ سجن دے سول ہڈاں وچ وڑیا
دل وچ یار محمد کاہنوں اوراں پُچھاں اڑیا
1224
جے کر بدیع جمال میرے تھیں منگ گھلے دل جانی
دل تے جان کراں نذرانہ دھڑ ہووے قربانی
1225
جے اج اُس دے باغ ارم دی واؤ اِس پاسے وگے
اوسے دم دم چھوڑ دیہی نوں مگر واؤ دے لگے
1226
نہ دل وس نہ دس سجن دی جھس لیا اس اگے
تاہنگ بُری جیوں سانگ کلیجے ٹانگ نہیں ہتھ لگے
1227
درداں مار نمانا کیتا کونج وانگر کرلاندا
پٹ پٹ سٹدا وال سرے دے مول نہیں شرماندا
1228
خبر ہوئی جد باپ بے چارے بیٹے دے احوالوں
عاصم نوں غم لگا بہتا سیف ملوکے نالوں
1229
جے کوئی شاہ ملکاں دا ہووے مایا دولت والا
اس گھر اکو ہووے بیٹا سوہنا روپ نرالا
1230
اس نوں مرض لگے کوئی بھاری لادوا علاجوں
اچن چیت نسے ہو جھلّا ملکوں دیسوں راجوں
1231
بڈھا ہووے باپ نمانا اوہ جوان رنگیلا
تاں پھر باپ شوہدے دا یاروکے کُجھ ہوندا حیلہ
1232
رورو عاصم شاہ پکارے غم دے لشکر بھارے
میرے تے نت چڑھ چڑھ آون ہک تھیں ہک نیارے
1233
جس دن گھر اولاد نہ آہی ہیساں درد وہونا
جاں اولاد لدھی غم مینوں دینا آیا دونا
1234
ہن بیٹے دی ویکھ مصیبت لگا بُرا اندیشہ
فرزنداں دے پھٹ نہ مولن دن دن پوندا اریشہ
1235
غور دلاسے کر کر تھکا عاصم شاہ بہتیرے
بیٹے دا خفقان نہ جاندا دم دم ہوئے اگیرے
1236
اوڑک عاصم شاہ پتر نوں اپنے کول منگاندا
پند نصیحت حال حقیقت اچھی طرح سناندا
شاہ عاصم دا اپنے پترّ نوں مَت دینا
1237
کہندا اے فرزند پیارے توں جگر دا بیرا
تینوں سیک جے لگے رتی سڑے کلیجہ میرا
1238
ست ہزار امراء سپاہی پھر آئے سبھ عالم
جو جو وسیوں آدمیاں دی ویکھ مُڑے رب معلم
1239
نہ کوئی خبر پری دی لبھی نہ اس باغ ارم دی
چار ہک سے ہور لکھ لیائے مورت کُڑی ختم دی

لفظالی:
سُول= چوبھویں پیڑ۔ اڑیا= ارے دے مقابلے وچ پنجابی لفظ جیہڑا کسے مردساتھی نال برابری تے بے تکلفی ظاہر کر دا اے۔ دم= (١) ویلے(٢) ساہ۔ تاہنگھ= ملن دی اڈیک۔ دس= اطلاع ، خبر۔ جھس لیا= کلیجہ کڈھ لیا۔ سانگ= وگاہتا مارن والا نیزہ Javelin۔ ٹانگ= دریادی موافق لہر جیہڑی دوجے کنڈھے لیجاون وچ مدد کرے، مسافر ایس لہر دی اڈیک وچ رہندے نیں ۔ مُول = ہر گز۔ مایا= (١) دولت دی پیدائش دا ذریعہ ( ٢) بے حقیقت شے جیہڑی دھوکھا دے جاوے۔ لادوا= بے علاج ۔ اچن چیت= اچانک، جس شے دا پہلاں کوئی چت یا خیال نہ ہووے۔ حےلہ= حال ۔ چڑھ چڑھ=چڑھائی حملہ کر کے۔ پھٹ نہ مولن= زخم مند مل نہیں ہوندے۔ بیرا = قیمے دی چھوٹی جنی بوٹی۔ خفقان= دل دی تیز دھڑکن دا روگ۔ مورت کڑی ختم دی= کڑی دی اک مینی ایچر مورت۔درد وہونا=درد دی لذت توں محروم، غور دلاسے= دل بہلاون لئی کیتا پُورا جتن، وسیوں= آبادی۔ رہائشی جگہ ،