ورقہ 73

1312
جے کجھ پچھے رہسی میرا لشکر ملک خزانے
جے بیٹے دی کاری آئے کرساں تاں شکرانے
1313
میرا اج کل کُوچ نقارہ سُن فرزند پیارا
جے توں اس دم کول نہ ہویوں برم رہے گا بھارا
1314
جے ر ب خیری آندا تینوں روسیں نال افسوساں
اس ویلے دے رون تیرے تھیں میں دلشاد نہ ہوساں
1315
اس دن دے اس روون کولوں سَور نہیں کجھ تیرے
اکھیں اگوں جا نہ بیٹا اوسر ویکھ گھنیرے
1316
آ ساقی بھر دے پیالا پی ہوواں مستانہ
ماؤ پیو تھیں رخصت ہوواں چھڈاں دولت خانہ
1317
یاراں پچھے وطن بھلاواں ویکھاں دیس بیگانہ
ٹِھلہّاں وچ سمندر غم دے پکے کیوےں یرانہ

پُتّر نوں پیو دے ترلے تے رحم آ جانا تے عشق دا شہزادے دے کن کِھچنا

1318
ترلے ویکھ پیو دے بیٹے رہن اُتّے دل کیتا
سہاں مصیبت نال صبر دے کوئی دن بہاں چُپیتا
1319
توبہ کرن اُتّے جد ہویا استغفار کریندا
ہوئی خبر عشق نوں آیا مارو مار کریندا
1320
توبہ نوں اس کن پھڑائے پھر بھی ایتھے وڑسیں
کون کوئی توں عاجز ہوکے شاہاں اگے چڑھسیں
1321
عشقے دا رخ ویکھ محمد ہوون فیل پیادے
متیں لگے نہ اُٹھ وگے کے مقدور شزادے
1322
بِلیّ بن کے وڑدا یارو شیر اندر جا بندا
خون لئے بن ہاڑ نہ چھڈے سدا بہادر رَن دا
1323
پند نصیحت پیو دی سن کے سیف ملوک شزادہ
کہن لگا ہے قبلہ تیرے ہون اقبال زیادہ
1324
پند نصیحت جو تدھ دتی سبھ کنجی مشکل دی
اچھی طرح سنی میں ساری دھر کے خواہش دل دی
1325
پند تیری ہے دیوا دل دا کر دی دُور ہنیرے
جے مےں آکھے لگاں ناہیں آئے برُے دن میرے
1326
میں بھی جاناںفرض میرے تے کہے تیرے وچ ٹُرنا
کوشش کراںبتیر نہ چھڈدا عشقے پھڑیا پھُرنا
1327
توں جانیں فرزند سیانا سبھ کجھ سُندا بُجھدا
میں دل عشق غباری پائی دُنی سنسار نہ سُجھدا
1328
جو جو گل تساں فرمائی یاد نہیں کجھ میں نوں
ایسے کملے نوں گھر رکھیاں صواد نہیں کجھ تیں نوں

لفظالی:
ٹھِلّہنا= وگدے روڑھو پانی وچ ترن لئی اُترنا۔ یرا نہ پکّے= یاری دے تقاضے پورے ہوون۔ استغفار کرنا= یا اللہ میرے گناہ بخش آکھنا۔ اس کن پھڑائے= عشق نے سزا دے طور تے کن پھڑائے۔شاہاں اگے چڑھسیں = شاہاں نال مقابلہ کریں گی۔ رُخ ویکھ۔۔۔۔۔۔= عشق دا رُخ ( مہرہ) ویکھ کے ہاتھی وی پیادے وانگوں ٹرن لگ پیندے نیں ۔ ہاڑ= جاڑھ ، ہنوں، داڑھ ، درندیاں دے دند جیہڑے ہڈی وچ پھسدے نیں ۔کے مقدور شزادے= شزادے دی کیہہ طاقت اے کہ پند نصیحت من لئے تے عشق دے سفر توں توبہ کر کے بہ جاوے۔ رن = جنگی میدان ۔ بتیر = بتیری۔ پھُرنا= دل کلیجہ جگر۔ بُجھدا = معلوم کردا جاندا ۔ سُجھدا=نظر آؤندا۔صواد=صاد ،تیرے واسطے ٹھیک نہیں۔