ورقہ 12

199
میں بے جانا اوگنہارا لائق نہیں جمالاں
تینوں سبھ توفیقاں حضرت نیک کرو بدحالاں

حضرت شاہ مقیم حجروی دی مدح
200
حضرت میراں شاہ مقیما! تیرا شان زیادہ
سوہنا سخی جدھے گھر جایا علی امیر شزادہ
201
نوری ملک کریندے چوری حوراں منگل گایا
بالا پیر لکھّاں دا داتا دھن مائی جِس جایا
202
عالم تے رُشنائی ہوئی چڑھیا چن نورانی
حسنی سید پیدا ہویا صورت یوسف ثانی
203
حُجرے اندر گھُریاں بھیراں دینی ڈنکے مارن
لعل بہاول شیر قلندر دم دم نال پکارن
204
طوطے مینا خمرے بولن دھن مقیم محمد
گودی وچ کھڈاوے جس نوں نبی کریم محمد
205
جس نوں ویکھ سوا لکھ ہویا عارف اہل ولایت
کس نوں طاقت آکھ سناوے اِسدے قرب نہایت
206
آل نبی اولاد علی دی واہ سید گیلانی
دستگیر جنہاں دا دادا کون تنہاں دا ثانی
207
کُتےّ جو درگاہ اوہدی دے شیراں اُپر بھارے
پِیراں دے سر پَیر محمد واہ وا پیر ہمارے
208
پِیراں دے درباروں پاوے دائم خلق مراداں
مینوں بھی کجھ شوق الٰہی بخشو سُن فریاداں
209
دمڑی والا لعل تساڈا جس دی ہے منظوری
پاک جناب اِنہا ں دی اندر مینوں کرو حضوری

مرشد ھادی حضرت پیرا شاہ غازی دی مدح

210
بسم اللہ بسم اللہ اگوں مدح مبارک آئی
ہادی مرشد دی جِس دُولے چارے کوُٹ نوائی
211
مسلم ہندو کوئی نہ نابر سیوے سبھ لوکائی
داتا سخی محمدبخشا دن دن دیگ سوائی
212
عاجز نِردھن اس دے در تے لکھ نعامت کھاندے
ہک دمڑی دا تحفہ لے کے دیندا دان لکھاں دے

لفطالی :
جایا = جمیا ۔ بالا پیر = حضرت شاہ مقیم ہوراں دے دوجے پُتر ۔چَوری کرنا = چنور ۔ مورچھل نال مکھیاں جھلنا ۔منگل = نعت۔ وڈیائی دا گیت ۔ بھیراںگھُریاں = شہنایاں وجیاں ۔قرب نہایت = قرب دی انتہاء ۔ رسائی ڈھوئی دا پورا مکمل بیان ۔شوق = عشق ۔جناب = درگاہ ۔ حضوری=حاضری وچ منظور ۔نردھن = کنگال ۔نابر = باغی۔ منکر ۔سیونا = عقیدت نال مانتا کرنا ۔چارے کُوٹ = چوہاں گُٹھاں وچ۔ سارے عالم وچ ۔دیگ =دے گا ۔ہک دمڑی = پیسے دا چوتھا حصہ۔ روپئے دا 1/256واں حصہ ۔ حضرت پیرے شاہ دمڑی دے چڑھاوے تے خوش ہوندے سن ۔ جمالاں = دیدار ۔ جلوے( حُجرے شاہ مقیم تائیں اوکاڑے توں بس چلدی اے )