ورقہ 79

1419
خذمت گار حکم دے بندے بہت آہے سلطانے
جو کم فرض ایازے اُتے ہور کوئی کے جانے
1420
رکھ گھوڑے دی واگ محمد پھیر پچھے کر پھیرا
اس میدان قواعد جوگا ہے کے بادر تیرا
1421
صورت دلبر دی جد پائیاں خوابے اندر جھاتاں
آکھ سنایاں عاشق تائیں پتے نشانی باتاں
1422
جان پئی تن مردے تائیں اگھڑگیاں اکھّاں
ہوشاں سُرت سنبھالاں ہویاں ہکس ہکس تھیں لکھاں
1423
اس خوابے شاہزادے تائیں دتی اگے والی
ہوش جند وتے صبر دلے وچ تن قوت مُکھ لالی
1424
اس لیلیٰ وچ ستے عاشق ہوکے مجنوں جھلے
خوابوں لے ہوشیاری اٹھے جاگے بخت سولّے
1425
پِیّا پریت دسالی اپنی دل اندر جوش آیا
پھیر نویں سر عقل کھڑایا دانش تے ہوش آیا
1426
کرے آواز غلاماں تائیں جاگو ساتھی دُکھ دے
دیؤ مبارک باپ میرے نوں خبر سنیہے سُکھ دے
1427
دانش عقل دتا رب مینوں سُکیّ نہر وگائی
آؤ سنگل لاہو میرے ، ول ہویا سودائی
1428
عاصم ایہ مبارک سُن کے چایا خوشی کمالے
ہو بے ہوش گیا کوئی ساعت جاں آیا وچ حالے
1429
جس گھر بیٹا قیدی آہا اس گھر گیا شتابی
پڑھ شکرانہ سنگل لاہے ہوئے کرم وہّابی
1430
انگل پھڑ کے آن بہایا اُپر تخت سنہری
سوہنے سبھ اکٹھے ہوئے بیٹھے لاء کچہری
1431
ہانی یار لگے رل بیٹھن کول چنےّ دے تارے
ہسن کھیڈن باتاں کر دے شہزادے سنگ سارے
1432
گلو گل ہلاندے جاندے ہر ہر شہر ملک دی
مڑ مڑ کے اوہ گل محمد باغ ارم ول ڈُھکدی
1433
دل وچ شارستان وسیندا نالے باغ ارم دا
اوسے پچھے ذکر کریندے روموں شام عجم دا
1434
لے لے نانواں باغ ارم دا گل کھڑی مُڑ اگے
پریاں دی اوہ جاء سُنیندی کس ڈولے ہتھ لگے
1435
گلے کتھے نال بہانے لینا نام پری دا
جاں اوہ نام لئے تاں ہوندا جیوں دم دے مریدا
1436
ملک سجن دا نام سجن دا دم دم نال پکارے
ہنجوں دے دریا وگائے آہیں ڈھائیں مارے
1437
گل کلام نہ کردا دوجی باجھ سجن دے ناموں
نام جپے یا بیٹھ چُپیتا فکرکرے اس کاموں

لفظالی:
سلطانے= سلطان محمود غزنوی دے ، بادر = حیثیت توفیق۔ مجال ۔ طاقت، رَکھ= سانبھ ۔ ڈک ، ہکس ہکس تھیں لکھاں= اِک اِک توں لکھ گُنا ہوگیاں نیں ۔، جندو= جان روح،مُکھ لالی= چہرے تے سُرخی کامیابی دی خوشی دا نشان ، لیلیٰ = رات، پیاپریت دسالی= محبوب نے محبت وکھائی۔ چایا خوشی کمالے= کمال دی خوشی نے اوہنوں چاء وچ لیاندا، پھیرنویں سر۔۔۔۔۔۔ = گواچے ہوئے عقل دانش تے ہوش نویں سِریوں واپس آ گئے، ول ہویا= ٹھیک ہوگیا اے، گھر= کمرا، کرم وہابی= وہاب اللہ تعالیٰ دے٩٩صفاتی نانواں وچوں اک ناں۔ بغیر کسے لالچ یا بدلے دے عطا کرن والا، چنے= چن، ہانی=ہم عمر، کھڑی= لے گئے، جا= تھاں ، ڈولے = طریقے ۔ ترتیب نال ، جیوں دم۔۔۔۔۔۔= جویں جان ای نکل چلی اے ،ڈُھکدی = نیڑے آوندی، اوہ نام = پری دا ناں ، نام جپنا= ناں دا ورد کرنا۔