ورقہ 82

1510
جے توں بچہ بچیا لوڑیں مائے ٹور سفر نوں !
سفر گیاں کجھ ہکھی ہوسی ملساں پھیر پُتر نوں
1511
جے تدھ ہتھیں دفن کرایا کجھ وسواس نہ رہسی
بیٹے نال ِملن دی تینوں پھر کوئی آس نہ رہسی
1512
دے اجازت مینوں مائے ٹراں سفر نوں جلدی
رہن نہیںہُن میرا ایتھے چِھک لگی اَن جل دی
1513
دانہ پانی ایس وطن تھیںسنبھ گیا ہن میرا
جس جس پاسے لکھیا ہوسی پیا کراسی پھیرا
1514
کیتا چِت اداس عشق نے رزق مہار اُٹھائی
توڑوں آئی کون ہٹائے سُن توں میری مائی
1515
ایہہ گل آکھ شزادہ روکے سر پرنے ہو جھڑدا
چُم زمین سٹے سر سجدے پیر ماؤ دے پھڑدا
1516
چاہ ماؤ دی من نہ سکےّ عشق نہ منن دیندا
کر کر عذر ہزاراں تاہیئیں مرمڑ قدم چُمیندا
1517
ایہ دلیلاں دھاراں مائے بخشےںبتری دھاراں
دھاراں تے کوہ قافاں اندر دھاڑاں پون ہزاراں
1518
جے رب مینوں خیریں آندا ہوساں آن سلامی
مت مر جاواں تاں بخشاواں بخشو حق تمامی
1519
روندی تے کرلاندی مائی بیٹا ودعیا کیتا
رب دا دِتا سر پر سہیا ، صبر پیالا پیتا
1520
ماؤ پیو جد جاتا بیٹا ناہیں گھر دے کم دا
گھر رکھے ہن بچدا ناہیں ڈاہڈا روگ پرم دا
1521
عاصم شاہ کہے پتر نوں توں جگر دا بیرا
توہیں جگر میراسیں توہیں کھادا جگرا میرا
1522
شاہزادے نوں رخصت ہوئی ٹریا چھوڑ گھراں نوں
محلاں اندر پیا کُکارا باہر حد بیانوں
1523
عاصم شاہ پتر نوں ٹورن شہروں ہویا باندے
یار اشنا محبت والے نالے روندے جاندے
1524
باپ بیٹے دا ڈیرا ہویا آکے ندی کنارے
میر وزیر امراء شزادے نالے آئے سارے
1525
روندے مِل ِمل ودعیا ہوندے سارے لوک مصر دے
چُم زمیں سر دھردے پیریں وڈے وڈے سر کر دے
1526
صاعد نال وزیر ہویا سی سیف ملوک شزادہ
چائی رزق مُہار اُٹھ چلے جِت ول رب ارادہ
1527
دولت مال خزانے لشکر سبھ اسباب بلیوے
صاعد دے حوالے کیتے اوہو لیوے دیوے
1528
ترینہ برساں دا وعدہ کر کے باپ اجازت دتی
لِکھ رکھے اوہ روز دوہاں نے سَن سَمت تے مِتی

لفظالی:
بچیا لوڑیں = زندگی دی لوڑ ای، ہکھی = آس امید ، ان جل= آب و دانہ، توڑوں = دُھروں اللہ ولّوں، سنبھنا= مُک جانا، مہار اُٹھانا= سفر تے ٹُرن واسطے پریرنا، سر پر نے= سر کے بل ، جھڑدا= ڈِگدا، دلیل دھارنا= دل وچ خیال لیاونا، بتری دھاراں = آکھدے نےںماں دے اک ممّے وچ سو لہ دھاراں ہوندیاں نیں۔ ٹ ک طبی کتاب منافع الاعضائ، دھاراں = پہاڑی سلسلہ ، دھاڑاں = لٹیریاں ڈاکواں دی فوج ، جاتا= جان لیا، پرم= عشق، بیرا= چھوٹا ٹکڑا لخت جگر ، کُکارا= شور ۔ کوکاں دا رولا، باندے = دوراڈا ، سر کردے= سردار۔ وس اختیار والے امیر، رزق نے مُہار چائی = دانے پانی نے سفر لئی تیار کیتا، بلیوے= گھریلو سامان ، تریہنہ=تِن، سن = عیسوی سال۔ سمت =بکرمی سال ،مِتی= چن دی تاریخ،مت= شایئد۔کِتے انج نہ ہو جائے کہ، محلاں=میحلاں،