ورقہ 84

1548
بیگم نوں سد کہندا میری غم نے ہوش بھلائی
بے غم ہوکے کر سلطانی بادشاہے دی جائی
1549
سبھو اوس دے ذمے لائے بادشاہی سمیانے
فوجاں لشکر تابع کیتے دتے سونپ خزانے
1550
صالح تے زرپوش اکابر دوئے وزیر سیانے
اوہ بھی تابع کیتے کوئی حکموں عذر نہ آنے
1551
بہتے وعظ وصیت کیتے متیں دے سمجھائے
رکھنی خبر کنگالاں اُتے مت کوئی ظلم پُچائے
1552
آپوں ظلم نہ کرنا کوئی فزع اکبر تھیں ڈرنا
جس دن آپ عدالت بہسی تِل تِل لیکھا بھرنا
1553
عدل انصاف اجیہا کرنا جگ وچ رہے کہانی
مظلوماں محتاجاں تائیں داد مراد پُچانی
1554
کر تلقیناں تے تاکیداں عاصم شاہ چھڈ شاہی
گوشے اندر بیٹھ چُپیتا کردا ذکر الٰہی
1555
کرے عبادت رب سچے دی زاری کر کر رووے
بیٹے کارن وچ درگاہے نِت سوالی ہووے
1556
ربّا پُت میرے نوں رکھےں اپنی وچ امانے
نال مراد دلے دی آنیں پھیر اساڈے خانے
1557
اوہ پردیسی بچہ میرا جس اندر جند میری
جتھے رہے سلامت رکھیں تدھ بِن کوئی نہ ڈھیری
1558
نال اخلاص محبت سچی عاصم رب دھیاندا
وانگ نبی یعقوب ہمیشہ بیٹے دا غم کھاندا
1559
رورو نیر اکھیں دا گھٹیا روء ہوئی نورانی
زُہد عبادت کردا جیوں کر پیغمبر کنعانی
1560
سیف ملوکے دے حق اندر کر دا نِت دعائیں
جس پر ماپے راضی ہوون اوہدیاں دُور بلائیں
1561
حضرت پاک نبی فرمایا جو نبیاں دا سرور
صلی اللہ علیہ وسلم نالے آل اوہدی پر
1562
جس قضائے ہونا ہووے لکھی روز ازل دی
جے سوہون دعائیں والے کسے طرح نہیں ٹلدی
1563
پر جے ماپے راضی ہوکے کرن دعائیں دل تھیں
فرزندے توں ٹلن بلائیں بچ نکلے مشکل تھیں
1564
جے کجھ اس حضرت فرمایا اس وچ شک نہ ذرّہ
سیف ملوک دعاء پیو دی پُگسی جاء مقرّ
ہ
شہزادے دا کشتی چلا کے مِصرتوں روانہ ہونا

1565
جاں شاہزادہ ہویا روانہ کیتی چھاں نشاناں
بادبان کُھلے کر دتے سبھناں کشتی باناں

لفظالی:
سلطانی = بادشاہی راج، جائی= (١) تھاں تے۔ بجائے (٢) بادشاہ دئیے دھیے، سمیانے= سازو سامان، زرپوش= زربفت دے کپڑے پاون والا۔ وزیر دا ناں، نہ آنے= نہ لیاوے۔ مت (١) نہ ۔ (٢) کتے انج نہ ہو جائے، فزع اکبر= یوم فزع الاکبر ۔ قیامت دا دیہاڑا، کہانی = مثال ، تل تل لیکھا بھرنا= ٹ ک ق م النسا0 4جس دن ذرے ذرے دا حساب ادا کرنا پوے گا، گوشے = اکلوانجے ۔ دنیا دی کسے نکرے، امان= پناہ ، آنیں= لیاویں ، خانے= گھر ، ڈھیری= امید ٹ ک ٦٣، دھیاونا= ذکر کرنا، روئ= چہرے دی دَکھ ، کنعانی پیغمبر= حضرت یعقوب ، آل = دھی دی اولاد۔ کنبہ ۔ روحانی اولاد، جے =جو،پگسی جا مقررہ= مقررہ تھاں تے ضرور پہنچے گی، مقررہ= لازمی طور تے یقینا ، نشاناں =جھنڈیاں تے، بادبان= ہوا دے رُخ توں فائدہ اٹھاون لئی کشتی نال بنھیا کپڑا،حضرت فرمایا=حدیث پاک اے ٹ ک مشکوٰۃ شریف صفحہ ١٩٥باب الدعا،