ورقہ 85

1566
گھُریا دھونسہ ترُیا ڈیرا لگی چوٹ نقارے
وجے تُرم اشارت ہوئی بیڑے ِٹھلّہے سارے
1567
جلد ملاح ہلاون چپے زوراور قرارے
واء اُڈائی جاوے بیڑے کولوں کولی سارے
1568
جے کجھ حکم کرے شہزادہ سبھ بجا لیاون
رنگا رنگ کھلاون کھانے کھیڈن جیو بُھلاون
1569
ہسّن کھیڈن دل پرچاون رکھن اوس بُھلائی
راتیں دینہاں کھلوندے ناہیں جان جہاز چلائی
1570
وچے رِجھدا پکدا کھاندے وچے سبھ کم ہوندے
نہ اوہ دندے لاون بیڑے ناہیں کتے کھلوندے
1571
اٹھ مہینے دینہاں راتیں گئے دوڑائی بیڑے
خوش بخوش رہیا سبھ ڈیرا آفت کسے نہ چھیڑے
1572
نہ کوئی خفگی تنگی آئی نہ ہوئی دل گیری
سارا ڈیرا رہیا سُکھلا کر دے عیش امیری
1573
اس مدت تھیں پچھوں ہک دن ٹاپو نظر پیو نیں
جان نزدیک دندے دے آئے شاہ تھیں حکم لؤ نیں
1574
بیڑے کنڈھے لاء ملاحاں لنگر سٹ کھلارے
لاہاں نال بدھے پھر دندے جیونکر اُٹھ قطارے
1575
ہک پکاون لگے کھانا ہک بیٹھے ہک سُتے
ہک لنگر سن ہیٹھ ندی دے ہک لنگر سن اُتے
1576
لنگر باسن ہتھ وچ لے کے زنگی شاہ پلنگر
لقمہ آمنگے جے ویکھے شاہزادے دا لنگر
1577
کھانا کھا آرام کیتو نیں ورتی پھیر صراحی
کرن لگے پھر سیر زمیں دا ڈٹھی خوب نواحی
1578
سبزیوں سبز پوشاک زمیں نوں وانگن نیکو بختاں
ہر ہر پاسے پانی نہراں لایا رنگ درختاں
1579
میوہ دار پکی ہر ڈالی لٹک زمیں پرآئی
گل پھل رنگ برنگی پھلے رونق جوہ سُہائی
1580
کوئل مور چکور ہزاراں خوش آواز لٹورے
طوطے قمری کالے تتر بولن وانگ کٹورے
1581
کھگاں ٹور گمانی کڈھی چلن وانگن ہنساں
بہتے مِرگ شکاری دوجے کتنے گِن گِن دساں
1582
باغو باغ ہووے دل اُس دا جو اُس جوُہے پھردا
خوش ہوا خوشبوئی والی جنت وانگ چوگردا
1583
سیف ملوک جمعیت کیتا کوئی دن اوتھے ڈیرا
کر دے سیر شکار اِس جُوہے ویکھ مقام بھلیرا
1584
کدے شہزادہ مجلس لائے جیوں دربار شہاں دے
کدے شکار کرے وچ جنگل تِتر ِمرگ سہاں دے

لفظالی:
دھونسہ گُھریا= نقارہ وجیا، اشارت ہوئی= ہری جھنڈی نال ٹھلن دا اشارہ مِلیا، تُرم= فوجی بگل، قرارے= منےّ پرونے، جے= جو ،جیو بھلاون= دل نوں دھوکھا دئی رکھن تے غم بھُلائی رکھن، بھُلانا= بہلانا، دندے= کنڈھے، خفگی=گھٹن۔ غم غصے دی حالت ، لنگر= بیڑے نوں روکی رکھن لئی سنگل نال بدھا لوہے دا بھار جو بیڑے توں چُک کے پانی وچ سٹیا جاندا اے، لاہاں= لمےّ رسے ، لنگر = فوجی یا فقیری تنظیم ولّوں سانجھا پکایا کھانا جو کسے قاعدے سیتی ونڈیا جاوے، لنگر باسن = لنگر لین والا بھانڈا، زنگی شاہ پلنگر= سکندر نال لڑائی کرن والا بادشاہ ، صراحی ورتنا= شراب دے جام ونڈنا ، لٹورا= اک پنچھی Butcher Bird،کھگ= پنچھیاں دا راجا۔ گرڑ ۔کھگ راج ۔ ککڑ ورگا پنچھی، مِرگ= عام جانور ۔ ہرن ۔ شکار دے قابل کوئی جانور ، چوگردا= ماحول، جمعیت= گروپ پارٹی۔