ورقہ 13

213
شاہ سلطان اوہناں دے بوہے عاجز بن وکھاندے
عاجز اس دے شاہ سدا ون اس دا مان رکھا ندے
214
اس در دے سگ عاری کولوں شیر ببرّ بھؤ کر دا
اگے چڑھے نہ چڑی اوہدی دے باز شکاری ڈر دا
215
بادشہاں دا پیر کہاوے پیراں شاہ کر جاتا
پیرا شاہ قلندر غازی نت سوا لکھ داتا
216
سیک لگے جد سیوک تائیں ترُت سُنے فریاداں
پہنچے کر تاکید محمد پان مرید مراداں
217
زندہ پیر کرامت ظاہر فیض ہمیشہ جاری
باغ نبی دا گل عجائب کھِڑیا سدا بہاری
218
جُمل جہان دُھمی خوشبوئی جھُلّی واؤ کرم دی
واہ سُہیل کرے بلغاراں قیمت پیندی چم دی
219
ساوی جھنگی جوبن رنگی جلوہ حسن کمالوں
شاخاں مستاں سر لٹکائے دم دم جھُولن حالوں
220
طوطے مینا خمرے بولن کوئل مور لٹورے
دھن پیرا دھن پیرا جس نے رزق اساڈے ٹورے
221
بلبل بھور گلاں دی باسوں پھر دے مست دیوانے
ہُد ہُد کرن سجود عبادت سر پر تاج شہانے
222
ککڑ اُٹھ صباحےں دیندے ٹھپ تیمم بانگاں
بوزے تے کلچٹیاں سوزوں کر دے کوُکاںچانگاں
223
اٹھویں روز ہووے نت میلہ لوگ زیارت آون
شاہ مرداں تے مست قلندر بھیراں گج سناون
224
پیر میرے دی دُھم چوپھیرے آون ولی سلامی
چُمن خاک کریندے خدمت دعویٰ رکھ غلامی
225
جنت شان مکان منور روپ ڈلہے ہر پاسے
در اس دے نت نویں سوالی پاون آس نراسے
226
اوتریاں نوں پُتّر دیندا وچھڑے یار ملاوے
در اُس دے دی خاک ملن تھیں کوڑھ فرنگ اُٹھ جاوے
227
رُڑھے جہاز لگاوے بنے ہر مشکل حل کر دا
لڑ لگے دا شرم تسانوں پاک شِہیدا مردا !
228
جس پر تیرا سایہ پیرا اوگن دے گُن اُس دے
جانی دشمن دوست بندے جو دوکھی سو مُسدے
229
رحمت نظر تساڈی جیکر میں پر ہووے سائینا!
بخشنہارے دی کے حاجت کجوّ عیب خطایاں
230
تُوں ہیں بخشنہارا میرا نِت ستاری کردا
ظاہر باطن معلم تینوں تک بُرائیاں جردا
231
میں نکاری اوگنہاری پُر تقصیر بے چاری
مان تران تساڈا حضرت شرم شہاں نوں ساری

لفظالی:
اس دا مان رکھاندے = اوہدے تے فخر کردے نیں ۔سگ عاری = عام شکاری کتا جس وچ شکاری یا راکھے دا کوئی گن نہ ہووے ۔بھؤ کردا = ڈردا اے۔اگے چڑھنا = سامنا کرنا ۔جاتا = جانیا سمجھیا ۔سیوک = خادم ۔مرید ۔سہیل = برکت والا ستارا جہدے چڑھن نال چمڑے وچ خوشبو پیدا ہوجاندی اے ۔بلغار = رنگیا ہویا چمڑا جہیڑا سہیل ستارہ چڑھن نال خوشبو دار ہوجاندا اے ۔ساوی = ہری بھری ۔جھنگی = جھاٹلے رکھاں دی کرنگلی ۔لٹورے = رنگ برنگے کھمباں والے پنچھی ۔بوزہ =لمی ڈنگی چنج والا سرخ یا کالا بگلے ورگا ککڑ جیڈا پنچھی ۔کلچٹی = سریلے آواز والی چڑی جہیدا ڈھڈ کالا ۔ رنگ مٹیالا تے چنج لال ہوندی اے ۔کوڑھ فرنگ = برص۔ پھلبہری ۔مُسنا = مٹھیا۔ لٹیا جانا۔،ٹھپ تیّمم= کُکڑ وضو دی تھاں تیّمم نال اذان دیندے نیں ،بھیراں گج=طوطیاں دے مونہوں گج کے ایہہ آواز نکلدی اے۔ شاہ مرداں ۔ مست قلندر، حالوں = حال پین نال ،