ورقہ 88

1621
نہ دشمن نہ دوست ہووے ہووے کوئی طرفینی
گھر آئے دی کراں تواضع جاناں دوست عینی
1622
سچی گل سُنا شزادے کے سبب اس راہ دا
کیہڑا تخت ولایت تیری بیٹا ہیں کِس شاہ دا
شہزاد ے دا چینی بادشاہ نوں جواب
1623
فغفورے دا خط شزادے جاں سارا پڑھ ڈِٹھا
اِلچی نوں فرماون لگا بول زبانوں مِٹھا
1624
اے اِلچی فغفور شاہے دے جااپنے سلطانے
آکھ سلام اساڈا اوّل دسیں کھول بیانے
1625
سیف ملوک میرا ہے نانواں آدی دا شہزادہ
نہیں غنیم نہ ویر کسے دا میں دل ہور ارادہ
1626
نہ میںملک ولایت لینی نہ رہنے دی نیت
دو تن روز شکارے کارن کیتی چا جمعیت
1627
میں اپنے ہِک مطلب کارن آیا چھوڑ وطن نوں
اس مقصود لئی نت بھالاں پانی وستی بن نوں
1628
جے میں وانگ غنیماں آواں آناں فوج گھنیری
چالیھ شاہ تختاں دے سائیں اِین منیندے میری
1629
باپ میرا سلطان مصر دا عاصم شاہ بہادر
میرے نال لڑائی کرسیں ہے تیرا کے بادر
1630
پرمیں آپ لڑائی چھڈی نہیں خصومت بھاوے
ہر اک نال محبت رکھدا جے کوئی یار کہاوے
1631
میں مقصود اپنے دا بُھکھا ہر ہر جائی لوڑاں
جاں جاں اوہ مقصود نہ ملسی سفروں مُکھ نہ موڑاں
1632
سبھ جزیرے ٹاپو پھرساں کوہ قافاں تے پانی
ایویں لوڑ کریندا مرساں جس دن عمر وہانی
1633
شاہ فعفور تائیں جا آکھو ایہ حقیقت میری
جیکر کریں غریب نوازی جاناں شفقت تیری
1634
سرفراز کرو جے سانوں لائق ہے شہاں نوں
نہیں تاں فجری کوچ کراں گے بیڑے ٹھیل راہاں نوں
1635
اِلچی جا اخبار سُنائی شاہ فغفورے تائیں
خوش ہویا تے ملیا لوڑے سُن کے صفت ثنائیں
1636
تحفے بہت پیارے لے کے ملنے کارن آیا
دونویں شاہ ملے کر الفت ہک دوجے گل لایا
1637
شاہزادے فغفورے تائیں اُپر تخت بہایا
آپو ہٹ بیٹھا ہِک گُٹھے ادبوں رتبہ پایا

لفظالی:
طرفینی = غیر جانبدار، عینی= اصلی ۔ بالکل صحےح، آدی دا= قدیمی ۔ مڈھوں خاندنی۔ ، غنیم = دشمن ، جمعیت کرنا= کسے تھاں تے اکٹھیاں ہونا، وستی=آبادی، بھالاں = لبھاں، آناں = لیاواں ، جائی = تھاں تے ، سرفراز کرنا= ملاقات دا شرف بخشنا، این = آئین ۔ قانون۔ قاعدہ ، بادر = مجال ۔ حیثیت ۔ توفیق ۔ طاقت ۔ خصومت =دشمنی، لوڑاں = لبھاں، لوڑ = تلاش۔ بھال ، وہانی= گزری ۔ مکی۔ بیتی ، اخبار= روایت ۔ شہزادے توں زبانی سُنی ہوئی گل ، ملیا لوڑے = مِلنا چاہندا سی، کارن= لئی ۔ واسطے ، ادبوں= ادب پاروں ۔ ادب کر کے۔