ورقہ 90

1657
شاہزادے اس بڈھے تائیں خلعت دتی بھاری
ہور انعام دتے خوش ہو کے گل دسی اس کاری
1658
شاہ فغفور کیتا چا رخصت کیتی آپ تیاری
بڈھے تھیں پُچھ لئی شہر دی پتہ نشانی ساری
1659
بادبان سدھے کر لائے ٹھیلھ دتے سبھ بیڑے
وجن باجے گان گوئیے ساز خوشی کر چھیڑے
1660
استنبول شہر نوں پُچھ کے ہویا شاہ روانہ
تیروں تیزچلاؤ بیڑے کہیوس کشتی باناں
1661
بیڑے واؤ گھوڑے چاڑھے جاندے وچ سُراڑے
چھ مہینے گئے چلائی کھلے نہ ہِک دہاڑے
1662
خوشیاں وچ رہیا سبھ آدم گھوڑے وہتر سارے
نہ کوئی خفگی تنگی آئی نہ اوہ واؤ مارے
1663
تاں پھر ہک دہاڑے اوہناں ٹاپو نظری آیا
بیڑے جا لگائے اوتھے ڈِٹھا تھاں سُہایا
1664
میوے رنگا رنگ ہزاراں اشکاراں دے ٹولے
خوش آواز ہر پنکھی اوتھے نال سُراں دے بولے
1665
چاء مقام کیتا شہزادے کھان لگے اُٹھ میوے
کیکر کراں ارام محمد جے رب کرن نہ دیوے
1666
سبھنیں گلیں خوب جزیرہ خلل بڑے دو اوتھے
ایسے گلوں رہے ویرانی وسدا نہ کو اوتھے
1667
ہک بگھیا ڑ مریلے مندے مارلے جاون گھوڑے
دوجا پنکھی اُڈدے آون بہت وڈے بے اوڑے
1668
آدمیاں نوں چاء کھڑیندے جا کِتے ول کھاندے
ایسے طرح دہاڑ گزاری لوک ہوئے درماندے
1669
رات پئی تاں پانی وچوں نکلے مچھ ہزاراں
سبھناں دے منہ لعل پھڑے جو روشن کرن ہندھاراں
1670
جیوں اسمانی تارے روشن تیویں لعل نورانی
لوء لگی سبھ رو دریاوے آئی ویکھ حیرانی
1671
جیونکر چور ہنیرے گھر وچ بال انگریزی تیلی
چانن لاء چُراون چیزاں مچھاں بھی اوہ حیلی
1672
چانن کر دریا کنارے آدم پھڑ پھڑ کھڑدے
مار شکار اوہ کھاون کارن لے پانی وچ وڑدے
1673
آدم نال دغے دے مچھی کڈھ دریاؤں کھاندے
مچھ کھاون دریائیں آدم دو ویں بدلہ پاندے
1674
شاہزادے نے معلم کیتا جے میں ایتھے رہیا
آدم گھوڑے فوج مثالہ کھڑ کھڑ کھاسن ایہا
1675
سبھ سپاہ ہکٹھی کیتی مال اسباب سنبھالے
فجرے ٹھیلھ دتے پھر بیڑے کر کے رب حوالے

لفظالی:
خلعت = انعام وجہوں دتّے گئے قیمتی کپڑے ، کاری = کار آمد کم دی، کہیوس= اوس نے آکھیا، سراڑے= گھوڑے دی تکھی چال ۔سرپٹ بھجنا، بادبان= ہوا دے موافق رُخ توں فائدہ اُٹھاون لئی بیڑی نال بدھا موٹا کپڑا ، وہتر = بھار لدّن والے گھوڑے ۔ کھوتے ۔ خچر ۔ بلد، واؤ= گھوڑیاں دا اک روگ، سُہایا= سجیا ۔سنوریا، اشکاراں= شکار دے قابل جنور تے پنکھی، مقام کرنا= کسے تھاں تے قیام کرنا، خلل= خرابی ۔ نقص ، بے اوڑے = بے حدے ۔ بے اوڑکے ،ہندھاراں = انھیریاں نوں ، کارن = لئی، چاکھڑیندے= چُک کے لے جاندے سَن، درماندے= عاجز ۔ بیمار پئے رہن والے ،رو دریاوے= سمندری پانی دی سطح ، انگریزی تیلی = ماچس، حیلی= حیلہ ۔ طریقہ تدبیر، فوج مثالہ =شاہی فرمان مطابق تعینات فوج،