ورقہ 91

1676
کرن عبادت نال ارادت ہر دم یاد الٰہی
اِکیّ روز رہے پھر چلدے گھڑی نہ لیندے ساہی
1677
با ارام رہیا سب ڈیرا تنگی کسے نہ پائی
رَین دناں وچ چین گذارن آپو اپنی جائی
1678
ساقی دے شراب پیالا جس دا نشہ نہ گھٹے
آیا وقت طوفان قہر دا نال ہمت دے کٹے
1679
مال اسباب کھڑائیے توڑے بچ رہیے تن جانوں
اس طوفانوں بنےّ لگئے بخرا لئے ایمانوں

کشتیاں دا غرق ہونا تے طوفان وچ صاعد دا نکھڑ جانا

1680
ظالم دشمن انبریارو کرے چوپھیرے پھیرے
کالے سپ مریلے وانگر آدمیاں نوں گھیرے
1681
اس دے نال نہ کردا تھوڑی جو اس دے ہتھ چڑہدا
رُڑھدے بندے نوں دے دھکا پرے پریرے کھڑدا
1682
روشن روز اساڈا تک کے سوگی بن بن دسدا
بھاء ساڈے جد پئے ہنیرا کِھڑ کِھڑ کر کے ہسدا
1683
کدے پیار کرے ہتھ پھیرے جیوں سر چمُّے مائی
کدے چھری پھڑلا ہے کھلاں جیونکر لاہن قصائی
1684
لاڈ اس دے دا لاڈنہ کرئیے لاڈیں لاڈیں لاندا
بھایاں وانگر چا کندھاڑے جا یوسفؑ کُھوہ پاندا
1685
سیف ملوک توڑے سی دکھیا شاہ پری دی چِھکوں
پر کوئی ہور نہ آہی اوکھت باجھوں اسے ہِکوں
1686
جو کجھ ورتن عیش خوشی دے آہے نال ہزاراں
باارام جہازاں اندر کر دا جائے بہاراں
1687
ہک دن کرنا رب دا ہویا اٹھی سخت ہنیری
دھند غبار سنسار چھپایا لگی جھڑی گھنیری
1688
کڑ کے بدلی دھڑکے پُھرنا بجلی دے چمکارے
دور جہازاں کھڑ کھڑ مارے جھکھڑ دے اُلارے
1689
نوحوالا طوفان ازغیبوں غرق کرن نوں آیا
شاہ سپاہ تمام پکارن رکھیں بار خدایا
1690
بدل قہر نزول مچایا لہر سمندر آئی
ماگر مچھ سنسار بلائیں رُھڑدے دین دوہائی
1691
صاف کیتے کوہ قاف ہنیری برفاں وانگر جھڑدے
چڑھدے دے کھڑ لہندے مارے لہندے دے کھڑ چڑھدے
1692
فوجاں وانگن نویاں ہاٹھاں آون کر کر ہلےّ
زوروں زور سوایا بدل جھکھڑ گھڑی نہ ٹھلّہے

لفظالی:
ارادت= عقیدت ۔ مانتا، ساہی= ساہ۔ دم ،رین= رات، توڑے = بھاویں ، بخرا= حصہّ، انبر = اسمان ، پریرے = ہور وی پرانہہ، سوگی= سوگ ماتم کرن والا۔ انبر دا رنگ نیلا ہوندا اے جو ماتمی رنگ اے، کھِڑ کھِڑ کر کے ہسدا= روشن ستاریاں دے چمکن ول اشارہ اے، لاڈنہ کرئیے= فخر نہ کرئیے، لاڈیں لاڈیں لاندا= لاڈ لاڈ وچ ای سٹ مار جاندا ے،چِھکوں = کِھچ محبت ولوّں ، اوکھت = تکلیف مشکل ، کرنا رب دا= رب سببی۔ اتفاق نال ، گھنیری = سخت چوکھی ، پھُرنا= کلیجہ ۔جگر۔ دل ، کھڑ کھڑ = لے لے جاء کے، جھکھڑ = ہوا مینہ انھیری دا ملیا جلیا طوفان، از غیبوں = قدرت ولوّں ، رکھیں = بچائیں ، بارّ = اللہ تعالیٰ دا اک صفاتی ناں نیکی کرن والا ، قہر نزول = قہر دا اُترنا ،جھڑدے = ڈگدے، کھڑ= لے جا کے ، ہاٹھاں= بدلاں دیاں قطاراں ، ٹھلہے= رُکے ۔ کھلووے،ہتھ چڑھنا=قابو آنا،روشن روز=چٹادن،