ورقہ 92

1693
جھکھڑ بدّل غضب اٹھایا ہک پل مول نہ وِسے
دھند غبار ہنیرا ایسا اپنا آپ نہ دِسے
1694
شاہزادہ تے یار تمامی کرن ربے ول زاری
ربا توں ہیں رکھن والا بنی اساں سر بھاری
1695
ساڈے بخرے دا اج آیا ڈاہڈا روز قیامت
اس طوفان قہر دے وچوں رکھیں صحےح سلامت
1696
اسیں بچارے رُھڑدے جاندے واء مراد جُھلائیں
مت اوہ یار پیارا لبھے ٹِھلّہے ساں جس تائیں
1697
شاہزادے تے لشکر اس دے جانیں توں ہتھ دھوتے
موت اُتے دل رکھ لیو نیں ہو تیار کھلوتے
1698
اچن چیت ہک ٹھاٹھ ہڑھے دی آئی بہت وڈیری
پانی نال اسماناں دِسے بھجی ویکھ دلیری
1699
غوغا شور شونکار قہر دا پُہتا انبر توڑی
جیوں کر انبر مار زمیں تے ذرہ ذرہ کر توڑی
1700
ہِک ہِک موج اجیہی آوے کے لہنا طوفاناں
ہیٹھوں مار اُلارے بیڑے کھڑدی نال اسماناں
1701
اوتھوں پھیر ہٹھا ہاں سٹے جان زمیں دے تھلے
شونک وجی قرنا آخر دی خلق آئی تھرتھلے
1702
ہک دوجے سنگ وج وج بیڑے بھج ہوئے کئی ٹوٹے
کجھ ڈُبے کجھ تختے ہوئے کجھ وڈے کجھ چھوٹے
1703
پھیراں گھمن گھیراں اندر غرق ہوئے کئی بیڑے
مچھ سنساراں آدم نِگلے جیوں آٹے دے پیڑے
1704
کئی بیڑے بھج ریزے ہوئے رہی نہ مول نشانی
جو اسباب اوہناں وچ آہا سبھ کجھ ہویا فانی
1705
غرق ہوئی دو ویہاں کشتی لشکر سنے خزانے
دس سے مرد سپاہی رُڑھیا زورا ور مردانے
1706
باقی دے کجھ تختیاں اُتے آپو اپنے جاندے
کُجھ مچھاں تے کچھاں کھادے پھیر نہ ہوئے واندے
1707
ہک دوجے دی خبر نہ کوئیکے کجھ ورتی کسے
دھندوکار غبار ککارا نہ کجھ سُنئیں دِسے
1708
شاہزادے نوں خبر نہ کوئی غرق ہویا سی ڈیرا
ہک مصیبت آپو اپنی دوجا برا ہنیرا
1709
جھولاں اندر بیڑے آہے کجھ اُچے کجھ نیویں
اگے پچھے اوہلے ہوئے خبر رہے پھر کیویں
1710
رب بیڑا شاہزادے والا رکھیا صحیح سلامت
روز اٹھاراں رُڑھدا رہیا اندر کانگ قیامت
1711
جیونکر تیر بندوقوں گولی جاندے تیز شتابی
تینویں کھڑدی بیڑی تائیں کانگ قیامت آبی
1712
روز اُنہیویں واؤ کھلوتی ہوئی دُور غباری
دن چڑھیا جگ روشن ہویا گئی ہنیری ساری

لفطالی:
جھکھڑ= بدل ۔ مینہ ہنیری دا رلیا ملیا طوفان، وِسے= کھلون دا اعتبار نہ کرے، جس تائیں = جہدے کارن ، بخرے = بھاگاں ، واؤ مراد= مرضی دے موافق ہوا، جانیں = جاناں ، اچِنھ چیت= اچانک۔ اچن اچیت، ٹھاٹھ = موج لہر، شونکار= شوُکر، جیونکر امبر = جویں آسمان نوں زمین تے پٹکا مار کے ذرہ ذرہ کر کے توڑ دِتا ہووے، کے لہنا۔۔۔۔۔۔ =طوفان لہن مٹھے پین دا ناں ای نہیں لیندے اوہناں لہنا کتھوں سی ، سنگ = نال ، شونک وجی ۔۔۔۔۔۔ = قیامت دا سِنگ دا بنیا بگل شونکارے نال وجیا ۔،تختے ہوئے= پھٹا پھٹا وکھرا ہو گیا ، فانی ہویا= فنا ہو گیا ، مچھاں = مگر مچھاں ، کچھ= کھچوّ کمےّ، واندے=ظاہر ۔ سامنے، اوہلے= اوٹ وچ ، ورتی = بیتی ۔ واپری ، جھولاں = ہچکولے ڈولن دی حالت ، رکھیا= بچایا، کانگ= طوفانی ہڑھ ، آبی قیامت = پانی دی پرلو،