ورقہ 93

1713
شاہزادے دے بیڑے اندر مرد رہے بچ ستر
اوہناں نوں بھی ہوش نہ کوئی مُردے نالوں بتّر
1714
جاں سورج دی گرمی لگی کجھ کجھ ہوش سنبھالی
شاہزادے نوں ویکھن لگے اوہ بھی ہوشوں خالی
1715
روغن لے بنفشہ والا نالے تیل باداماں
جلدی مغز اوہدے تے ملیا ہچھی طرح غلاماں
1716
دور ہوئی سبھ سردی خشکی ہوش پھری سرساموں
کھانا طلب کیتوس آدھریا بھر رکاب طعاموں
1717
ہتھ کھانے ول کر پِھڑ ڈِٹھوس صاعد کتے نہ دِسے
رورو ہویا بیہوش شزادہ کھانا یاد نہ کسے
1718
ہئے ہئے ربا یار پیارا دکھ ونڈاون ہارا
اوہ بھی میں تھیں کھس لیوئی جبّارا قہارا
1719
کٹھے نِمےّ کٹھے جمّے دو جُثےّ ہک جِن دے
ہک دوجے تھیں گھڑی نہ وچھڑے ہوئے ساں جس دن دے
1720
جس دلبر نوں لوڑن آئے اوہ بھی ہتھ نہ آئیا
صاعد جیسا یار پیارا ہتھوں باز کھڑایا
1721
دشمن ساڈا انبر ظالم راکس کھاون ہارا
اکھیں ہنجوں پانی وَسّے دل دا پتھر خارا
1722
دُنی جہان مکان بھلیرا جان جوان ایہ فانی
ہے بدنیت پریت نہ پالے نہیں کسے دا جانی
1723
جو دھرتی تے گُل پھل لالے لَہ لَہ کر دی لالی
قطرے ظاہر ہوئی مویاں دی رت جواناں والی
1724
دنیا اُتےّ کون امن وچ ہر کوئی دکھیارا
بے وفا سنسار ہمیشہ ٹھگ بازاری بھارا
1725
کدے کرے سردار جیاں دا دے پوشاکی چِٹی
کدے بناوے پھیر محمد گھمیاراں دی مٹی
1726
نہ کجھ کھاوے نہ کجھ پیوے رہے شزادہ روندا
اگلے رونے نوں کے روسی ویکھ اگوں کے ہوندا
1727
فوج خزانہ خرچ کھڑایا رزق نہ رہیا پلے
کھارا جل سمندر والا قطرہ جِبّھ نہ جھلے
1728
بھُکھے تے تریہائے بندے بیڑا جان چلائیں
چھ مہینے گزر گیو نیں ویکھن بہت بلائیں
1729
جے کجھ اینہاں دناں وچ ڈِٹھی سخت مصیبت بھاری
گنتر وچ نہ آوے یارو جانے واحد باری
1730
تاں پھر ہکس دہاڑے آیا ٹاپو ہور رنگیلا
بہت نطاقت سن پر لایا بیڑا کرکے حیلہ
1731
میوے پکے رنگ برنگی خوب طرح دے ڈِٹھے
نالے پانی نہراں وگن صاف ٹھنڈے تے مٹھے

لفظالی:
بترّ = بدتر۔ ودھیرے بُرے ۔ بھراند، تیل باداماں= بادام روغن ، سرسام = دماغی سوج دا روگ ،دُکھ ونڈاون ہارا= ہمدرد ، کھس= کھوہ، نمنا=بی وا زمین دے وتر وچ جانا ۔بیجیاجانا، خارا= سخت نیلا پتھر ، ہوئے= وجود وچ آئے، لوڑن = لبھن ، ہتھوں = ہتھ توں ،کھڑایا= گوایا، راکس= راکش۔ دیوتا نال لڑن والا جنگلی شیطان ، اکھیں ہنجو۔۔۔۔۔۔ = اسمان بھانویں اکھاں وچوں اتھرو وگاندا رہندا اے پر دل دا پتھر وانگوں سخت اے۔ بے رحم اے، جانی=ڈِھڈوں صاف۔مخلص دوست، پریت نہ پالنا= وفاداری نہ کرنا ، لہ لہ کرنا= جوبن دی بہار تازگی وکھانا۔ چمکنا ڈھلکنا، جیاں دا = جانداراں دا ، پوشاکی چٹی=دنیادی عزت وقار دا لباس سفید پوشی، اگلے= جو اگے ہو چکا اے، گِنتر = گنتی ، نطاقت= کمزور،حیلہ=ہمت بھری تدبیر،