ورقہ 94

1732
کھادے میوے پانی پیتا پڑھیا لکھ شکرانہ
چار دہاڑے ہویا مقیمی ڈیرا بادشہانہ
1733
بندے ذرا اسودے ہوئے بیٹھے کھیروں کھیروں
اچن چیت ہوائے وچوں آیا ہک پکھیروں
1734
چار بندے وچ سجے پنجے چار کھبے اس پکڑے
اُڈ گیا لے اَٹھاں تائیں شاہ پر کر کے تکڑے
1735
شاہزادے تک ہیبت کھادی ایہ بھی آفت مندی
بھلکے پھیر آیا تاں کھڑسی ہور اتنے کربندی
1736
تھوڑے جیسے بندے رہندے ایہ بی مفت کُہاساں
رُڑھ مرنا اس نالوں چنگا بھسر میوے پاساں
1737
میوے توڑ رکھے وچ بیڑی جتنے آہے پیندے
مشکاں خےکاں جو کجھ آہیاں پانی بی بھر لیندے
1738
بیڑا ٹھیلھ روانے ہوئے دو مہینے چلے
عشقے اندر پین محمد دن دن کم اَوَلےّ
1739
بیڑے اُتے جاندے آہے وچ سمندر لہراں
جھکھڑ مینہ غباری پائی کانگ چڑھی سنگ قہراں
1740
بیڑا چاء چاء مارن لگے بُھلیاں ہوش سنبھالاں
مشرق مغرب یاد نہ رہیا نہیں جنوب شمالاں
1741
خوفوں جان لباں پر آئی طاقت گئی سریراں
کرن دعائیں رکھیں سائنیا! برکت پیر فقیراں
1742
جدھر راہ بیڑے دا آہا گُھس گیا اس راہوں
دھکے کھاندا گیا مریندا حکم جدھر درگاہوں
1743
اوڑک جا ہک ٹاپو لگا ٹاپو واہ وا دِسدا
رنگ برنگی میوے دانے ہووے بیان نہ جس دا
1744
مٹھے میوے انت نہ کوئی لذت والے لگن
صفت اوہناں دی ہو نہ سکدی تکیاں لہلاں وگن
1745
آدمیاںجد ڈٹھے میوے بھکھ نزول مچائے
بیڑا بنھ شہزادے ہوریں باہر نکل آئے
1746
میوے کھادے جو دل چاہے بیٹھے نال اراماں
دیگر وقت برابر ہویا گِنی صلاح تماماں
1747
شاہزادے فرمایا یارو رات گزارو اِتّھے
بھلکے فجری وقت ٹراں گے لِکھیا کھڑسی جتھے
1748
سبھناں ایہ صلاح قبولی جو شاہے فرمائی
اُچا رُکھ گھنا اک تک کے اس پر جا بنائی
1749
رُکھ اُتے چڑھ بیٹھے سارے شاہزادے دی ذیلے
ندیوں نکل بلائیں آیاں شام پئی جس ویلے
1750
ہِک گدڑ ہِک شےراں وانگر ہِک مانند سنساراں
ہِک ڈڈو ہِک کھگاں وانگر بولن پان ککاراں

لفظالی:
پڑھیا لکھ شکرانہ = شکرانے دے لکھ نفل پڑھے، اسودہ=ارامی ۔ باارام، کھیروں کھیروں = وکھرے وکھرے ، شاہ پر= اڈن والے دو کھمب، بندی=قیدی، ٹھیلنا= ڈوہنگھے پانی وچ=ترن لئی چھڈنا، بھسر= بھس سر۔ میویاں دے سر بھس پاکے ۔ لعنت بھیج کے ایہہ تھاں چھڈ جاواں گا، اولےّ=جنہاں کماں دا ول جاچ نہ ہووے ۔ پُٹھے ، خیکاں = چمڑے دیاں چھاگلاں ، چاچا= چُک چُک کے،اوڑک = آخر کار،واہوا= ویکھن وچ چنگا بھلا ، انت = انتہاء ۔ آخری سرا، رکھیں = بچائیں ، لہلاں= رالاں ، لہلاں وگن = رال ٹپکے۔ کھاون دی خواہش پیدا ہووے، کھڑسی = لے جاوے گا، صلاح گِنی= رَل کے مشورہ کیتا، بھکھ نزول مچائے= بھکھ مصیبت بن کے اتری ۔ بھکھ نال مر گی دے سخت دورے پین لگے، جاء = جگہ، ذیلے=ماتحت ہو کے مشورہ من کے، کھگ = مچھلی دی اک قسم ،سنساراں = مگر مچھاں،