ورقہ 14

232
جو چاہیں سو لکھیں سائینا! مالک لوح قلم دا
میں مسکین حوالے تیرے توں ضامن ہر کم دا
233
ہک پل مشکل باجھ تساڈے سائے پشت پناہوں
میں عاجز نوں نام اللہ دے ردّیں نہ درگاہوں
234
سدا محمدبخش نمانا ہِلیا کرم فضل دا
تکیہ پرنا محض تساڈا نہ کجھ رَلا عمل دا
235
کے مجال میری جے آکھاں انج کرو گل میری
گل میری ہتھ تیرے سائینا! سا ہم پیا نت تیری
236
نہاں عزیز مصاحبی لائق در تیرے سگ سُتا
کُتّیاں دا بھی نفر نکارا نفراں پچھے کُتّا
237
جس سر ہے دستار تساڈی میں بھی اس دے درتے
خیر خیرایت بیٹھا کھاواں جے کجھ چھاندا ورتے

سجادہ نشیں وڈے بھرا حضرت میاں بہاول بخش دی مدح تے کتاب لکھن دا کارن
238
سخناں دی اوہ قیمت پاوے شعر میرے خوش لیندا
اُس صرّاف اگے جو تردا سوء خزانے پیندا
239
شعراں وچ طبیعت اس دی کر دی وال شگافی
ایس زمانے اس نَقَد دی اس پر تم صرّافی
240
اللہ بھاوے قدر شناسی اس جیہی اج کس نوں
رمز پچھانے معنے جانے ایہہ تاثیراں جس نوں
241
کدے عبادت کدے عدالت آپ نہ ہوندا واندا
نالے نازک طبع نہ جھلدی فکر نہیں گل پاندا
242
تاں ایہہ کم دسیندا مینوں آپ کرے تاں ہوندا
جے کوئی سخن کرے تاں اوہ بھی دُر یتیم پروندا
243
صورت خوبی سیرت خوبی خوبی ورتن چالا
تانہیں نام مبارک اس دا خوبی بخشن والا
244
نام مُعمےّ اندر دسیّا عام نہ سمجھن تد بھی
سادہ اسم بلاون پڑھدے مینوں ہوئے بے ادبی
245
میرا ہے اوہ وڈا بھائی عمروں عقلوں وسبوں
دانشمند اکابر دانا بحر نظم دے کسبوں
246
شعراں دا سی شوق اونہاں نوں پڑھ پڑھ قیمت پاندے
ہر عاشق دے قصے تائیں خوب طرح دل لاندے
247
سیف ملوکے دی گل اوہناں کسے کتابوں ڈِٹھی
اس قصے دی طلب پیو نیں میں ول کر دے چٹھی
248
چٹھی گھِن سرے پر رکھی کھول جدوں پھر ڈِٹھی
سوہنے لفظ عبارت پختی شہد شکر تھیں َمٹھی

لفظالی:
تکیہ پرنا = آسرا۔ سہارا۔ اعتماد ۔ساہم = سانبھ۔ اوٹ پناہ۔ راکھی ۔سگ = کتا ۔نفر = ذاتی نوکر ۔چھاندا = فقیراں دی ونڈے آیا خوراک داحصہ نجرہ ۔ خوش لینا=پسند کرنا ۔وال شگافی = وال دی کھل لاہنا ۔ باریک نکتیاں تائیں اپڑنا ۔ورتنا = حصے سیتی ونڈنا ۔تم = تمام ۔ ختم ۔اللہ بھاوے = ماشا ء اللہ ۔ ورتن چالا = لوکاں نال سلوک ورتوں کرن دا انداز ۔واندا = ویہلا ۔ فرصت وچ ۔ترنا = معیار کسوٹی تے پورا اترنا ۔ پرکھ مگروں پاس ہوجانا ۔ دریتیم = اکلا نادر موتی جیہدے نالدا کوئی دوجا نہ ہووے ۔مُعمّا = عام لوکاں دی سمجھ بُجھ وچ نہ آون والا مسئلہ ۔نام مبارک = بہاول بخش (بہا = Good nessعطا کرن والا) بحرِ نظم دے کسبوں= شاعری دے فن وچ