ورقہ 95

1751
ہِکناں گینڈے وانگر گردن ہکناں وانگر اُٹھاں
ہکناں دے قد ہاتھی جیڈے مل لیونیں گُٹھاں
1752
ہک صورت بگھیاڑے وانگر ہکناں لونبڑ والی
ہکناں باشک ناگاں وانگن دہی تمامی کالی
1753
اوہ آفاتیں رُکھیں چڑھیاںبُھکھیاں پیٹ انباروں
میوے کھالیونیں اِتنے باہر حد شماروں
1754
بہتے مچھ ندی دے نکلے مل لیوں نیں جائیں
تسبیحاں تہلیلاں آکھن نالے حمد ثنائیں
1755
مچھیاں ہور آوازے بولن وانگ طنبور رباباں
عجب عجائب سُراں بناون ناہیں وچ حساباں
1756
ایہ گل کہندے آکھن والے جنھاں خبر جہانوں
خوش آواز مچھی دا بہتا ہر جنسوں حیوانوں
1757
ہک دوئے تھیں بہتر بولی وانگ سروداں گاون
ایسا رنگ بنایا اوہناں سُن سُن ہوشاں جاون
1758
جدوں اُٹھاء آوازاں کیتا رنگ سرودوں بنیا
جوہ جل اٹھی تے پھر لگی اگ درختاں گھنیاں
1759
اگو اگ چوطرفی دِسے ٹاپو سارا سڑدا
ویکھ ہویا حیران شہزادہ خوف اندر وچ وڑدا
1760
کرے دلیلاں یارب سائنیا جے بچیوس اج خیری
فجرے کوچ کریساں ایتھوں مار نہ سٹن ویری
1761
فجر ہوئی تاں اوہ سبھ چیزاں پانی اندر چھپیاں
سبھو جائیں ثابت دسن نہ سڑیاں نہ تپیاں
1762
سیف ملوک درختوں لتھا ڈھونڈے نال حیرانی
نہ سجی نہ کولا کدھرے اگ دی نہیں نشانی
1763
بہت حیران ہویا اس سِرّوں دہشت من وچ آئی
یاراں نوں فرماون لگا چلو ایتھوں کر دھائی
1764
مت کوئی آفت مار گواوے ناہیں جاء امن دی
بھلی صلاح اسانوں ایتھوں جلدی کوچ کرن دی
1765
یاراں کہیا اُٹھ شاہزادے تابع اسیں امر دے
چڑھ بیٹھے مڑ بیڑے اُتّے چلے طرف سفر دے
1766
میوے چن چن بھار بنائے بیڑی اُپر پائے
کرکے آس ربے دی ٹھلہے جت ول چاہے لاہے
1767
چار مہینے ٹُریا بیڑا اجے نہ خشکی آئی
میوے خرچ نُکھٹا سارا کٹھن رب بنائی
1768
خبر نہ کیتا پینڈا آئے کتنا اگے رہندا
ایسے فکر اندیشے اندر ہر ہک دکھیا بہندا
1769
ہک دن ہک سنسار مریلے بیڑے ٹکر ماری
دو ٹوٹے کردتا کھلیاں چِھک کنڈے دی آری

لفظالی:
گینڈا= Rhinocerosسنڈے توں وڈا موٹی کھل دا تھوتھنی اُتے دو سنگاں والا خوفناک جانور، باشک ناگ= ٹ ک تفصیلاں ، دیہی = سریر ، انبار=(١)گُوہ گند دا ڈھیر۔ (٢) ٹینک ۔ چھپڑ، انباروں = انبار ولّوں ، جائیں = اپنی اپنی تھاں ، تسبیح = سبحان اللہ دا ورد، تہلیل = لا اِلہٰ الَّا اللہ دا ورد، مچھی دی آواز= ٹی وی تے ڈالفن دی آواز سنائی گئی اے۔ سندھ دریا دے مچھیریاں ایہدی خوش آوازی دی تصدیق کیتی اے، اُٹھا= الاپ ، رنگ = موسیقی دی لذت دا نقطہئ عروج، دلیلاں = سوچاں، بچیوس = میں بچیا رہیا، دھائی = تیز دوڑ ۔ شُوٹ، بھار= ڈھانی منا ٹوکرا ، چیزاں = عجیب اچرج جانور، سجی = سواہ ، سِرّوں= بھیت توں ، امر = حکم ، لاہے= پار اُتارے، نکھٹا= ختم ہویا، کٹھن = مشکل ، اندیشہ= ڈوہنگھی سوچ ، مریلے = مار دین والے ،کنڈے دی آری= مگر مچھ دی کنڈ تے آری وانگوںدندے ہوندے نیں ،