ورقہ 96

1770
ہک ٹوٹے تے رہیا شہزادہ چالیھ ہور سپاہی
دوجے ٹوٹے تے جو آہے رُڑھ ہوئے سبھ راہی
1771
رُڑھدیاں ترے دہاڑے گزرے بھُکھے تے تریہائے
ٹھاٹھاں اندر اوہدا بیڑا خوف ڈبن دا کھائے
1772
جے کجھ سختی عشق دسالی شاہزادے دے تائیں
کراں پسارا مُکدا ناہیں چھوٹی گل سنائیں
1773
اوہ حشر دے ترے دہاڑے گزرے جاں شاہزادے
اگوں آگیا ہک ٹاپو میوے بہت امادے
1774
جِت ول ٹاپو نظری آیا تختہ اُت ول کھڑیا
مساں مساں ونج لگادندے شکر ربانا پڑھیا
1775
کنڈھے لگ پئے سبھ بندے پڑھیا شکر ہزاراں
اس طوفان قہر دے وچوں پہتے وچ گلزاراں
1776
شاہزادے فرمایا یارو کوئی دن ایتھے کٹو
اس ٹاپو دی لو حقیقت تاں ایتھوں دل پٹو
1777
جاں ٹاپو وچ لتھے ڈٹھی جاء عجائب چنگی
خوب درخت اتے خوش سبزی میوے رنگ برنگی
1778
مٹھے تے خوشبوئیں والے کجھ کچے کجھ پکے
صفت ایہناں دی رب نوں معلم کے بندہ کرسکے
1779
پھلاں دا کجھ انت نہ آوے میوے باہر حسابوں
کجھ مٹھے کجھ رسلے آہے لذت دار کبابوں
1780
پستہ مغز منقّیٰ کشمش کھوڑ انجیر باداماں
چلغوزے انگور خُبانی نغزک نار تماماں
1781
توت شہتوت بٹنگ بھرویاں آڑو سیو ناکھاں
بہی مرچ ہریڑ بہیڑے پپلاں کے کجھ آکھاں
1782
سیوبیر بخارے آلو کھوپے گری چھوہارے
گوشے کیلے انب الوچے شفتالو پھگواڑے
1783
ہور وڈے ہک رُکھ جہناندے پتر وانگر روٹی
میوے آدم دے سروانگر اکھیں متھا چوٹی
1784
رات پوے اس رُکھ دا میوہ ہک ہک دھرتی جھڑدا
دیہنہ نِکلے تاں ہسدا ہسدا پھیر رُکھاں تے چڑھدا
1785
آپو اپنی جائی لگن مول نہ تھاں وٹاندے
نالے راتیں اوہناں رُکھاں تھیں شعلے ہوون واندے
1786
لگی اگ درختاں دِسے سڑدے وانگر رُوآں
جیوں کے تیوںہوون مڑ دیہیں نہ کوئی اگ نہ دھواں
1787
ہندستان ملک دی حد وچ ہے اوہ ٹاپو لالا
کہن جزیرہ مالوہ اس نوں نِکیاں مرچاں والا
1788
نکیاں مرچاں دے رُکھ اوتھے دسدے گھنے گھنیرے
بہت عجائب رُکھ اوہناں دے وڈے اتے اُچیرے

لفظالی:
آہے = ہیگے سن، دسالی= وکھائی، پسارا= وضاحت ، اماندے= آماندے۔ امیوندے جیہڑے کسے جگہ وچ سمانہ سکن ، جِت ول = جس طرف، اُت ول = اوس پاسے ، دندے = کنڈھے ، جا = جگہ ، مساں مساں = بمشکل تمام ، پُہتے = پہنچے، دل پٹو= دل چکو ، لتھے = ڈیرے لائے، رسلے= رس والے ، سیو = سیب ، ناکھاں= ناشپاتی، بٹنگ = بگو گوشے دی گھٹیا قسم ، انجیر= پھگواڑے ، منقیّٰ = سُکے انگور، کھوڑ= اخروٹ ، نغزک نار= انب تے انار، دھرتی=دھرتی تے ، جائی= تھاں تے،وٹاندے=بدلدے، واندے= ظاہر ، دینہیں = دن نوں،لالا= وڈا بھرا، نکیا ںمرچاں = کالیاں مرچاں۔پِپلاں=مگھاں،بھرویاں=سنجد۔ملھے دے بیر،