ورقہ 15

249
کاغذ صاف منور گردا جیوں چہرہ دلبردا
نقطے وانگن بِندی مُشکی حرف آغاز اُتر دا
250
حرفاں وچ سفیدی روشن جیوں پُھل اندر پتاں
شاخاں وانگر سطراں سِدھیاں چوٹی تھیں لگ لتاں
251
ہر ہر سطر مبارک حُب دی آہی لہر روانی
لفظاں دے سِپ وچوں لبھن دُر یتیم معانی
252
کنڈل دار پئے وچ گھیرے زلف جِویِں محبوبی
مرکز نیناں مژگاں وانگر کون گنے سبھ خوبی
253
ایہ مضمون چٹھی دا آہا قصّہ جوڑ شتابی
چُن چُن سخن پرووِیں تسبیح موتی سَلّ خوشابی
254
صفت حُسن دی دُکھ عشق دے جیوں موجاں دریاواں
صلح لڑائیاں عیش قضیے باغیں میوے چھانواں
255
یک بیک سنائیں سارے سخن برابر کر کے
وانگ مصنفاں وڈکیاں دے دور اندیشے دھر کے
256
نکے قصے بیت سی حرفی کے ہویا تدھ لکھے
ایسے سویں تسی بی میاں سخن کرن ہُن سِکھّے
257
چھپڑیاں وچ ترتر ڈٹھوئی آء ندی وچ پو کھاں
یا دس زور طبیعت والا یا مُڑ تائب ہو کھاں
258
قصے اندر کسر نہ ہووے نالے رمز فقر دی
صنعت بھی وچ تھوڑی بہتی چلے لذت کر دی
259
پاؤں سیر بناویں قصہّ تاں گل تیری جاناں
اپنے مونہوں بن بن بہندا ہر کوئی سُگھڑ سیانا
260
چٹھی ویکھ لگی حیرانی کجھ نہ آوے جاوے
کون بھنجال فکر دا ہووے چنتا چخا ونڈاوے
261
گھُمن گھیر فکر دے اندر پیا عقل دا ٹّلا
نہ ایہہ لکھیا موڑن ہوندا نہ اوہ کم سوکھلا
262
دوہاں ولاں تھیں مشکل ڈُھکی کون کرے غم خواری
جے اج مرشد اکھیں دِسے منگاں مدد یاری
263
قصہّ اوکھا نالے لمّا زور کمی پنڈ بھاری
ڈاہڈے دا فرمان نہ مُڑدا روگی جند بچاری
264
طبع ضعیف اُداسی جیوڑا گھٹ جمعیت سی دل
جانے رب محمدبخشا اوس گھڑی دی مشکل
265
اس کم اندر بھلی فراغت تیز طبع ہوشیاری
میرے کول نہ آہیاں ترائے عقل دتی پر یاری
266
رکھ امید سخی دے در دی نال یقین اعتبارے
شاہ حضوری گِھن وسیلہ جاء جھڑیوس سرکارے
267
پِیر سچے دی تُربت اگے دوئے سوالی ہوئے
کیتی عرض قبول بزرگاں طالع جاگ کھلوے
268
لگا کہن فقیر حضوری بنھ لے لک جوانا!
کامل پیر کرے گا مدد ہو جا بھر مردانا!

لفظالی:
گردا = دوالا ۔مُشکی بِندی = کستوری دا چھوٹا جیہا دانہ ۔اتردا = کاغذ تے لکھیا جاندا اے ۔سلّنا = پرون لئی آرپار موری کرنا ۔مرکز = کتابت دی اک ٹرم، ک گ ورگے حرفاں دیاں آڑیاں ترچھیاں لکیراں ۔خوشابی = چنگی چمک والے۔ شفاف بلوری چمکیلے ۔دور اندیشہ = ڈوہنگھی دوراڈی سوچ ۔ سویں=سمے۔ ماحول ۔بھنجال = سیری ۔حصہ دار ۔چنتا = فکر ۔اندیشہ ۔چخا = مردے نوں ساڑن لئی لکڑیاں دا ڈھیر جہنوں تیل پاکے لمبو لایا جاندا اے ۔ ٹلّا=تلہا۔ لکڑیاں جوڑ بنھ کے ککھ کانے پاکے بنائی گئی بیڑی ۔ڈُھکی = سرتے آپئی ۔نیڑے آئی ۔جمعیت گھٹ ہونا = خاطر جمع نہ ہونا۔ طبیعت پریشان ہونا ۔شاہ حضوری = ٹ ک شخصیتاں ۔جھڑیوس = یکلخت ڈگ پیا۔ سجدے پے گیا ۔بھرمردانا = مصیبت دا بھارجھلن والا دلیر ساؤ۔سُگھڑ= مہذب cultured،