ورقہ 99

1825
سیف ملوک کہیا کے دساں حال حقیقت تینوں
پچھن جوگی گل نہ میری کجھ نہ پچھو مینوں
1826
میں دُکھیا توں سُکھیا شاہا کس سنگ دکھ پھرولاں
مصری دے بنجارے اگے کاہنوں موہرا تولاں
1827
دکھیے دی گل دکھیا سُندا سکھیے دی گل سکھیا
دکھیا ہائے کرے تاں کولوں سُکھیا ہوندا دکھیا
1828
کاہنوں چھیڑ حقیقت ساڑیں میں کرماں دے تتے
اندر وار میرا رب جانے باہروں ویکھ نہ چتے
1829
آیا جدھروں آیا شاہا جو لِکھیا سوپایا
موجاں مان گھراں وچ بیٹھا کس توںپُچھن لایا
1830
سیف ملوکے نوں اس شاہے کہیا سن توں بھائی
میں بھی دکھیا تیرے جیہاتاں ایہ گل ہلائی
1831
بوزنیاں دی قومے اندر آدم ہوکے جالاں
سدھر نال نہیں میں ایتھے کس نوں حال دسالاں
1832
آپو اپنی قومے اندر راضی ہے ہر کائی
ناجنساں دی بادشاہی تھیں چنگی دیس گدائی
1833
میں بھی تینوں کھول سناساں جے کجھ حالت گزری
لکھی جو تقدیر اساں پر جھل لئی بے عذری
1834
مینوں بھی ہم جنس شہزادہ ملیوں نال سبب دے
کوئی دن درد ونڈایئے اوڑک بھا وچھوڑا سبھ دے
1835
سیف ملوکے معلم کیتا ایہہ بھی ہے دکھیارا
بادشاہے نوں کھول سنایا پچھلا قصہ سارا
1836
جو کجھ اس سرورتی آہی ذرہ ذرہ کر دسے
سن کے شاہ رنا بھر ہنجوں جیوں ساون مینہ وسے
1837
اس شاہے پھر اس دے اگے کیتی شروع کہانی
جو کیفیت اس دی آہی کھولی پیٹا تانی
1838
سن توں سیف ملوک شاہزادہ کے گل میری آہی
یا جو جاں دی قومے اندر باپ میرے دی شاہی
1839
نام میرا فیروز شہزادہ ماں پیو بہت پیارا
سیر شکار آہا نت کردا جنگل ندی کنارا
1840
ہک دن بیڑے اند ربیٹھا پھر داساں دریا ویں
تک کے دکھ لگّا اسمانے کہیوس ہلانہ جاویں
1841
واء مخالف ایسی جُھلی رُڑھ ٹریا اوہ بیڑا
میں جاتا مرجاساں ڈُب کے چُک جاسی ایہہ جھیڑا
1842
جیون دے دم باقی آہے ودھیا پانی دانہ
دو ورھے تے ترے مہینے رُڑھدا رہیوس نمانا
1843
بیڑا بھج ہویا کئیں ٹوٹے رَڑھ گیاں سبھ فوجاں
ہک تختے تے میں بھی آیا رُڑھدا اندر موجاں

لفطالی:
دُکھیا= دُکھی ،سُکھیا= سکھیارا۔ سُکھی، موہرا= سنکھیا۔ ادرک یا ہلدی وچوں نکلی زہریلی گنڈھی ، کرماں دے تتے= بد نصیب نوں ، کس توں پُچھن لایا=توں کیوں پُچھ رہیا ایں ، چَتے = (١) ہٹھ ۔ جوش(٢) بے شرمی دلیری دے مظاہرے ، جالاں = جیون بھوگاں ،۔زندگی بسر کراں، سدھر= سِک آرزو ۔ دلی خواہش، دسالاں= ظاہر کراں ، جے= جو، اوڑک = آخر کار، بھا= بھاگاں وچ ، سرورتی= ہڈ بیتی، آہی= سی ، رُنا= رویا پٹّیا، تانی= تاناپِٹیا۔ پوری تفصیل، کردا آہا= کردا ہوندا ساں ، نِت = ہمیشہ ، کہیوس= اوہنے مینوں کہیا۔، چُک جاسی = ختم ہو جائے گا، جھیڑا= قضیہ جھگڑا، جیون = حیاتی ، رہیوس= میں رہیا ساں ، ہلانہ جائیں = ہلا بھائی جواناہُن توں بچ کے کتھے جاویں گا، تختہ = بیڑی دا ٹٹا بھجاّ پھٹا،