ورقہ 100

1844
جے کجھ عجب قضےے گزرے میں پر باہر شماروں
دس دن گنیے مکدے ناہیں دوتن ہک ہزاروں
1845
اوڑک گل مکاواں ایتھے آن لگوس وچ ٹاپو
بوزنیاں دی فوجے مینوں گھیر آندا کر قابو
1846
جو سردار ایہناں دا آہا اس دے کول لیائے
اوہ دانا اکابر وڈا دانشمند کہائے
1847
دیکھ مینوں خوش ہویا آکھے بہت پسند ایہہ آیا
بیٹی اپنی دے کے مینوں عقد نکاح کرایا
1848
عقد نکاح میرا اس جائی خوب طرح جد ہویا
بوزنیاں دا شاہ اوہ اگلا چالھیں روزیں مویا
1849
ایہناں دی اس جائے اندر ایہو رسم قدیمی
جاں سردار ایہناں دا مردا کردے سوگ یتیمی
1850
کتنے روز نہ جوڑے ملدے ناہیں وطی کریندے
جاں جاں آدم پیدا ہوندا تاں تاں تیک جریندے
1851
جاں پھر آدم پیدا ہوندا دین اس نوں سرداری
حکم اوسے دامن کھلوندی قوم ایہناں دی ساری
1852
مینوں ست برس ہن گزرے ایہناں اندر وسدا
ایہہ سبھ حکم میرے وچ ٹرُدے جے کجھ موہوں دسدا
1853
چار ہک سے اس ویلے باندر حکم میرے وچ بھائی
ایہناں دی سرداری مینوں ہور شریک نہ کائی
1854
چہلاں روزاں دا ہے رستہ ایہ ولایت ساری
نام اس دا ہولنگ جزیرہ جس دی میں سرداری
1855
اس تھیں اگے ہور ولایت سگساراں دی دسدے
ساڈے نال سدا اوہ لڑدے پر اوڑک بھج نسدے
1856
یاجوجہ فیروز شاہزادہ نام میرا سُن بھائی
ایہہ کہانی میری جیہڑی تینوں کھول سنائی
1857
میں جاتا کوئی ہور نہ ہوسی میں جیہا دکھیارا
پر پَیراں دی مِٹی کِردی گل تیری سُن یارا
1858
سخت مصیبت سرتیرے تے باہر انت حسابوں
رب ملاسی دلبر تینوں رکھ امید جنابوں
1859
سیف ملوک تائیں شاہ رکھیا چالیھ روز اس جائی
نت شراب کباب کھواوے خاطر کرے سوائی
1860
سیف ملوک شہزادے ہک دن ہویاجی اُداسی
لگی چِھک پیارے والی بُھلّی کھیڈن ہاسی
1861
سنگی اپنے کول بلائے کہندا سنیوں یارو
آئے ساں جس مطلب کارن نہ اوہ منوں وسارو
1862
بادشاہی گھر اپنے آہی ٹُرآئے اوہ سَٹ کے
کھان شراب کباب نہ آئے کاہنوں ایتھے اٹکے

لفظالی:
جے کجھ= جیہڑے جیہڑے، شماروں باہر= ان گنت، اک دوتن ہزاروں = ہزاراں وچوں کوئی اِکا دُکاّ گِنے سُنائے جا سکدے نیں ، آن لگوس = میں آلگا ساں ، جائی= تھاں تے، بوزنہ= باندر، سوگ یتیمی = یتیم ہو جاون دا غم 'پیو مرن دا غم ، وطی کرنا = بھوگ ۔نسل کشی لئی کیتانراں والا کم ۔ جاںجاں=جناں چر،پیدا ہوندا= ظاہر ہوندا ۔ نظریں آوندا، جریندے= جھلدے۔ برداشت کردے ، جے= جو ،۔چار ہک سے ۔ چار کُوسو ۔ چار سو اک، چہلاں=چالیھ، ولایت = سلطنت ۔ ملکی سرحد، اوڑک = آخر کار، جاتا = جانیا ہویا سی ، پَیراں دی مٹی کِرنا= بہت حیران ہونا ۔ سفروں دل چُکیا جانا، جنابوں = اللہ دی درگاہوں ، اس جائی = ایس تھاںتے ،انت = کل میزان ۔ کل جوڑ، کھیڈن ہاسی= ہسن کھیڈن ۔ تفریح طبع ، منوںوسارو=دلوںبھلاؤ۔