ورقہ 103

1900
ایہہ سگسار اسانوں پکڑن آئے نال چلاکی
مارو تیر اڈارو اِہناں نسن ویکھ ہلاکی
1901
سبھ اکٹھے ہوکھلوتے کرکے راس ہتھیاراں
چِھک کمان جوان توانے آن پئے سگساراں
1902
مارن تیر سریر پروون چیر کلیجہ دیندے
پھیر ہتھاں شمشیر چلاون وار دلیر کریندے
1903
دونہہ طرفاں تھیںجُڑی لڑائی چمک کڈھی تلواراں
چھم چھم تیر شوکار اٹھایا جیوں ساون دیاں باراں
1904
سیف ملوک شہزادہ گجے وانگن شینھ مریلے
پھِرے چوپھیرے دے دلیری مارن رن وچ سیلے
1905
نیزہ مار کرے تن ریزہ سانگاں بھنن سانگاں
ڈھالیں اُپروج وج بھجن سگساراں دیاں ڈانگاں
1906
سگساراں نے غوغا کیتا آئے کرکے ھلا
یار شہزادے دے سبھ کنبے آپ دلیر ہکلا
1907
شاہزادے نوں جنبش چڑھیا یاراں نوں للکارے
پِڑ وچ رہو کھلوتے دشمن ایہہ مارے کہ مارے
1908
سیف ملوک بہادر ایسا دیوتیاں سنگ لڑدا
دے مروڑ اروڑ جیہاں نوں کوئی نہ اگے چڑھدا
199
ہلے ویکھ شہزادے والے بہمن بہ من مارے
رستم رسم غلامی پھڑکے آن سلام پکارے
1910
سرسامے دی ہوش نہ رہندی جیوں سرسامے والے
زال زوال ہزیمت کولوں دھولے کردا کالے
1911
اسفند یار بناوے ڈھاہ کے اسفند یار جیہاں نوں
پھیر ایدوں مکھ موڑ فریدوں رکھے جان جہانوں
1912
چھڈ لالچ لُند ہور شتابی شان لندھور نہ کردا
شاہزادے دی رکھ شیرینی بنے شاگرد ہنردا
1913
شاہزادے کر زور دلیری بھن دتا سگساراں
کھس لئے ہتھیار پوشاکاں خوب کرایاں ماراں
1914
کرکے زیر اوہناں نوں اوتھوں آپ ہوئے پھر راہی
جنگل باراں بہتے لنگھدے شیر جوان سپاہی
1915
کئیں کوہاں دا پینڈا کرکے پہتے ندی کنارے
ایسی ندی ڈونگھیری چیڑی ویکھدیاں بھومارے
1916
ساقی کاسہ پُور شرابوں آن پلاشتابی
عاشق سُکھیا چنگا ناہیں دم دم بھلی خرابی
1917
پی شراب ہوواں مستانہ ٹھلہاں ندی پرم دی
جھلاں ظلم اغیاراں والے خاطر یار صنم دی

لفظالی:
سگسار =عجیب مخلوق ۔ جیہدا سر کُتےّ ورگا۔ منہ اژدھا ورگا۔ جت بکری ورگی ۔ اکھاں نیلیاں تے کن ہاتھی ورگے ہوندے نیں ، اُڈارو= نسا کڈھو ، شوکار=شوکر جو تیر دے تیز چلن نال پیدا ہوندی اے ، جُڑی لڑائی = لڑائی پھس کے ہوئی ، شینھ = شیر ، سیلا = گردن دا منکا بھنن لئی ہتھ دی گِبیّ نال کیتا یکلخت وار، سانگ= دوروں سٹن والا نیزہ ( جیولن) سانگا = سنگ ۔ صحبت ۔ مجلس ۔ دنیا نال تعلق ،ہلاّ کرنا='' ہے اللہ'' کر کے حملہ کر دینا، جنبش = جوش ، اروڑ = نامی پہلوان ٹ ک کئی لکھ کروڑ اروڑ جیہے علی توڑ مروڑ اڈا رجائے ( میاں محمد) ، سر سام = ( ١) سام بن نریمان (٢) سردی سوج دا روگ ، ژال زوال ۔۔۔۔۔۔ = رستم دا پیو زال اپنی شکست پاروں اپنے دھولیاں ( عمر تجربے) نوں لیک پیا لاوندا اے، بہ من مارے = مقابلے توں اک تھک کے بددل ہو جائے ، لُند= دولت دے گھاٹے پاروں گلے شکوے،پُور= نکّو نک بھر،لندھور=امیر حمزہ دی داستان وچ امیر حمزہ توں ہار کھا کے اوسے دی فوج وچ رلیا لشکری، پرم = پریم ۔ عشق، سُکھیا= سکھ مانن والا،اسفند یار=(١)غیر معمولی فطری ذہانت تے خداداد طاقت دامالک اسفند یار(٢)ٹ ک شخصیتاں،