ورقہ 105

1935
گُرزاں کبر بھرے سرچائے کڈھے پیچ کمنداں
جمدھر چھری کٹار تبر بھی نچ کھلوتے چنداں
1936
شیراں وانگن وٹن دیہی جنبش چڑھی جواناں
وار کرن للکار غنیماں رکھ تلی پر جاناں
1937
بھلے بھلے میدان بہادر کس کس مارن بھلّے
سانگاں تھر تھر کنبن قہروں برچھے کردے ہلے
1938
نیزے تیر پروون سینے کرن بہادر خیزاں
زنگی دے سر ڈھہ ڈھہ بھجن مٹ جویں رنگریزاں
1939
ہائے ہائے دو طرفی اٹھی غوغا ودھ شماروں
ایہ ہائے سی جُنبش والی اوہ ہائے سی ماروں
1940
پیا ہنگامہ وچ ندی دے جے دھرتی تے ہوندا
اس تھرتھل پچھل ادّل تھیں ٹِلا بھی ڈھے پوندا
1941
چُستی ویکھ شہزادے والی زنگی بھی اٹھ کنبے
غصہ کھاون زور لگاون اکھیں بلن النبے
1942
دونہہ طرفاں تھیں جُڑی لڑائی اٹھیا شور ککارا
نہ اوہ نسن نہ ایہ چھڈن ہویا دور سہارا
1943
شیر جوان دلیر چوپھیروں گھیر رکھن شاہزادے
پھیر اٹھے جھٹ دیر نہ لائے کردا زیر زیا دے
1944
سیف ملوک نہ سیف چلاوے نیزے مار پروندا
جت ول منہ کرے پھر اگے نہ سی کوئی کھلوندا
1945
جدھر حملہ کرکے دھائے چھڈ جاون تن جانی
کُجھ پھٹے کُجھ مارے بہتے ڈب مردے وچ پانی
1946
مرد زوراور دے ہتھ کڈھے سخت کمان کڑاکے
ہک ہک تیر ان دھیر نکلدا چیر سریر لڑاکے
1947
رابے اُپّر رابہ ہوندا فوج دو پاسے تکڑی
پین ہزار اڈار تیراں دے جیوں تلیر وچ مکڑی
1948
برچھے وانگ سیاری سلے اوہ ابنوسی تختے
تیراں دے وچ سُنبے بھجن لاون کوکے سختے
1949
ختم انداز شزادہ مارے چھم چھم تیر خدنگی
رتو نیر کیتا سبھ رتا کوہ کوہ سٹے زنگی
1950
کوہ کوہ جیڈا بدن زوراور کوہ کوہ لائے تودے
جُثّے جامے بیڑے سارے ہوئے خون الودے
1951
والوں ترکھے سرسانگاں دے والو وال نکھیڑن
ہک تھیں ہک دو چند محمد بند و بند اُکھیڑن
1952
لوہو دے ترہائے نیزے پی پی رت نہ رجدے
کالے رچھ اڑاون نالے شیر لوہے بھی گجدے
1953
کیتا جنگ نسنگ شزادے تنگ پئے سبھ زنگی
تک کے کارن آپ پکارن واہ شہزادہ جنگی

لفظالی:
گُرزاں کِبر= گرز دا مُٹھ والاحصہّ پتلا تے باقی حصّہ چوکھا موٹا بھارا ہوندا اے ۔ ایہہ موٹا حصہّ ای دشمن دے سر تے مار یا جاندا اے تاں جو سِر پھس جائے ۔ ایسے لئی گرز دے سِر نوں کبر بھریا آکھیا گیا اے ، کمند= دشمن دے قلعے تے چڑھن یا گردن وچ رِشک پھاہی پاون والا رسہّ ۔ کمند سٹن توں پہلاں اوہدے وٹ یا پیچ کڈھے جاندے نیں ، جم دھر= تیز خنجر جو جم ( عزرائیل دی شکل دھار لیندا اے )، کٹار = چھوٹی تلوار ، تبر= کوہاڑا، چنداں = چوکھے ای ، جنبش=جوش، بھلّے= بھالے، خےزاں کرنا= اُبھر اُچھل کے حملہ کرنا، دیہی وٹنا = چھال مارن توں پہلاں سریر نوں کٹھیاں کرنا۔، سہارا = جھلنا ۔ مقابلے وچ ٹِکنا، رابے اُپّر رابہ۔۔۔۔۔۔ = تیراں نال اک وار حملہ کرن دا عمل ، ان دھیر = بغیر کسے ڈِھل مٹھ دے ۔ چوکھی تیزی نال، خدنگ= اک پکی تے ہولی لکڑی جیہدے تیر بندے نیں ، کالے رچھ= زنگی ، نسنگ = بے جھجک۔کارن=کم۔ عمل ۔کارنامے،ٹِلّا=ٹ گ تفصیلاں