ورقہ 107

1972
ایسی ایسی شکل بناوے ویکھدیاں ڈرلگدا
قد بے وزن وڈا رُکھ جیونکر ہوندا لُوٹھا اگ دا
1973
گندھی مرہم اُٹھاں دی وانگر گندے تے رنگ کالے
وال لمے بھروٹّے مچھاں داڑھی بغلاں والے
1974
سبھ والاں چن گنڈھیں پیاں گنجھاں والے مندے
گندیاںمُچھاں گندیاں بغلاں سارے ہیسن گندے
1975
کالے کاں پہاڑی وانگر بولن بول اولے
چٹے دند دسن جیوں تارے چڑھن توے دے تھلے
1976
جاں زنگیاں دے شاہے ڈٹھا سیف ملوک شہزادہ
ہَس ہَس کچھاں مارن لگا ہویا خوش زیادہ
1977
کہندا ماس ایہناں دا چاہیے جلد کباب بنایا
آدمیاں دا گوشت سانوں مدت پاہتھ آیا
1978
اس گوشت دی سدھر آہی گُزری مدت الونی
اج نصیباں یاری کیتی کریئے ہاڑھ سلونی
1979
جنھاں پکڑ لیا ندے آہے اُٹھے دے دُہائی
شاہا ایہ نہ مارن جوگا وڈا جوان عطائی
1980
چالیھ زنگی ایس ہکلے مار گوائے کھلیاں
ایسا شیر جوان گنواویں کون کہے گا بھلیاں
1981
حکمت پاک خداوند والی آپے رکھن والا
منہ بگھیاڑاں دے وچ دے کے پھیر رکھے بُزغالہ
1982
بازاں دے ہتھ دے کبوتر آپے پھیر چھڑاندا
یونس پیٹ مچھی دے وچوں ثابت رکھ موڑاندا
1983
اگے قہر طوفاناں وچوں جس بچا لیاندا
اوہو رکھن والا ایتھے مِہر زنگی دل پاندا
1984
اس زنگیاں دے بادشاہے دِل پائی رب محبت
رکھ لیوس شہزادے تائیں نال طلب محبت
1985
دشمن دے دل پئی محبت کردا غور دلاسا
خِذمت گار کیتا شاہزادہ ویکھ عشق دا پاسا
1986
کُہندا تیر کمان اساڈے چاء رکھسی ایہ بندہ
شاہزادہ پھر نوکر ہویا تیر کمانے سندا
1987
یار شہزادے دے سبھ ونڈے کجھ کسے کجھ کسے
دس زنگیاں دے بادشاہے دی دھی دے آئے حصے
1988
جو لڑکی دے حصے آئے اس تے حاضر کیتے
کرکے ادب سلام شہانہ بیٹھے ہو چُپیتے
1989
شاہزادی اوہ بندے تک کے اپنے کول بلائے
حال حقیقت پچھن لگی کون تسیں کیوں آئے
1990
جو اوہناں پر گزری آہی دسی کھول کہانی
روپ انوپ شہزادے والا نالے عقل جوانی

لفظالی:
لوٹھا= لوسیا ہویا ، بے وزن = ہولا پولا،گُنجھاں والے= گنجھلدار ۔ مروڑی والے وال، مندے = برے حال، اولےّ= پُٹھے۔ عجیب ، تارے چڑھن۔۔۔۔۔۔ = توے دے تھلےّ اُتے کجھ چمکیلے تارے اودوں نظر آوندے نیں جدوں توے نوں چُلھّے توں لاہ کے کسے کندھ نال کھلہار دیئے ، ہاڑھ=جاڑھ ۔ ہنوں ۔ داڑھ ، عطائی = جنھوں کوئی گُن ربّ ولوں عطا ہویا ہووے ، بُز غالہ= بکری دا بچہ ۔ میمنا، طلب = خواہش ۔ چاہت ، اس تے=اس تھے ۔ اوہدے کول ، روپ انوپ = بے مثال حُسن ، غور دلاسا= کسے دے دل نوں تسلی دین لئی توجہ دینا، یونس پیٹ ۔۔۔۔۔۔= ٹ ک تفصیلاں،گندھی=گندھ والی بدبودار،