ورقہ 108

1991
سیف ملوک آہا جس رنگ دا تیسا آکھ سنایا
زنگی دی شاہزادی تائیں عشق مواتا لایا
1992
عشق نہیں ہک ویکھن اُتے سنیاں بھی اٹھ لگدا
منتر روئی والے وانگن چُھرا کلیجے وگدا
1993
زنگی دی شاہزادی تائیں لگا عشق نروآ
سیج اتے سی پیچ کریندی پیا دلے وچ چو آ
1994
رات دناں آرام نہ اس نوں رہندی تلو پسیلے
سیف ملوک پیو تھیں گِھناں پئی وچارے حیلے
1995
آدم بھیج پیونوں کہندی من میرا ایہ بھانا
ہک ایہ نفر مینوں جے بخشو دان لکھاں دا جاناں
1996
بیٹی دی تک خواہش بھاری کہندا بابل زنگی
اس بندے بِن بیٹی میں تھیں چیز نہیں کوئی منگی
1997
ہن ایہ اس نوں دینا بہتر نہ کجھ عذر بہانہ
سیف ملوک کیتا اس شاہے بیٹی ول روانہ
1998
جا پُہتا تاں زنگن بی بی ڈٹھا خوب شہزادہ
چنگیاڑی تھیں بھانبڑ بلیا ہویا عشق زیادہ
1999
بسم اللہ بسم اللہ کرکے اوپر تخت بہایا
آپوں بھی چڑھ بیٹھی کولے چن نوں گرہیوں لایا
2000
لاڈ کریندی ڈُھک ڈُھک بہندی کہندی ہے دلجانی
بن بن دسے میرے جیہی ڈٹھی آکوئی زنانی
2001
توں شُہدہ پردیسی بندہ ایہ نعمت تُدھ کِتھوں
اینویں پھر پھر مویوں کتھاویں طالع جاگے اِتھوں
2002
توں چندر میں زُہرہ وانگر دوہاں نئی جوانی
ساعت نیک پھری ہن تیری ہوئی اج قرانی
2003
توں گلبن میں چنبے ڈالی میں موتیں توں ہیرا
توں الوان سرخ میں نینو میں سالو توں چیرا
2004
جوڑی اج خداوند جوڑی توں راجا میں رانی
میں بن اگے تدھ ہکلیاں کیونکر عمر وہانی
2005
سیف ملوک ڈٹھا اس ولوں کے کجھ نظری آیا
مُنہ توے دے تھلے وانگر اس تھیں رنگ سوایا
2006
کاٹھی صحنک دا جیوں گردا ہوندا سڑکے کولا
پر اوہ بھی کجھ پکا ہوندا منہ اس دا سی پولا
2007
ہاتھی وانگن اکھیں لتھیاں رتیاں سن رت چھاٹی
گلھاں آپھر آپھر ہویاں جیوں ساون دی چاٹی
2008
ہاتھی وانگن نک موہیں تے ڈڈو جتنا چیڑا
دند بھی ہاتھی ہار دسالاں سخن دوجا ہے بھیڑا
2009
وال گلہاں تے متھے کنیں سوئیاں وانگر دسدے
ہوٹھ موٹے تے پلپل کردے ایہ پِھسدے کے پِھسدے

لفظالی:
مواتا = ککھاں کانیاں دا مُٹھا جس نوں اگ لاکے چتا دیاں تیل بھجیا ں لکڑاں نال چھوہایا جاندا اے ، روئی= نظر نال یا منتر نال کلیجا کڈھ لین والی ڈائن ٹ ک ۔ سوئی روئی تے جمی کھیہ ۔( عطیہ میاں سکندر صاحب )،نروآ= ڈاہڈا طاقت ور، پیچ کرنا= بھو انٹلیاں لینا ۔ بے تاب ہونا،چوآ=ٹھنڈپان والا قطرہ ، بھانا = خیال ۔ خواہش ، گرہیوں لایا= سیفل کول بہ کے اوہ انج جاپدی سی جویںچن نون گرہن لگا ہووے ، بن بن دسنا = سج پھب کے وکھانا، کُتھا ویں=غلط جگہاں تے ، چندر= چن، تلو پسیلے = بے چینی نال پاسے پر تدیاں رہنا، قرانی= دوستاریاں دا اک برج وچ اکٹھیاں ہونا ۔ خوش قسمتی پاروں دو بندیاں دا ملاپ ہونا ، گلبن = گلاب دا بوٹا ، سرخ الوان = رتا دو شالہ، نینو = ویل بوٹیاں دی ململ ، سالو = ویاہ والی رتی چادر ، رت چھاٹی= لہو ٹپک رہیا سی، صحنک = پرات کنالی، پولا مُنہ= ہوٹھ بُل لمکے ہوئے۔، ساون دی چاٹی=ساون دے مہینے وچ گھاہ پٹھا ودھن نال ددھ دی مقدار ودھ جاندی اے ایسے نسبت نال چاٹیاں وی وڈیاں ای ورتیاں جاندیاں نیں ،