ورقہ 109

2010
کراں دھیان بیان نہ بہتا مت طبع ہو گھوری
گندی بوہواڑھ نکلدی جیوں دوزخ دی موری
2011
بِلّے وانگر کن کھلوتے ٹھوڈی وانگر چوہے
ناساں دے سوراخ دُرگ سن دوبابل دے کھوہے
2012
گردن ڈڈّوں وانگ آوازا بولے سُجن ناڑیں
سیہے وانگ دیہی پر کنڈے چھپن نہیں اُچھاڑیں
2013
کوچاں دی کے گل سناویں کُپے جیوں ڈبگر دے
یا ادھ پھوک شناہیاں خیکاں ہلدے تھل تھل کردے
2014
کالی گُنجھاں والی نالی جیوں کر گھیرا بُگ دا
بغلاں دی بدبوئی کولوں ٹاپو گھاہ نہ اگدا
2015
بھارے چَیڑے پَیر انیویں جیوں تھم دوزخ دی کرسی
ٹنگاں تھم دوزخ دے کالے ڈاہڈا وِڈّھ کے ٹرسی
2016
کالے رنگ تے رتی سرخی دھڑی جیوں رت خوکاں
گل وچ زلفاں بوء مچائی جیوں پیازے بھوکاں
2017
عنبر تے کافوری منکے جو گل پاون ناریں
موتیں گُلیاں سُچیاں نالے پاون بوندی ہاریں
22018
ایہناں شیئں دے بدلے اس نے کے کجھ ہار بنایا
عنبر تے کافورے بدلے ہنگ دا منکا پایا
2019
موتی بدلے گنڈھے چٹے سلے چاء پیازی
گُلیاں بدلے تھومے گلیاں دم دم سی بو تازی
2020
ویکھدیاں جیو کچا ہوندا ڈاکر ڈاکر مریئے
جو چاہے سوچا بناوے رب ڈاہڈے تھیں ڈریئے
2021
ہور اگے تعریف زنگن دی لازم نہیں سناون
ڈر لگدا مت عاشق سن کے ناریں تھیں چِت چاون
2022
سیف ملوک کہیا میں اگے ہر مشکل وچ ول ساں
تینوں ویکھ پیا دل سوڑا ہائے ہن کت ول چلساں
2023
جس ویلے کوئی دسن لگے تیرے جہیاں بلائیں
بادشاہی دی دولت دے کے کہیے رکھ چُھپائیں
2024
کر کر رہی ٹنگار بتیرے سیف ملوک نہ تکدا
منہ موڑے تے اکھیں میٹے بہت جدوں پھر اکدا
2025
نالے گل شاہزادے والی بہت بری اس لگی
ناامید ہوئی نہیں مندا پیٹ چُھری اس لگی
2026
زنگن غصے ہو فرمایا ایہناں نوں لے جاؤ
ہر ویلے ایہ رہن نہ وہلے چکی خوب پیہاؤ
2027
زنگیاں پکڑ لئے اوہ بندے چا جُگڑائیاں چکیاں
نازک ہتھ امیر شہزادے پِیہن جواراں مکیاں
2028
پِیھ پِیھ چکیاں باہاں تھکیاں پُر پُر اُٹھے چالے
قہر نزولاں دے منہ آئے راج کماون والے

لفظالی:
گھوری = گند بو نال متلاون والی، درُگ = انھاّ کُھوہ ۔ تاریک غار، بابل دے کھوہ = ٹ ک ہاروت ماروت شخصیتاں، سیہے = قبرستان وچ پلن والا جانور جس اُتے وڈے وڈے کنڈھے ہوندے نیں Porcupine،کُوچاں = کواری مٹیار دیاں چھاتیاں، ڈبگر= ڈبے بناون والا، ادھ پھوک شناہیاں= گھٹ پھوک بھریاں ۔ ترن والیاں مشکاں ، خِیکاں = چمڑے دیاں چھاگلاں ، نالی = چھوٹا نالا ناڑا کچھے کچھہرے دا چھوٹا نالا، بُگ= بکری دے تھناں نون کجن والا تھیلا جیہڑا دو تنیاںنال بکری دی پُٹھ تے بجھا ہوندا اے، ٹاپو = جزیرہ، دھڑی= بُلاں اُتے مِسّی دی جمائی تہ، خوک = سُور ، ہار=کچنار دے پھُلاں دے ہار،گُلیاں = سونے دے بیلن نما ٹکڑے پروکے بنایا ہار ،گُلیاں = تُریاں ، ڈاکر ڈاکر = متلی قے کر کر کے ، سوڑا = تنگ ، ٹنگار= ناز نخرے دیاں اداواں ، جُگڑائیاں چکیاں = ٹ ک ١١٦، قہر نزولاں دے منہ آئے= اوہناں تے قہر نازل ہویا۔تھل تھل=کُپی یا چھا گل اندر پانی دی ہلن دی آواز،