ورقہ 112

2067
دو دن تے دو راتیں اوتھے بُھکھاتے ترہایا
رُکھے اُتّے چُھپیا رہیا کرپتاں دا سایا
2068
تریجے روز دوپہراں ویلے اژدہا ہک آیا
کوہ قافے توں لہہ کے اس نے آن ندی منہ لایا
2069
شاہزادہ اس ڈٹھا ناہیں ندیوں پانی پیتا
پھیر پہاڑی ول منہ کرکے ٹُریا پرت چُپیتا
2070
اژدہا کنڈِتا جاندا اس ولوں منہ پھیری
شاہ توکل رب دے کرکے کیتی چا دلیری
2071
پوچھل اس دی نوں ہتھ پایا محکم کرکے پھڑیا
اوس سبب پہاڑے اُتے صحیح سلامت چڑھیا
2072
جدوں پہاڑ اُتے چڑھ رہیا دُنب اس دا چھڈدتا
چھپ گیا شاہ رکھاں اندر گیا سپ کنڈِتا
2073
میوے پکے سن اس جائی خوب انجیر کھجوراں
کھادے جے کجھ خواہش آہی بیٹھا وانگ صبوراں
2074
پانی بھِنّی جو پوشاکی اوتھے بیٹھ سکائی
گھڑی آرام کیتا اس جائی اکھ ذرا ہک لائی
2075
جاگ پیاتاں یادپیو سو ماپے صاعد بھائی
نالے ہور اشنا پیارے سجن یار وفائی
2076
اس سوون دے بدلے اکھیں ہنجوں بھر بھر رویا
کرے تیاری مار کٹاری مریئے بہتر مویا
2077
پھیر کہے ایہ مرنا مندا آپوں کپن گاٹا
موت حرام شریعت اندر اگلے جگ دا گھاٹا
2078
پھیر صبر کر ٹُریا اوتھوں دم دم رب چتارے
اوس جنگل وچ ٹردے ٹردے اٹھے پہر گزارے
2079
دوجے روز ہویا دن روشن ساری جوہ سُہائی
رُکھ پہاڑ سنہری ڈِٹھے دھرتی جھلمل لائی
2080
میوے دار درخت عجائب ہر ہر پاسے پکے
ہک تھیں ہک رسیلا دِسدا جس جس طرفے تکے
2081
شاخاں توڑ بناوے خرچی کجھ بدھے وچ لیڑے
کے تکدا ہک پاسوں آئے وڈے وڈے کیڑے
2082
کجھ کجھ وڈے کُتے جیڈے کجھ مثل بگھیاڑے
شاہزادے نوں کھاون دھائے چڑھیانس پہاڑے
2083
اوسے وقت ہک پنکھی آیا وڈا قد شماروں
کیڑے چُن کھادے اس سارے خالی پیٹ انباروں
2084
جاں اوہ اڈن اتے ہویا شاہزادے کرہمت
پکڑے پَیر اوہدے بہوں تکڑے اڈیا اوہ لاقوّت
2085
شاہزادے دا بھار اس پنکھی ککھے جیڈ نہ جاتا
اُڈ ہوائے اندر جاندا چھڈ زمین دا حاطہ

لفظالی:
رُکھے= رُکھ ، پتاں = پتیاں ، اژدھا= وڈا موٹا سپ۔ اجگر، پرت = واپس ، محکم= پکا ۔ مضبوط ، کنڈتا جانا = کسے ہور پاسے ول دھیان نہ کرنا ۔ آسے پاسے ول کنڈ دِتی جانا، صبوراں = صابراں ۔ دُکھ جھلن والیاں ،بِھنّی= بھجی ۔ سِنّہی، اکھ لائی= تھوڑا چر سُتا، وفائی = وفادار ، بہتر مویا= مرنا ای بہتر اے، گھاٹا = نقصان ۔ خسارہ ، رب چتارے= اللہ ول خیال کرے، جوُہ سُہائی= علاقہ چنگا لگا ۔دھرتی جھلمل لائی = زمین دے بارونق نظارے ویکھے ، خرچی = اک دن دا خرچ ، لیڑے= کپڑے ، دھائی= نس کے آئے، خالی پیٹ انباروں = پنکھی دے پیٹ وچ انبار دی بھُکھ سی ، انبار= غلہ گودام ، بہوں تکڑے= بہت مضبوط کر کے ، ککھے جیڈ = ککھ جنا ، نہ جاتا = نہ جانیا،