ورقہ 113

2086
کئیں پہاڑاں اُتوں لنگھیا کئیں ٹاپو دریاواں
ہک جنگل وچ آیا اگوں وڈا درخت اُچاواں
2087
ہیٹھ اوہدے جابیٹھا پنکھی پیر شہزادے چھڈے
چھڈن سات گیا چھپ اوتھے جھنگڑ آہے وڈے
2088
اس پنکھی دا نام کتابیں کوہ پیکر کرکہندے
اوتھے سن دوبچے اس دے رُکھے اُتّے بہندے
2089
جاں پنکھی چڑھ رُکھ تے بیٹھا شاہزادہ کے تکدا
باشک نانگ کوہ قافوں ڈھلیا آیا واؤ بھکھدا
2090
کوہ پیکر نے بچے اپنے جنگل وچ چُھپائے
آپ لڑائی اس دی کارن آہتھ پیر ہلائے
2091
کوہ پیکر دے رُکھے اتے باشک نانگ آچڑھیا
پنکھی کوہ پیکر بی اگوں تکڑا ہوکے لڑیا
2092
کیتا جنگ نسنگ دوہاں نے مارے چنگ پکھیروں
سپ کُل مار انگیار موہیں تھیں مارے ہو چوپھیروں
2093
پنکھی چھڑیاں مارے چھڑیاں اس بی جُوہیں چھڑیاں
چُنج چلائے مِنج چوائے پنج پنج جائی پُڑیاں
2094
نانگ نہ جاوے بھاگ زور اور لاگ زہرے دے ولوں
مارے ڈنگ فرنگ کمائے تنگ کرے اس گلوں
2095
لگی لڑائی نانگ اڑائے ہووے چڑھائی دم دم
جھلن پھٹاں کردے چھٹاں مارن سٹاں جم جم
2096
کڑ کڑ کرکے پر پِڑ بھندے کوہ پیکر جدوجدا
پھڑ پھڑ بھڑکے اگ موہیں تھیں ناگ جدوں پھر وجدا
2097
اوڑک ڈنگ چلایا نانگے مارلیا کوہ پیکر
دشمن دا دم پی پھر لوڑے بچے جُوہے پے کر
2098
جھنگی جھلاں جاڑاں پھردا نانگ غصے نے چایا
آکھے تخم گواواں اس دا جس ایہ جنگ مچایا
2099
ویری تے ہتھ پیندا جس دا اِہو جیہی کریندا
بچہ کچا جان نہ چھڈ دا چُن چُن مُول مریندا
2100
چوہاں دناں دی حرصے بدلے ستم دوئے تے کرنا
جُھوٹھا دایا کے محمداوس نہ ہوسی مرنا
2101
شاہزادے دے پاسے آیا نانگ جدوں کر پھیرا
نس گیا اوہ چھپیا چھپیا اوتھوں پندھ گھنیرا
2102
چھپیا ہویا ویکھے دوروں نانگ جدھر منہ کردا
بوٹی گھاہ سڑن رکھ اوتھوں ایڈا جوش زہردا
2103
سڑبُھجی اوہ جوہ تمامی جس جس پاسے بھویاں
باشک نانگ ایہ کارج کرکے پھیر پچھاہاں رویاں
2104
سیف ملوک اس جُوہے اندر سر دھڑ بہتے ڈِٹھے
کئی پچھاتے اپنے پچھلے یار پیارے مِٹھے

لفظالی:
اچاواں = اچی تھاں تے کھلوتا ، چھڈن سات = چھڈدیاں ای، جھنگڑ = جھانگڑا ۔ سنگھنے رکھان دا جھنگ ، رُکھے = رُکھ ، باشک ناگ= ٹ ک تفصیلاں، ڈھلیا= تھلے اْتریا، کارن = لئی خاطر ، نسنگ = شرم جھاکے بنا، چنگ مارنا= پنجے مارنا ، کُل مار= جیہڑا سپ اپنے ڈنگے دے پُتر پھر پوترے نوں پھر اوہدی نسل وچوں اگلے پڑپوتے نوں ڈنگے، واؤ بھکھدا= ہوا خوری کردا، انگیار = انگیارے ورگی جیبھ ، چھڑیاں مارنا= زمین تے دو ویں پیر زور نال وار و وار کے چھیتی چھیتی مارنا، چھڑیاں = نِریاں، جوہیں چھڑیاں = زمین دے سب خطےّ گاہے ہوئے سن ، منج چوائے= مغز مجھ وچ چنج نال موری کرے تے مغز چو پوے، لاگ زہر= دشمنی دا زہر، جاڑاں = جھاڑیاں ، کاج= کارا ۔ وڈا کم ، جوش = ابال ،رویا= رواں رواںمُڑیا، فرنگ کمائے =فرنگ کولوں سکھے ہوئے، جم جم = قائم ہو کے، بچہ کچا مول= نسل دی اصل، دایا = دعویٰ ۔ منصوبہ۔ ٹیچا،پنج پنج جائی پُڑیاں = پنج تھاواں تے موریاں کر دِتیاں،