ورقہ 115

2124
بہت مصیبت سہہ کے لتھا اس کوہ قاف بُرے توں
اگوں سخت اجاڑیں آیا کس بُھرے تے ریتوں
2125
میوے کھاندا پانی پیندا کردا یاد الہی
نہ کوئی شہر گراں نہ آدم نہ ملدا کوئی راہی
2126
ہور درندے اتے چرندے ملدے ودھ حسابوں
سیف ملوک نہ رتی ڈردا مست پریم شرابوں
2127
گورے پی شراب برانڈی توپوں مول نہ ڈردے
جنھاں شوق صراحی پیتی بھوکس تھیں اوہ کردے
2128
ہتھوں ڈرن شہزادے کولوں آدم شیر بلائیں
جھال اقبال کمال اوہدے دی ناہی ہائیں مائیں
2129
عاشق عالم مرد زورآور نالے سی شاہزادہ
خوش آوازی برق اندازی نالے حسن زیادہ
2130
نیا جوان شجاعت بھریا ہتھ سخاوت والا
دانشمند پوشاکے ولوں دِسدا مرد اجالا
2131
ایہناں صفتاں وچوں جیکر ہک کسے وچ ہووے
اس تے بی کوئی پے نہ سکدا دل کر جدوں کھلووے
2132
ہک ہک صفت ایہناں تھیں آہی خاصی سائے والی
جس وچ ایہ تمامی ہوون اس دا سایہ عالی
2133
عاشق اگے تابع ہوون جیو جنتر صحرائیں
توڑے کر اکٹھیاں رکھے بکریاں شینہ گائیں
2134
مجنوں کول پہاڑے اُتے ہر دم بیٹھے سُتے
شینہ بگھیاڑ برڈے گدڑ رہندے آہے کُتے
2135
جس نوں آکھے آون دیون کول اوہدے بہ جاوے
دوروں موڑ ہٹاون پچھے جیہڑا اوس نہ بھاوے
2136
تاہییں سیف ملوکے تائیں آفت کوئی نہ مارے
سِرنیواں کر چلن اگوں جس ول نظر گزارے
2137
اوس جنگل وچ ٹردے ٹردے کتنے روز لنگھائے
ہک دن فجرے شہر چبارے دوروں نظری آئے
2138
نالے شکر بجا لیاوے نالے سی بھَوکھاندا
خبر نہیں کے لکھیا ملسی ہوگ ایہ شہر کِنھاں دا
2139
تردا تردا نیڑے آیا آپہتا دروازے
ڈِٹھا شہر وڈا بے حدا باغ چوپھیرے تازے
2140
ہر ہر جائی نہراں وگن پُھلے پھل ہزاراں
ڈال اُڑا زمیں پر آندے میوے سیب اناراں
2141
خوب طرح دی رونق باغیں زینت زیب تمامی
چوک عراق بنے وچ عمدے خاصے حجرے عامی
2142
سبھنیں گلیں باغ چنگیرے آدم وچ نہ کوئی
فکر پیا جو سُجھدی آہی شائیت اوہو ہوئی

لفظالی:
کس= پہاڑاں توں اتردی ہوئی چھوٹی ندی، بھُرا = پہاڑی وادی وچوں مٹی پُٹ کے بنایا ڈوہنگھا تلاء جیہا جیہدے وچ بارش دا پانی اکٹھا کیتا جاندا اے ، برق اندازی = ویکھن والیاں تے حُسن دی بجلی ڈیگن دا گُن، ریتوں = ریت، شوق=عشق ، بھو= ڈر، جھال = جھلن دی سکت، اُجالا= اُجلا ۔ صاف ستھرا، پے سکنا = رقیب بن کے محبت وچ کامیاب ہو جانا۔ ٹ ک فلانی عورت فلانی اُتے سوکن پے گئی اے، جیو جنتر صحرائیں = صحرا دی کل مخلوقات ، توڑے = بھانویں ۔،بِرڈا= چیتا، رہندے آہے کتے= کتے بن کے رہندے سن ، لکھیا = قسمت وچ درج ہویا ، جائی = تھاں تے ، اُڑا= جُھکا نواں کے، عراق= دریا کنڈھے رونق دار بستی، حجرہ = کیوبیکل ۔ اکلّے بندے لئی چھوٹا کمرہ،