ورقہ 119

2198
حرص مجازی شہوت بازی جس اندر وچ ہوندی
ہر ہک صورت اُجلی تک کے پئی طبیعت بھوندی
2199
جس سرسِرّ عشق دا اوتھے شہوت مُول نہ وِسدی
جس دل حُبّ سجن دی اس وچ حُبّ نہیں ہر ِکس دی
2200
اگ نہ ساڑے ککھ جنہاں تے رحمت بدلی وسدی
ایویں صدق نہ ہار محمد ویکھ طبیعت ہسدی
2201
شہوت باز مجاز حرص دے ناز نیاز نہ جانن
راز گواون باز نہ آون ہتھوں باز رنجانن
2202
کامل عشق خدایا بخشیں غیر ولوں مکھ موڑاں
ہکو جاناں ہکو تکاں ہکو آکھاں لوڑاں
2203
آوے مستی جاوے ہستی بُھلّے شکل پرستی
پِیر اکسیر گھتے ہوء سونا ایہہ کُٹھیالی جَستی
2204
کدھر رہیا گھاٹ محمد کدھر آئیوں ترکے
قصہ سِدھا صاف سنائیں خوب سنبھالا کرکے
2205
سیف ملوکے شہر ملک دا کیتا سیر بھلیرا
ڈِٹھاہک وچکار شہر دے گنبد بہت اچیرا
2206
چوٹی اُچی چنّے توڑیں پَیر زمیں پر پکے
رنگ صفائی نظر نہ ٹھہرے سورج مثل چمکے
2207
شیشے پُھل زرودی تارے انبر جیسا گِردا
اوہ قائم سی دینہاں راتیں انبر ہتھوں پِھردا
2208
جیونکر انبر اُتے کردے گردش بُرج ستارے
کہن نجومی اس گردش تھیں ظاہر ہون پسارے
2209
اس وچ بھی ہک آہا یارو گُجھا سِرّ اجیہا
اوہ بھی آکھ سناساں اگے جے دم زندہ رہیا
2210
اوس گنبد دے اندر آہے بی بی تے شاہزادہ
سیف ملوک ڈٹھا وچ چشمہ پانی بہت کشادہ
2211
نہ ٹھنڈا نہ تتا بہتا شیر گرم اوہ پانی
چمکن ہارا جیونکر پارا صاف شکل من بھانی
2212
تھوڑی تھوڑی نظری آوے گرم ہواڑھ نکلدی
ایوں معلوم ہووے جیوں مٹھی ہیٹھ ہوندی اگ بلدی
2213
سیف ملوک بی بی تھیں پُچھیا کیسا ہے ایہ پانی
کے کجھ صفت اِہدے وچ بی بی دسیں کھول کہانی
2214
بی بی کہیا سُن شہزادے ایتھے مرد نہ مِلدا
جاں ایہ کڑیاں بالغ ہوون مطلب لوڑن دِل دا
2215
شہوت آن کرے جد غلبہ اس چشمے وچ نہاون
لذت مرد زنانی والی پانی وچوں پاون
2216
نالے حمل ایہناں نوں ہوون پیدا ہوون دھیاں
حکم ربے دے نال ایہ صفتاں اس پانی وچ پیاں

لفظالی :
سر عشق دا= عشق دا بھیت ، مول نہ وِسدی= ہر گز وساہ نہ کھاندی ۔ کول آونوں ڈر دی اے، حرص مجازی = حقیقی دے اُلٹ فانی چیزاں دی لگن ، ہرکس=کسے غیر دی، صدق نہ ہار= صدق نہ چھڈ بہو، طبیعت ہسدی = جسمانی سریر ک منگاں پاروں کِھڑی ہسدی انسانی مشین ، ہتھوںباز۔۔۔۔۔۔=قابوآئے باز نوں وی ناراض کر کے اڈا چھڈ دے نیں ، نیاز = عاجزی ۔ لوڑوندی، جستی = ٹ ک تفصیلاں ، سنبھالا = احتیاط ، زرود=مکے نوں جاون والی سڑک دا صحرا، زرودی تارے= ایس صحرا دے تارے، انبر = اسمان ، گردا= محیط گولائی ، ہتھوں = سگوں ۔ بلکہ ، پسارے=کھلار تفصیلات، سِرّ = بھیت ، شیر گرم = ددھ دی قدرتی گرمی جنا گرم ، شکل من بھانی= پانی دی شکل من نوں بھاوندی سی، لوڑن=ڈھونڈن ۔ بھالن۔ شہوت= کنک دی مستی،